Roma Oyate Wowapi Wicowoyake 12- 16 (Romans 12-16)

ROMA OYATE WOWAPI WICOWOYAKE 12.

1 Heon mihunkawanji, Wakantanka wacantohnake cin on etanhan eciciyapi ce, nitancanpi kin wošnapi ni un, wakan, qa taku Wakantanka iyokipi kin, hena hecen yaqupi kta, he wawoyakiyapi kte cin hecetu hinca.

2 Qa wicoicage kin de en iyecen awacanipi kte šni, tuka nitawacinpi yuecepidan kte cin on nihdutokecapi nunwe; hecen Wakantanka tawacin wašte, oiyokipi, qa hduštanpi kin he tukte e idukcanpi kta.

3 Wowaonšida maqupi kin he eciyatanhan, tona niyepi ekta un kinotoiyohi hecen eciciyapi; Tuwedan token ihdukcan kte cin he isanpa ihdawa kte šni, tuka wacinksamya ihdukcan kta, Wakantanka otoiyohi wacinyanpi iyuta wicaqu kin he eciyatanhan.

4 Wicatancan wanjidan en wicahuha ota unhapi, qa huha kin hena owasin okonwanjidan ohanye šni :

5 He iyecen unkiye unkotapi, tuka Messiya en tancan unwanjipidan, qa otoiyohi huha unkiciyapi.

6 Hecen wowaonšida  otoiyohi yukinukanyan unqupi kin eciyatanhan wicookihi ociptetu unhapi; he wokcanpi kte cin hee hecinhan, wowacinye iyutapi kin on unkiyukcanpi ece e kta.

7 Qa waowicakiyapi kin hee hecinhan, waowicakiyapi kin en unyakonpi kta; qa tuwe waonspekiya okihi kinhan, he waonspekiyapi kin en un kta.

8 Tuwe wahokonwicakiye kte cin he wahokonwicakiyapi kin en un kte; tuwe taku wicaqu kte cin he ohanpiya econ kte; tuwe oyate wicayuhe cinhan he mnihenya econ kta; qa tuwe onšiwicadake cinhan iyokipiya econ kte.

9 Wacantkiyapi kin he wohnaye wanin un nunwe. Taku šice cin he šice dakapi, qa taku wašte kin he en iyaihdaška po.

10 Hunkawanjin kiciyapi waste kicidakapi kin he on otoiyohi cante en kiciyuza po, qa woyuonihan on otoiyohi iyotan kicidaka po.

11 Wicohtani kin en kujapi šni, woniya on aiciciyapi, Itancan kin okiya po.

12 Woape en wiyuškinpi; kakijapi kin en icunhan wacintankapi; qa wocekiye eya yukan po.

13 Tona owotanna un kin taku icakijapi kinhan owicakiya po. Wicašta icimanipi kin ohanpiya ecawicakicon po.

14 Tona šicaya nicuwapi kin hena wicayawašte po; wayawašte po, qa wayašicapi šni po.

15 Tona wiyuškinpi kin hena om wiyuškin po; qa tona ceyapi kin hena om ceya po.

16 Otoiyohi okonwanjidan awakicicin po. Taku wankan un kin hena ekta ewacinpi šni po; tuka tona kun ihdawa kin hena en opa po. Wacinksapeicidapi šni po.

17 Tuwedan taku šica on itkom šicaya econpi šni po. Wicašta owasin itokamya taku owotanna ecedan kamnan po.

18 Tohanyan oyakihipi kinhan, wicašta owasin om wookiye yakon po.

19 Wašte cicidapi kin, ihnuhan niye cinka watoyeconpi kin, tuka wocanniye nakicipa po. Hecen wowapi en kagapi, Tokiconpi kin he miye mitawa, wicawecu kta ce, Itancan kin eya.

20 Heon tuwe toka niye cin he wotektehda kinhan wo qu wo; qa ipuza kinhan mini qu wo; hecen ecanon kinhan, petaga kin he pa kin en eju ade kta.

21 Ihnuhan taku šica on ohiniyanpi kin, tuka taku wašte e on taku šice cin ktepidan po.

ROMA OYATE WOWAPI WICOWOYAKE 13.

1 Wicanagi otoiyohi wicowašake itancan kin hena ihukun iyeiciye kte. Wicowašake Wakantanka etanhan un kin hecedan yukan. Wicowašake un kin hena Wakantanka kaga.

2 Heon etanhan tuwe wicowašake kin kipajin kinhan he Wakantanka toope kin kipajin, qa tona wawakipajin kin hena wicayacopi kta.

3 Wicaštayatapi kin hena wicohan wašte kin en wakokipe wicakicagapi šni, tuka wicohan šice cin en. Hecen wicowašake kin he koyakipe kte šni he? Taku wašte e econ wo, kinhan on niyatanpi kta ce.

4 He taku wašte on niye ekta Wakantanka taokiye kin hee. Tuka taku šica ecanon kinhan kokipa wo. He mazasagye ituh yuhe šni; tuka Wakantanka taokiye kin heca, tuwe taku šica econ kinhan tokicon kta, wocanniye kin heon.

5 Heon etanhan anagoptan yaunpi kta, wocanniye kin hecedan on etanhan šni, tuka nakun wiyukcanpi kin heon.

6 Heon etanhan mazaska mnakiyapi kin en oyapapi ece: hena e Wakantanka taokiyepi kin ohinniyan taku kin de econ yukanpi.

7 Heon etanhan, ownsin taku token wicaqupi kta iyecece cin wicaqu po: Tona iye taoyate kin etanhan mazaska mnayanpi kin he ecen wicaqu po; qa tona oyate tokeca etanhan mnayanpi kin he nakun ecen wicaqu po. Tona kinihanpi kte cin hena wicakinihan po, qa tona yuonihanpi kte cin hena wicayuonihan po.

8 Tuwedan takudan ikicazo šni un po, otoiyohi wašte yecidakapi kte cin hecedan. Tuwe wicašta tokeca wašte wicadake cin he woahope kin tanyan yuha.

9 He decetu; Wawicihahapi ecanon kte šni; Tin wicayakte kte šni; Wamayanon kte šni; Tuwedan en oitonšniyan wodake kte šni; Taku tokan tawapi kin yacin kte šni; qa woahope tokeca yuke cinhan wicoie kin de en yuwitayapi; Wicašta tokeca niye inihdacin wašte yadake kta ce.

10 Waštewicadakapi kin he wicašta tokeca taku šica takudan ecakicon šni, heon waštewicadakapi kin he woahope yuecetupi kin hee.

11 Qa nakun kaketu, anpetu kin sdonunyanpi, woištinma etanhan unkiktapi kte cin wanna iyehantu; nakaha eunhdakupi kte cin tokaheya wicaundapi qon he isanpa ikiyadan ihan;

12 Hanyetu kin wanna ecadan unkihunipi kta, anpetu kin kohanna u kta, heon etanhan otpaza wicohan kin ehpeunyanpi, qa iyoyanpa wipe kin kounyakapi kta.

13 Qa iyokipiya maunnipi kta, anpetu kin en iyececa. Hanyetu wacipi qa witkopi kin en unkopapi kte šni; wicawihomnipi qa wicinpi, wakinicapi qa winawizipi kin hena en ounpapi kte šni.

14 Tuka niye Jesus Messiya Itancan kin he koyaka po, qa wicacehpi wocantiheye šice cin ecetu yapi kta e on takudan kicamnanpi šni po.

ROMA OYATE WOWAPI WICOWOYAKE 14.

1 Tuwe wicada kinhan wasake šni ešta iyowinkiya po, tuka akipam waakinicapi kin ekta šni.

2 Wicasla wanjidan taku owasin yuta okihi awacin, qa wicašta tokeca wašake šni kin he wahpe ece yuta.

3 Tuwe wote cinhan he tuwe wote šni kin ihaha kte šni ; qa tuwe wote šni kinhan he tuwe wote cin yaco kte šni; Wakantanka he iyowinkiya.

4 Nituwe he wicašta tokeca taokiye kin daco he? he iye yuhe cin en najin kta kaeš hinhpaye kta. Qa he ecen najin kiyapi kta, Wakantanka najin kiye kta okihi.

5 Wicašta wanji anpetu wanji iyotanduka, qa wicašta tokeca wan anpetu owasin akiyecen yawa ece. Otoiyohi iye tawacin ekta sutaya awacin nunwe.

6 Tuwe anpetu wan awacin kinhan he Itancan kin on awacin; qa tuwe anpetu kin awacin šni kinhan, Itancan kin ekta awacin šni. Tuwe wote cinhan, he Itancan kin on wota, qa Wakantanka wopida eciya; qa tuwe wote šni kinhan, Itancan kin on wote šni, qa Wakantanka wopida eciya ece.

7 Unkiyepi kin tuwedan iye hinca on ni šni, qa tuwedan iye hinca on te šni.

8 Unnipi kinhan Itancan kin on unnipi, qa untapi kinhan Itancan kin on untapi. Hecen unnipi, qa untapi unma tukte hecinhan, Itancan kin tawa unyanpi.

9 Hecen on Messiya te ca ake kini, wicate ca wicani kin heniyoza en Itancan kta e heon.

10 Tokeca nihunkawanji daco he? qa tokeca nihunkawanji iyakihaha he? Owasin Messiya tawoyaco oiyotanke kin itokam inaunjinpi kta.

11 Hecen wowapi en kagapi; Miye wani kin, heon hupahu otoiyohi miye en canpeška makehde inajin kta, qa wicaceji otoiyohi Wakantanka en wohdake kta, Itancan kin eya.

12 Heon etanhan unkiyepi otoiyohi Wakantanka kin en wounhdakapi kta.

13 Hecen on, detanhan otoiyohi unkiciyacopi kte šni, tuka kaken e iyotan wakonza po, tuwedan taku en siha ibotopi, qa on hinhpaye kte cin he hunkawanjitku kin itokam ehde kte šni.

14 Miš sdonwaye ca Jesus Itancan kin en awacami, takudan atayedan šape šni; tuka tuwe taku šapa kecin kinhan, he taku kin iye ekta šapa ece.

15 Qa woyute kin on etanhan nihunkawanji iyokišin yaye cinhan wowaštedake eciyatanhan mayani šni. Messiya tuwe on te ciqon he woyute nitawa kin on ihang ye šni wo.

16 Ihnuhan taku wašte duhapi kin he yašicapi kinhan.

17 Woyute qa woyatke kin Wakantanka tokiconze kin hee šni; tuka wicoowotanna wookiye qa Woniya Wakan kin en wowiyuškin kin hena ee.

18 Tuwe hena taku kin en Messiya wowidag ye cinhan, he Wakantanka iyokipi ye ca, wicašta kin on wašte dakapi.

19 Heon etanhan taku tona wookiye kage cin hena unkakitapi kta qa nakun taku on otoiyohi icah unkiciciyapi kta.

20 Woyute kin on etanhan Wakantanka taku kage cin he ihang ye šni wo. Awicakehan taku owasin wašte; tuka tuwe taku yute ca on wahtani wicaye cinhan, he šica ece.

21 Waconica yutapi šni, qa mini sa yatkanpi šni, qa taku tokeca on etanhan nihunkawanji hicahe ca, wahtani, qa wašake šni aye cin, hena econpi šni kinhan he wašte.

22 Wowacinye duha he? Niš niye Wakantanka itokamya hduha wo. Tuwe taku iyowinkiye cin on ihdaco šni kinhan, he yuwaštepi ece.

23 Qa tuwe wicada šni kinhan he yute cinhan wanna yacopi, wacinyanpi kin on hecon šni, heon etanhan. Taku owasin wacinyanpi eciyatanhan šni kin hena woahtani.

ROMA OYATE WOWAPI WICOWOYAKE 15.

1 Unkiye waunšakapi kin tona wašake šni un sutaya wacinyanpi šni kin on wacinuntankapi kta, qa iyokipiunkiciyapi kte šni.

2 Otoiyohi wicašta tokeca iyokipi unyanpi kta, wowašte en icah yapi kte cin heon.

3 Messiya iye kaeš iyokipi iciye šni, tuka wowapi en kagapi qon iyecen, Tona aniiapi kin waaiapi kin he miye aihpemayanpi qon.

4 Taku tona wowapi en kagapi kin hena onspeunkiyapi kte cin heon kagapi, hecen wicowahbadan, qa wowapi wakan kin en wicakicanpte cin eciyatanhan woape unhapi kta.

5 Wakantunka wicowahbadan, wicakicanpte ko yuhe cin he Jesus Messiya eciyatanhan, otoiyohi okonwanjidan wacin en kiciyus niyanpi nunwe.

6 Qa hecen wicotawacin wanjidan, qa wicai wanjidan on Wakantanka Jesus Messiya Itancan unkiyapi he Atkuku kin datanpi kta.

7 Heon etanhan otoiyohi iyowinkiciciyapo, Wakantanka yutanpi kte cin heon Messiya iyowinunkiyapi qon iyececa.

8 Miye kin kaken epe; Jesus Messiya bakihdayapi wicohan kin en ookiye ikicaga, Wakantanka towicake kin heon, qa hunkakepi kin wahowicayapi qon he hduecetu kte cin heon etanhan.

9 Qa hecen Ikcewicašta kin Wakantanka yatanpi kta, iye towaonšida kin on; wowapi en kagapi qon iyececa, Heon etanhan Ikcewicašta ehna ociyakc ca nicaje kin iwadowan kta.

10 Qa ake hecen eya, Ikcewicašta kin iyuškin po, iye taoyate kin kici.

11 Qa ake, Ikcewicašta kin owasin Itancan kin idowanpi, qa oyate kin owasin he yatan po.

12 Ake Isaiah hecen eya, Jesse hutkan wanjidan qa tuwe Ikcewicašta en wicaštayatapi un kte cin he icage kta; he Ikcewicašta kin wacinyanpi kta.

13 Hehan woape Wakantanka kin he wicayadapi kin eciyatanhan wowiyuskin owasin wookiye ko on imna niyanpi nunwe, Woniya Wakan towašake kin eciyatanhan woape en nina inicagapi kte cin heon.

11 Mihunkawanji niyepi on awacin manka, wowašte onijupidan, qa wosdonye owasin on oju niyanpi, hecen otoiyohi wahokonyeciciyapi kta oyakihipi.

15 Tuka mihunkawanji, hececa esta waditagya wowapi cicagapi, hecen wicoie wanjikji kiksuye ciyapi kta, Wakantanka towaonšida maqupi kin he eciyatanhan;

16 Ikcewicašta ehna Jesus Messiya taokiye kin wanji he miye kta, Wakantanka tawotanin wašte kin on htawani, qa hecen Ikcewicašta wahdušnapi kin he woiyokipi kta, Woniya Wakan kin on yuwakanpi kin heon.

17 Heon etanhan Jesus Messiya en taku Wakantanka tawa kin on wowinkta mduha.

18 Wicoie wicohan ko on Ikcewicašta anagoptanpi kta e, miye eciyatanhan šni, Messiya taku econ qon hena cajemdate kte šni:

19 Tuka wowapetokeca tanka, qa woyušinyaye econpi, Wakantanka Taniya Wakan towašake kin eciyatanhan, hecen Jerusalem etanhan, qa ohomniyan Illyricum ekta Messiya tawotanin wašte kin omdaka ece.

20 Qa hecen wotanin wašte kin aiciciya oyag uwate, tukten Messiya cajeyatapi kin hetu šni, okinni wicašta tokeca taku ahde kin akan ti wakage kta naceca.

21 Tuka hecen wowapi en kagapi qon; Tona en cajeyatapi šni kin hena wanyakapi kta, qa tona nahonpi šni qon hena iyukcanpi kta.

22 Qa hecen on otakiya ekta ciupi kte cin okitpani mayanpi:

23 Tuka nakaha makoce kin denaen tuktedan omakan šni qa wanna waniyetu ota ekta ciupi kta nina wacin;

24 Heon tohan Spain ekta mde cinhan hehan ekta ciupi kta. Heciya icimani mde cinhan tahepi wanciyakapi, qa ekta ye mayayapi kta awacin manka, tokaheya niyepi kin on cistiyedan imamdeze cinhan.

25 Tuka nakaha Jerusalem ekta mda, tona owotanna un kin hena owicawakiye kte cin heon.

26 Tona Macedonia qa Achaia en yukanpi kin hena, tona wahpanica wacinyanpi Jerusalem ekta yakonpi kin hena taku wicaqupi kta e iyokipipi.

27 Hecon iyokipipi; taku iwicakicazopi kin iyecen unpi nakaeš. Hena taku wakan yuhapi qon en Ikcewicašta opapi hecinhan, taku wicacehpi ekta un kin hena on itkom owicakiyapi kta iyececa.

28 Heon etanhan tohan he mduštan qa waskuyeca kin de hena en awicawecipuspe cinhan, hehan niyepi iyoopteya Spain ekta imdamde kta.

29 Qa ekta ciupi kinhan, Messiya tawotanin wašte woyuwašte woojudan kin yuha wau kta sdonwakiya.

30 Hehan nakaha mihunkawanji ceciciyapi ce, Jesus Messiya Itancan kin caje on, qa Woniya Wakan towaštedake kin on, miye kici Wakantanka nina cemiyeciciyapi kte cin he;

31 Tona Juda makoce kin ekta anagoptanpi šni kin hena etanhan emahdakupi kta, qa Jerusalem ekta wicohtani mitawa kin tona owotanna un kin iyokipi wicaye kte cin heon.

32 Qa hecen Wakantanka tawacin kin eciyatanhan wowiyuskin yuha ekta ciupi, qa niyepi on imagaga miciye kta.

33 Wookiye Wakantanka kin niyepi owasin en nicipi un nunwe.

ROMA OYATE WOWAPI WICOWOYAKE 16.

1 Phebe tawinohtinunyanpi, Cenchrea ekta okodakiciye kin en ookiye wanji hee cantohnake cišipi.

2 He Itancan kin on iyowinyakiyapi kta, tona owotanna un kin iyececa, qa taku on i kin he en token ecayeconpi cin kinhan ecen okiya po. Iye kin wicota owicakiye ca miye nakun omakiya ece.

3 Priscilla qa Aquila kici, Jesus Messiya en mitawašipi kin hena napewicayuza po.

4 Hena e minagi kin on iye tahupi kin ehnakapi, qa hena miye mišnana pidamakiyapi šni, tuka Ikcewicašta ekta okodakiciye kin owasin pidawicayapi.

5 Qa iye tipi kin ohna okodakiciye kin napewicayuza po. Epaenetus waštewadake cin he napeyuza po; Achaia ekta Messiya en un qon tokaheya kin hee.

6 Mary nina ounkiyapi qon he napeyuza po.

7 Andronicus Junia kici mitakuye, qa orn makaškapi qon hena napewicayuza po; yewicašipi kin owicnpeya yuonihanpi, qa mitokapa tanhan Messiya en un qon hena.

8 Amplias Itancan kin en waštewadake cin he napeyuza po.

9 Urbane Messiya en unkitawašipi kin, qa Stachys waštewakidake cin, hena napewicayuza po.

10 Apelles Messiya en yuecepidan kin he napeyuza po. Aristobulus takuwicaye cin hena napewicayuza po.

11 Herodian mitakuye kin napeyuza po. Narcissus takuwicaye cin Itancan en un kin hena napewicayuza po.

12 Tryphena Tryphosa kici Itancan kin on htanipi kin hena napewicayuza po. Persis waštedakapi kin Itancan kin on nina htani kin he napeyuza po.

13 Ruphus Itancan kin on kahnigapi kin, qa iye hunku, nakun mitawa kin, hena napewicayuza po.

14 Asyncritus, Phlegon, Hermas, Patrobas, Hermes, hena, qa tona om unpi hunkawanjin kiciyapi kin hena ko; napewicayuza po.

15 Philologus, Julia, Nereus, iye tawinohtin kici, Olympas, qa hena om tona owotanna un kin hena owasin napewicayuza po.

16 Otoiyohi iiputakapi wakan kin on napekiciyuza po. Messiya taokodakiciye kin napeniyuzapi.

17 Mihunkawanji ceciciyapi ce, tona woonspe onspeniciciyapi qon eciyatanhan šni yuomdecapi, qa wahtani wicayapi kin hena iwanwicayakapi, qa nawicakicipa po.

18 Tona hececapi kin Jesus Messiya Itancan unkiyapi kin wowidag wicaye šni, tuka iye tezipi kin hee, qa wicoie wašte, iapi iyokipi se ececa ko, on wicašta wacin ksape šni kin wicahnayanpi.

19 Niye waanayagoptanpi kin he wicašta owasin sdonyapi. Heon niyepi kin on imduškin. Tuka taku wašte e on yaksapapi kta, qa taku šica on wadupipi kte šni wacin.

20 Unkan kohanna Wookiye Wakantanka kin niye nisihapi kin ihukuya Satan napan kta. Jesus Messiya Itancan unkiyapi towaonšida kin niyepi en nicipi un nunwe.

21 Timotheus mitawaši, qa Lucius, Jason qa Sosipater mitakuye kin, hena napeniyuzapi.

22 Tertius wowapi kin de owa kin he miye, Itancan kin on napeciyuzapi.

23 Gaius wonmakiye ca, okodakiciye owasin hecawicakicon kin, he napeniyuzapi. Erastus otonwe kin en wicašta itancan wan, qa Quartus hunkawanjin kiciyapi wan, hena napeniyuzapi.

24 Jesus Messiya Itancan unkiyapi towaonšida kin niyepi owasin en nicipi un nunwe.

25 Tuwe wotanin wašte mitawa qa Jesus Messiya woyake cin he eciyatanhan niyusutapi kta okihi, wowiyukcan nakaha yuotaninpi kin eciyatanhan, he maka icage cin ehantanhan wicoicage kin en anahmanpi qon;

26 Tuka nakaha yuotaninpi, wicašta wokcanpi tawowapi wakan kin heon, Wakantanka owihanke wanin un, tawoahope kin eciyatanhan, qa oyate owasin wacinyan anagoptanpi kte cin heon oyakapi;

27 Jesus Messiya on etanhan, Wakantanka ecedan ksape cin hee wowitan owihanke wanin kicihan nunwe.