I Corinth 5-8 (I Corinthians)

1 CORINTH WICOWOYAKE 5.

1 Niyepi ekta wawicihahapi yukan keyapi; qa wawicihahapi kin he iyececa Ikcewicašta kin ekta cajeyatapi šni, wanji iye atkuku tawicu kin yuze kte cin.

2 Unkan niye wahannicidapi; on iyonicišicapi kta tuka; hecen tuwe hecon kin niyepi etanhan iyaye yapi kta.

3 Miye mitancan on ekta opeya ciunpi šni, tuka micante on en waun seca, heon en waun kin iyecen wanna mduštan; tuwe hecon kin,

4 Mniniciyapi qa mitoksape duhapi kinhan, Jesus Messiya Itancan unkiyapi caje kin on, qa Jesus Messiya jltancan unkiyapi towašake kin yuha,

5 Wicašta kin he Satan yaqupi kta, ceftpi yutakuni kte šni, hecen Jesus Itancan kin taanpetu kin en nagi kin ni kta.

6 Iniwinktapi kin he wašte šni. Taku on napohyapi kin waniqadan aguyapi ocowasin napohya ece e sdonyayapi šni he?

7 On napohyapi tannike cin ehpeya po; hecen aguyapi teca qa napohye šni yaunpi kta. Messiya wohduze unkitawapi kin he iye kaeš unkiyepi on wošnapi.

8 Heon etanhan wohduze kin en unkopapi kta, on napohyapi wanakaja qa wocanniye wicošice ko on napohyapi kin he unhapi kte šni, tuka wicoowotanna wowicake ko on napohyapi kin hee unkunpi kta.

9 Wowapi en kaken cicagapi; Wiinahmanpi kin om mayanipi kte šni.

10 Tuka wicoicage kin de en wiinahmanpi, qa tona waicucupi kte cin, qa wawicaki sa, qa tona wakagapi ohodapi kin hena e wicawake šni; unkanš wicoicage kin de etanhan tankan dapi kta tuka.

11 Tuka nakaha kaken wowapi cicagapi, tuwe hunkawanjin kiciyapi eciyapi kin he wiinahman, qa waicucukte cin, qa wakagapi ohoda, qa waaie sa, qa witko sa, qa wawicaki sa heca kinhan, kici yaunpi kte šni, ihnuhan kici wayatapi kinhan.

12 Tona tankan unpi kin hena token ecin wicamdaco kta he? tona timahen un kin hena wicadacopi šni he?

13 Tuka tona tankan un kin hena Wakantanka wicayaco ece. Hecen wawicihahapi econ qon he niyepi kin etanhan tankan iyeya po.

1 CORINTH WICOWOYAKE 6.

1 Wicašta wan taku icanšin niyanpi kinhan token ecin owotanna ohanye šni unpi kin en yukcanpi kta e ayaipi he, qa wicašta wacinyan unpi kin en ayaipi šni?

2 Tona wacinyan unpi kin hena wicoicage kin yacopi kta e sdonyayapi šni he? Unkan niyepi wicoicage kin dacopi kta hecinhan, taku iyotan cistinna kin hena iyukcan iyenicecapi šni he?

3 Mahpiya ohnihde kin hena eepi kaeš wicunyukcanpi kta e sdonyayapi šni he? Hecen wiconi kin de en taku hiyeye cin sam iyeya unkokihipi?

4 Heon etanhan wiconi kin de en taku iyukcanpi kte cin duhapi kinhan, tona okodakiciye kin en yuonihanpi šni kin hena iyukcan wicaši po.

5 Iništecapi kte cin heon hepa. Niyepi ekta wicašta ksape ca tuwe hunkawanjitkupi kin wiyukcan okihi kte cin wanica he?

6 Tuka hunkawanjinkiciyapi kin taku iyakicionpapi ece, qa he nakun wacinyanpi šni kin wicitokam.

7 Hecen taku iyayecionpapi kin he šicaya ecanonpi ece. Tokeca e šicaya ecaniconpi kin ayatpaspapi šni he? Tokeca taku nicipi kinhan wacin tanka yecunpi šni he?

8 Tuka niye šicaya ecanonpi, qa wawicayakipi ece, qa he nihunkawanjipi kin.

9 Tona owotanna šni un kin hena Wakantanka tokiconze kin tawapi kte šni e sdonyayapi šni he? Icihnayanpi šni po: wiinahmanpi, qa wakagapi ohodapi sa, qa wawicihahapi econpi sa, qa winyan icidapi kin, qa iwicahu sa,

10 Qa wamanonpi sa, qa waicueukte cin, qa witkopi sa, qa wawicakipi sa, henakiya Wakantanka tokiconze kin tawapi kte šni.

11 Qa niš niyepi kin hunh henicecapi tuka, tuka niyujajapi; tuka niyuwakanpi; tuka niyuowotanpidan, Jesus Itancan kin cajeyan qa Wakantanka unkitawapi Taniya kin on.

12 Taku owasin ecamon kta e iyowinmakiyapi, tuka taku owasin ecamon kta iyecece šni; taku owasin ecamon kta e iyowinmakiyapi, tuka takudan imadake kte šni wacin.

13 Woyute kin he wicatezi kin kicagapi, qa wicatezi kin iš woyute kicagapi, tuka henioza Wakantanka ihang ye kta. Unkan wicatancan kin he wiinahmanpi on kagapi šni, tuka he Itancan kin kicagapi, qa Itancan kin he iš wicatancan kin tawa kta.

14 Unkan Wakantanka wanna Itancan kin najin kiye ca, nakun iye towašake kin on najin unkiyapi kta.

15 Nitancanpi kin hena Messiya huha kin ee sdonyayapi šni he? Hecen Messiya huha kin iwacu, qa witkowinna wan huha wakiye kta he? Hiya hecetu šni.

16 Tuwe witkowinna wan en kici iyaihdaške cin he kici tancan wanjidan, sdonyayapi šni he? Henioza cehpi wanjidan kta ce, eye ciqon.

17 Tuka tuwe Itancan kin en kici iyaihdaške cinhan he iye kici woniya wanjidan.

18 Wiinahmanpi kin nakicipa po. Woahtani wicašta econ kin owasin wicatancan kin itankan un, tuka tuwe wiinahman kinhan he iye tancan kin en waicihtani.

19 Tokeca, nitancanpi kin hena Woniya Wakan Wakantanka nicupi, qa niyepi en un kin he tipi tawa kin hee, qa hecen tawa nihdawapi šni e sdonyayapi šni he?

20 Taku tanka iyopeniyanpi, heon nitancanpi ninagipi ko on Wakantanka yatan po, hena Wakantanka tawa.

1 CORINTH WICOWOYAKE 7.

1 Wowapi en miyecagapi kin he icahtagya, wicašta kin winohinca yutanšni kin he wašte.

2 Tuka wiinahmanpi kte šni e heon etanhan wicašta otoiyohi winohinca tawa hduhe kta, qa winohinca kin iš otoiyohi wicašta hduha nunwe.

3 Unkan wicašta kin iye tawicu kin wowašte ecakicon kta, qa winohinca kin iš iye hihnaku kin nakun ecen ecakicon nunwe.

4 Winohinca kin iš iye tancan kin hduhe šni, tuka hihnaku kin he yuha, qa nakun wicašta kin iš iye tancan kin hduhe šni, tuka tawicu kin he yuha.

5 Otoiyohi tancan ehpekiciyapi šni po, ptecedan hehanyan, napin wicayadapi kinhan heceedan, takudan yute šni qa wocekiye eyapi kin en ocowasin yeniciyapi kte cin heon, kinhan ake napin yahdapi kta, unmana kinhan oicihipi šni kin on Satan iyutanniyanpi kta naceca.

6 Hena hecon cišipi kin e on hepe šni, tuka wahokonciciyapi kin heon.

7 Wicašta owasin miye waun kin iyecen unpi kta wacin, tuka otoiyohi Wakantanka etanhan wicowašake hduha un, wanji decetu, qa wanji iš kaketu

 8 Tuka tona tanšna un qa tona wiwazicapi kin hena, miye waun kin iyecen unpi kte cin he wašte kta, kewicawakiya.

9 Tuka oicihipi šni kinhan kiciyuzapi kta; wakan kiciyuzapi kin he wašte qa wacin itkon kin he šica.

10 Unkan tona kiciyuzapi kin hena kaken wahokouwicawakiya,qa he miye cinka epe šni, Itancan kin he heya; Winohinca iye hihnaku kin ahduštan kte šni.

11 Tuka ahduštan kinhan tanšna un kta, kaeš ake hihnaku qon okiciye kta; qa wicašta kin iye tawicu kin ihnuhan ehpekiye cinhan.

12 Unkan ehake, Itancan kin hee šni, miye cinka hecen epe kta; Hunkawanjin kiciyapi wan winohinca wicada šni kin heca yuhe ca, he kici un iyokipi kinhan, he ihnuhan ehpekiye cinhan.

13 Qa winohinca wan wicašta wicada šni kin heca yuhe ca, he kici un iyokipi kinhan, he iš nakun ehpekiye kte šni.

14 Wicašta wicada šni kin he iye tawicu kin on yuwakanpi, qa winohinca wicada šni un kin he nakun iye hihnaku on yuwakan kagapi. Hecece šni unkanš nicincapi kin ašapapi kta, tuka nakaha hena e wakan.

15 Tuka wicada šni un kin he unma kpagan kinhan hecen kpagan kta. Hena hecece cin en hunkawanjin kiciyapi, qa tawinohtin kiciyapi kin idakapi šni. Wakantanka wookiye en unkicopi.

16 Winohinca, niš taku sdonyaya he, okinni nihihna niyakiye kta. Qa wicašta kin, niš token sdonyakiya he, okinni nitawin niyakiye kta.

17 Tuka otoiyohi token Wakantanka wicaqu qa Itancan kin otoiyohi wicakico kin he iyecen mani nunwe. Hecen okodakiciye owasin en econ wicawaši ece.

18 Tuwe bakihdayapi ecen kicopi hecinhan, bakihdayapi šni kin akite kte šni. Qa tuwe bakihdayapi šni ecen kicopi hecinhan, he bakihdaye kte šni.

19 Bakihdayapi kin he taku šni, qa bakihdayapi šni kin he nakun taku šni, tuka Wakantanka tawoahope opapi kin he tanka.

20 Otoiyohi wicohtani en kicopi kin he en un kta.

21 Wowidake un kin henica ecen nicopi kinhan he ekta ewacin šni wo; tuka tawa niciye kta e oyakihi kinhan he en oyahan de kta.

22 Tuwe wowidake un kin he Itancan kico kinhan, hee Itancan kin on tawa iciya; qa nakun tuwe tawa iciye cin hecen kicopi kinhan he Messiya wowidake tawa kin hee.

23 Tehiya openitonpi, heon wicašta akantu wowidag niyanpi šni nunwe.

24 Mihunkawanji, otoiyohi taku en un hecen kicopi kin he en Wakantanka kici un nunwe.

25 Unkan hokšiwinpidan icahtagya, Itancan kin eciyatanhan woope takudan mduhe šni. Tuka miye owotanna waun kta Itancan kin ionšimakida, hecen token wacin mduze cin owahdake kta.

26 Nakaha wicokakije kin on etanhan de wašte kepce, wicašta kin ecen un kte cin he wašte.

27 Winohinca en iyanihdaška he? etanhan nihduške kta akite šni wo. Qa winohinca en iyanihdaške šni he? winohinca wan akite šni wo.

28 Tuka winohinca duza ešta wayahtani šni, qa hokšiwinna wan hihnaton ešta wahtani šni; tuka hena e wicacehpi ekta wicokakije yuhapi kta; hececa ešta ito itoncipapi.

29 Tuka mihunkawanji kaken epe kta; Wanna tokata ptenyedan; tona winohinca yuhapi kin hena winohinca tonpi šni kin iyecen unpi kte.

30 Tona ceyapi kin hena ceyapi šni kin iyececapi kte; tona iyuškinpi kin hena iyuškinpi šni kin iyececapi kta; qa tona wopetonpi taku yuhapi šni kin iyececapi kta.

31 Qa tona maka kin de wowinyunyanpi kin šicaya yuhapi kin iyececapi kte šni; wicoicage kin de ouncage kin atakuni šni aya.

32 Tuka takudan icante šice šni yaunpi kta wacin. Tuwe tawicu ton šni kin he Itancan taku tawa kin awacin yanka, token Itancan iyokipi ye kta.

33 Tuka tuwe tawicu ton kin he wicoicage kin en taku awacin yanka, token tawicu kin iyokipi ye kta.

34 Qa nakun winohinca hihna ton qa witanšna un kin hena kici akidecece šni. Hihna ton šni kin he Itancan taku tawa kin awacin yanka, tancan nagi ko wakan un kta heon. Tuka hihna ton kin he wicoicage en taku un kin awacin yanka, token hihnaku kin iyokipi ye kta.

35 Tanyan yaunpi kta heon hena hepa. Taku on hmunkapi kin nitokam ewahnake kta e hee šni; tuka wacinktonja wanin, qa wiciyokipi kin en Itancan kin oyapapi kta e heon.

36 Tuka tuwe iye cunwintku tanšna un kin tanyan ecakicon šni kecin, qa wanna wikoška hecinhan, qa he iyecetu kinhan, token cin kinhan ecen econ ešta, wahtani kte šni; wakan kiciyuzapi kte.

37 Tuka tuwe iye cante kin en sutaya un qa tokan tanhan hecon kiyapi šni, qa iye tawacin kin oicihi, qa cunwintku tanšna un hduhe kta e cante mahen iciconze cinhan he tanyan econ.

38 Hecen tuwe kiciyuzapi kin en wicaqu kinhan he tanyan econ, qa tuwe kiciyuzapi kin en wicaqu šni kin he sanpa tanyan econ ece.

39 Winohinca kin tohanyan hihnaku ni un kin hehanyan wicoope kin on kaškapi; tuka hihnaku kin te einhan hehan tawaiciya, tuwe tokeca cin kinhan he hihnaye kta okihi, Itancan kin en un kin hecedan.

40 Tuka ecen yanke cinhan he iyotan wašteya un kta imdukcan, qa Wakantanka Taniya kin he mduha kepce.

1 CORINTH WICOWOYAKE 8.

1 Unkan taku wakagapi wakiyušnapi kin icahtake, owasin wookahnige unhapi sdonunkiyapi. Wookahnige kin he tankaicidapi kaga, tuka wacantkiyapi kin he tanka icahya.

2 Tuwe taku sdonya kecin kinhan he nahahin sdonye kte cin iyecen takudan sdonye šni.

3 Tuka tuwe Wakantanka waštedake cinhan Wakantanka he iye sdonya.

4 Taku wakagapi wakiyušnapi kin yutapi kin he icahtake, wakagapi maka akan un kin he taku šni sdonunyanpi, qa Taku Wakan wanjidan, hecedan yukan.

5 Taku wakan eciyapi kin mahpiya ckta qa niaka akan yukan ešta; taku wakan ota, qa itancan kiyapi kin nakun ota keyapi ece:

6 Tuka unkiye, Taku Wakan wanjidan Ateyapi kin hee unhapi, he etanhan taku owasin u, qa he en unkiye unyakonpi; qa Jesus Messiya Itancan kin wanjidan, he on taku owasin un qa he eciyatanhan unkiyepi.

7 Tuka owasin hecen okahnigapi šni. Wanjikji anpetu dehanyan wakagapi sdonyapi, taku wakagapi wakiyušnapi kin iyacinyan yutapi ece; hecen nagi suta šni kin hena ašamyapi.

8 Taku untapi kin eciyatanhan Wakantanka iyokipi unyanpi šni; wauntapi kinhan heon etanhan sanpa unwaštepi šni, qa wauntapi šni kinhan heon sanpa unšicapi šni.

9 Tuka ihnuhan wawoyakihipi kin de tona wašake šni un kin hena en wonahnaye kte cin.

10 Niye osdonya yaun kin, wakagapi tipi kin en wota idotanke cin tuwe wanniyake cinhan, wicašta nagi wašake šni un kin he taku wakagapi wakiyušnapi kin yuta onspeyakiye kte šni he;

11 Hecen nihunkawanji wašake šni un kin, on Messiya te cin he ihangyapi kta, niye wasdonyaye cin heon etanhan?

12 Tuka hunkawanjin kiciyapi kin en hecen wayantanpi, qa iye nagipi kin wašake šni kin nagiyeyayapi eca, Messiya en wayahtanipi ece.

13 Heon etanhan woyute kin mihunkawanji wahtaniye cinhan, ohinniyan tado wate šni waun kta, okinui mihunkawanji wahtaniwaye kta.