Johannes 1-2

JOHANNES WOTANIN WAŠTE TAWA

WICOWOYAKE 1.

1 Otokahe ekta Wicoie kin hee; Wicoie kin he Wakantanka kici un, qa Wicoie kin he Wakantanka kin ee.

2 He otokahe ekta Wakantanka kici un.

3 Iye eciyatanhan taku owasin kagapi; qa taku kin tokan tanhan takudan kagapi šni.

4 Iye kin en wiconi; qa wiconi kin he wicašta iyoyamwicaye cin hee.

5 Iyoyanpa kin hee otpaze cin en omdesya un tuka otpaze cin he iyowinkiye šni.

6 Wicašta wan Wakantanka eciyatanhan u šipi, he Johannes eciyapi.

7 He wayaotanin hi, Iyoyanpa kin oyake kta; hecen iye eciyatanhan owasin wicadapi kta.

8 Iyoyanpa kin he iyešni, tuka iyoyanpa kin he yaotanin kta e u šipi.

9 Iyoyanpa wicakapi hince cin hee, wicašta otoiyohi wicoicage kin en u iyoyamye cin hee.

10 He wicoicage kin en un, qa iye wicoicage kin kaga, tuka wicoicage kin sdonyapi šni.

11 Tona tawa kin hena ekta wicahi, tuka tawawicaye cin hena iyowinkiyapi šni.

12 Tuka tona iyowinkiyapi kin hena Wakantanka cinca wicaya yakonpi kta e okihi wicaya, tona iye caje wicadapi kin hena.

13 Hena wicawe eciyatanhan šni, qa wicacehpi tawacin kin eciyatanhan šni, qa nakun wicašta tawacin kin eciyatanhan šni, tuka Wakantanka eciyatanhan wicatonpi.

14 Unkan Wicoie kin he wica cehpi kagapi, qa unkiyepi kin en ounyan; qa wootanin tawa kin wanunyakapi, wootanin kin he Atkuku eciyatanhan išnana icaga tawa kin he iyececa; wowaonšida wowicake ko ojudan.

15 Johannes he yaotanin, qa heya niyan; Tuwe mihakam u kte cin he mitokara yawapi ce, epe ciqon he dee; he mitokam un nakaeš.

16 Unkan woojudan tawa kin etanhan unkiye owasin unkicupi, qa he wowašte wicowašte kin on.

17 Woope kin he Moses wicaqu; tuka wicowašte wowicake ko hena Jesus Messiya eciyatanhan u.

18 Tuwedan tohinni Wakantanka wanyake šni; tuka Cinhintku išnana icaga Atkuku maku ohna un kin he sdonye unkiyapi.

19 Unkan Johannes woyake ciqon he dee; Jerusalem etanhan Juda oyate Wošnapi kagapi Levi wicašta ko ekta ye wicašipi qa, Tuwe niye he? eciyapi.

20 Tuka Johannes ohdake en anakihbe šni, tuka ohdaka; Messiya kin he miye šni ce.

21 Unkan wiwangapi; Nituwe he? Eliyas he niye he? Unkan, He miye šni ce, eya. Wicašta wokcan kin he niye he? eciyapi. Tuka, Hiya, eya.

22 Hehan, Ecin tuwe niye he? eciyapi: tona deciya unkušipi hecinhan hoši wicunkakipi kta e heunniciyapi; Token onihdaka he?

23 Unkan heya; Jehovah tacanku kin owotanna kicaga po, tuwe hewoskan eyanpaha un kin he miye ce, Isaya wicašta wokcan eye ciqon iyececa.

24 Unkan tona en u wicašipi qon hena Pharisee etanhanpi.  

25 Unkan wiwangapi qa heciyapi; Hecen tokeca e baptem wicayaqu he; Messiya he niyešni, qa Eliyas he niye šni, qa wicašta wokcan kin he niye šni hecinhan?

26 Johannes awicayupte ca heya; Miye mini on baptem wicawaqu ece: tuka wanji nayajinpi kin cokaya najin tuka sdonyayapi šni;

27 Tuwe mihektam u kte ciqon, tuka mitokam yawapi kin hee; tahanpe kin wakiyušdoke kta ešta owakihi šni ce.

28 Hena taku kin Bethabara, Jordan akasanpatanhan, econpi, he en Johannes baptem wicaqu.

29 Anpetu iyokihe hehan Jesus etkiya u kin Johannes wanyake ca heya; Tacinca Wakantanka tawa, oyate wahtanipi kin tokan ehpeye kte cin he wanyaka po.

30 Tuwe on hepe ciqon he dee; Wicašta wan mihakam u kte cin he mitokam yawapi; he mitokam un nakaeš.

31 Qa mis eya he sdonwaye šni; tuka Israel oyate kin ekta yuotaninpi kta e heon mini on baptem wicawaqu wahi ce.

32 Unkan Johannes wayaotanin qa heya; Woniya kin he wakiyedan kahya mahpiya eciyatanhan kuntkiya u wanmdaka, unkan he en hiyanka.

33 Unkan he tuwe kin sdonwaye šni, tuka mini on baptem wicaqu maši qon he omakiyaka; Tohan mahpiya kin eciyatanhan Woniya kin kuntkiya ye ca, tuwe iyahde wandake cinhan he iye Woniya Wakan on baptem wicaqu kta.

34 He wanmdaka e on mdaotanin; Wakantanka Cinhintku kin hee.

35 Ake ihanhanna hehan Johannes waonspewicakiye cin nom om en najin:

36 Qa Jesus omani wanyake cehan heya; Iho, Tacinca Wakantanka tawa kin he dee ce!

37 Unkan waonspewicakiya nom ie cin he nahonpi, qa Jesus ihakam yapi.

38 Hehan Jesus ihdamna, qa ihakam upi wanwicayake ca hewicakiya; Taku ayakitapi he? Unkan, Itancan, (Waonspekiye eyapi kin he kapi,) tukten yati he? eciyapi.

39 Upi qa wanyaka po, ewicakiya. Unkan kici hdapi, qa tukte en ounye cin he wanyakapi, qa anpctu ihunniyan kici yukanpi: wanna oape wikcemna hehantu.

40 Nom Johannes ia nahonpi qa Jesus ihakam yapi qon, Andrew Simon Inyan sunkaku kin he unma ee.

41 He cincu Simon tokaheya iyeye ca heciya; Messiya, (he Sdayapi eyapi kin,) iyeunyanpi ce:

42 Qa Jesus ekta ai. Unkan Jesus wanyake cehan heya; Simon Jona cinhintku kin he niye: Kephas eniciyapi kta, (he Inyan eyapi kin hee).

43 Ihanhanna kin hehan Jesus Galilee heciya ya, unkan Philip wanyake ca heciya; Mihakam u wo.

44 Philip Bethsaida hetanhan, nakun Andrew Inyan kici he otonwe tawapi.

45 Philip Nathanael akipa, qa heciya; Moses woope en owa qon, qa wicašta wokcanpi kin nakun, he wanna iyeunyanpi, Jesus Nazareth etanhan, Joseph cinhintku kin hee.

40 Unkan Nathanael heciya; Nazareth etanhan taku wašte u okihi kta he? U qa wanyaka wo, Philip eciya.

47 Jesus Nathanael en u wanyake ca he on heya; Wanyaka po, Israel wicašta hinca wan he dee, wicahnaye wanin un ce!

48 Nathanael heciya; Tokiyatanhan sdonmayaya he? Jesus ayupte ca heciya; Philip nico qon he itokam can ihukuya nayajin qon hen wanciyaka.

49 Nathanael ayupte ca heciya; Itancan, Wakantanka Cinhintku, Israel oyate Wicaštayatapi kin he niye.

50 Unkan Jesus ayupte ca heciya; Can ihukuya nayajin wanciyaka epa, unkan heon wicayada he? Dena taku isanpa tanka wandake kta ce.

51 Unkan heciya; Wowicake, wowicake eciyatanhan heciciyapi, Tokata mahpiya kin yuzamnipi, qa Wakantanka taokiye kin wankantkiya yapi, qa ake kuntkiya upi, qa Wicašta Cinhintku kin en himniciyapi wandakapi kta ce.

JOHANNES WICOWOYAKE 2.

1 Anpetu iciyamni kin hehan Galilee makoce en otonwe wan Kana eciyapi hen kiciyuzapi omniciye kagapi; unkan Jesus hunku kin en opa.

2 Jesus nakun waonspewicakiye cin om kiciyuzapi kin en kicopi.

3 Unkan miniša wanna henakeca hehan, Jesus hunku kin heciya; Miniša takudan yuhapi šni ye.

4 Unkan Jesus heciya; Winohinca hetanhan iwamayatokiya he? nahanhin iyemicihantu šni ce.

5 Unkan hunku kin wayutan wicakiyapi, He tokehin eniciyapi owasin ecen ecom, ewicakiya.

6 Inyan wakiškokpa šakpe en han, ohna Juda oyate ihdujajapi kta e hdepi; otoiyohi wiyutapi nom yanini kipi.

7 Wakiškokpa kin mini ojudan okaštan po, ewicakiya. Unkan ojugjudan okaštanpi.

8 Hehan, Onge etanhan icupi qa omniciye itancan kin he kaya po, Jesus ewicakiya. Unkan kayapi.

9 Unkan omniciye kin en itancan kin onge yatkan uta, he mini tuka miniša icahyapi, qa he tokiyatanhan kin sdonye šni, tuka wayutan wicakiyapi mini akupi qon hena sdonyapi, unkan itancan kin tawicu ton qon kico;

10 Qa heciya, Wicašta eca miniša wašte tokaheya yatke wicakiya ece; qa tohan wicasta wipipi hehan taku aoptetu kin; tuka niye miniša wašte hinca dehanyan yehnaka ce, eya.

11 Galilee makoce kin hen, Kana otonwe he en, Jesus toka taku wapetokeca econ, qa towitan hdutanin; unkan hecen waonspewicakiye cin wicadapi.

12 He iyohakam Kapernaum ekta apamahde iyaya, iye qa hunku qa sunkaku qa waonspewicakiye cin hena koya om; unkan anpetu tonana hen yakonpi.

13 Unkan Juda oyate woacakšin wošnapi tawapi kin wanna ikiyedan; heon Jesus Jerusalem ekta itanwankanhde iyaya.

14 Unkan tipi wakan kin en wicašta kin eya, tatanka, tahinca, wakiyedan ko wiyopewicakiyapi, qa maza ska tokiyopekiciyapi kin en iyotankapi e wanwicayaka;

15 Qa icapsinte cikciqadan yugaga wan kage cehan, tipi wakan kin etanhan owasin tankan iyewicaya, tahinca tatanka ko; qa mazaska tokiyopekiciyapi qon iš kada iyeya, qa can wahna wotapi kin he nakun paahdapšinyan ehpeya.

16 Qa wakiyedan wiyopeyapi kin iš, Dena owasin tankan iyeya po, qa, Ate ti kin de wopeton tipi kagapi šni po, ewicakiya.

17 Unkan waonspewicakiye cin wowapi en kagapi qon he kiksuyapi, Yati owakiye cin he mayapota ce.

18 Hehan Juda oyate ayuptapi qa heciyapi; Tokiya tanhan he oyakihi qa hecanon he?

19 Unkan Jesus waayupte ca, Tipi kin de ihangya po, qa anpetu iciyamni ki ihan ake ekicetuwaye kta, ewicakiya.

20 Waniyetu wikcemna topa qa sani šakpe hehanyan tipi kin de kagapi qa yuštanpi qon, niye nakaha anpetu iyamnina ekicetu yaye kta he? Juda oyate kin eciyapi.

21 Tuka tipi eye cin he iye tancan kin he ka e heon etanhau heya.

22 Heon wiconte etanhan ihduekicetu, hehan hecen ewicakiye ciqon he waonspewicakiye cin kiksuyapi; unkan wowapi wakan qa Jesus taku ewicakiye cin hena koya wicadapi.

23 Unkan Jerusalem en woacakšin wošnapi kin icunhan, taku wapetokeca econ kin hena wicota wanyakapi qehan iye caje kin on wicadapi.

24 Tuka Jesus owasin sdonwicaye cin heon etanhan wacinwicaye šni.

25 Qa wicašta on tuwedan wayaotanin kta cin šni; iye atayedan wicašta taku en un kin sdonya, heon etanhan.