I Corinth 1-4 (I Corinthians)

PALOS CORINTH OYATE WOWAPI WICAKICAGE CIN: TOKAHEYA KIN.

WICOWOYAKE 1.

1 Palos Wakantanka tawacin kin eciyatanhan, Jesus yewicaši kin heca e kahnigapi kin he, qa Sosthenes hunkawanjinunyanpi kici,

2 Wakantanka taokodakiciye Corinth ekta un qa Jesus Messiya on ecepidan kta, wakan wicakahnigapi kin hena eepi, qa tona makoce otoiyohi en Jesus Messiya iš iyepi kin Itancan kiyapi, qa unkiš eya Itancan unkiyapi caje kin hoyeyakiyapi kin wowapi unnicagapi.

3 Wowaonšida, wookiye ko, Wakantanka Ateunyanpi, qa Jesus Messiya Itancan kin etanhan niyepi en nicipi un nunwe.

4 Ohinniyan niyepi kin on Wakantanka mitawa wopida ewakiya, Wakantanka towaonšida Jesus Messiya eciyatanhan nicupi kin heon;

5 Taku henana owasin on, iye en, wijica nicagapi, wicoie owasin qa wosdonye owasin on.

6 Hecen niyepi kin en Messiya tawoyaatanin kin yusutapi.

7 Qa hecen wowašte wanjidan aokpaniyan yaunpi šni, qa Jesus Messiya Itancan unkiyapi ihdutanin kte cin he ape dukanpi.

8 He owihanketa hehanyan iyanionpepica šni niyusutapi kta, Jesus Messiya Itancan unkiyapi taanpetu kin etu.

9 Wakantanka wacinyepica, iye Cinhintku Jesus Messiya Itancan unkiyapi kin takodakiciyapi tawa kin en nicopi.

10 Mihunkawanji, Jesus Messiya Itancan unkiyapi cajeyan ceciciyapi ce; owasin okonwanjidan oie yetonpi, qa yuomdecapi wanin yaunpi kta, qa wicotawacin eca wanjidan wiyukcanpi ko wanjidan tanyan onspe yaunpi kte.

11 Mihunkawanji, Chloe etanhanpi kin hena omakiyakapi, niyepi kin en woakinica yuke cin he.

12 Hecen kaken epe; Niyepi otoiyohi, Palos opeya waun, qa, Apollos opeya waun, qa, Cephas opeya waun, qa Messiya opeya waun ce, ehapi ece.

13 Messiya yukinukan ehnakapi he? niyepi kin on Palos cansusbeca kin en okatanpi he? kaeš Palos caje on baptem nicupi he?

14 Wakantanka wopida ewakiya, enitanhanpi tuwedan baptem waqu šni, tuka Crispus qa Gaius heniyoza:

15 Tuwedan, miye micaje on baptem wicawaqu, keye kte šni heon.

16 Qa nakun Stephanas tiyohnaka kin baptem wicawaqu, qa tuwe tokeca baptem waqu kinhan sdonwaye šni.

17 Baptem wicawaqu kta e on Messiya ye maši šni, tuka wotanin wašte omdake kte cin heon; wicoksape iapi kin ohna šni, okinni Messiya cansusbeca tawa kin taku šni yapi kta.

18 Cansusbeca oyakapi kin he tona ihdutakunipi šni kin en witkotkoya iapi kin hee, tuka unkiyepi tona ni unyanpi kin en Wakantanka towašake kin hee.

19 Kaken wowapi en kagapi; Tona wacin ksapa woksape tawa kin taku šni waye kta, qa tona okahnigapi kin hena wookahnige tawa kin mdutakuni kte šni ce.

20 Wacin ksape cin tokiya tin he? wowapi kage cin heca tokiya un he? wiconi kin de en wiyukcan kin tokiya un he? Wakantanka wicoicage kin de wicoksape kin yuwitkotko šni he?

21 Hecen Wakantanka toksape kin on, wicoicage kin de wicoksape eciyatanhan Wakantanka sdonyapi šni qehan, wowahokonkiye wowitkotkoke cin on tona wacinyanpi kinhan hena ni wicaye kta Wakantanka iyokipi.

22 Juda oyate kin wowapetokeca dapi, qa Helenes oyate kin wicoksape akitapi ece.

23 Tuka unkiyepi kin Messiya cansusbeca en okatanpi kin he unknyakapi; he Juda wicašta kin ekta wonahnaye qa Helenes wicašta kin ekta witkotkoya iapi kin hee.

24 Tuka tona wicakahnigapi, Juda qa Helenes wicašta kin hena ekta, Messiya Wakantanka towašake qa Wakantanka toksape kin hee.

25 Wakantanka taku tawa witkotkoke cin he wicašta kin isanpa woksape; qa Wakantanka towašake šni kin he wicašta kin isanpa wowaške.

26 Mihunkawanji, nicopi kin he wandakapi, wicacehpi eciyatanhan wacin ksapa ota šni, wašaka ota šni, qa wicašta okinihin otašni.

27 Tuka wicoicage kin en taku witkotkoke cin he Wakantanka kahniga, on taku ksape cin wišten ye kta; qa wicoicage kin en taku wašake šni kin hena Wakantanka kahniga, on taku wašake cin wišten ye kta.

28 Qa taku wicoicage kin en okinihan šni un kin he Wakantanka kahniga, qa taku un šni kin hena ko, on taku un kin yutakuni kte šni.

29 Hecen iye itokam wicacehpi owasin ihdatan kte šni.

30 Tuka iye eciyatanhan Jesus Messiya en unyakonpi; he unkiyepi on Wakantanka eciyatanhan woksape, qa woowotanna, qa woyuecedan, qa wokajuju ikicaga.

31 Hecen wowapi qon iyececa; Tuwe iwinkta kinhan Itancan kin on iwinkta kta.

1 CORINTH WICOWOYAKE 2.

1 Unkan mihunkawanji, ekta ciipi qehan, wicoie qa wicoksape oiyokipi kin yuha wai šni, tuka Wakantanka tawoyatanin kin ociciyakapi.

2 Niyepi kin ekta takudan sdonwaye kte šni e miciconza, Jesus Messiya hecedan, qa he cansusbeca kin en okatanpi.

3 Unkan wašake šni, wokokipeya nina macancan cicipi waun.

4 Qa mioie, qa womdake cin hena wicašta toksape wicoie oiyokipi kin en un šni, tuka Woniya wayuotanin, qa wowašake kin en un.

5 Hecen wicayadapi kin he wicašta wicoksape tawa kin en ahe kte šni, tuka Wakantanka towaške kin en.

6 Tuka tona ksapapi kin hena ekta woksape unkoyakapi ece; tuka wicoicage kin de en wicoksape kin hee šni, qa wicoicage kin de en wicaštayatapi toksape kin hee šni, hena atakuni šni aya.

7 Tuka wowiyukcan en Wakantanka toksape kin he unkoyakapi ece; eqe nahmanpi qon, woicage šni itokam wowitan unkitawapi kte cin heon, Wakantanka wakiconze ciqon.

8 He wicoicage kin de en wicašta itancanpi kin tuwedan sdonye šni; sdonyapi unkanš Wowitan Itancan kin cansusbeca en okatanpi kte šni tuka.

9 Tuka wowapi qon iyececa; Tona Wakantanka waštedakapi kin taku wieakiciyuštan kin he wicišta kin tohinni wanyake šni, qa wicanoge on nahonpi šni, qa wicašta cante kin mahen iyohpaye šni.

10 Tuka hena Wakantanka iye Taniya kin eciyatanhan unkokiyakapi; Woniya kin he taku owasin iyukcan, Wakantanka wošbe tawa kin sdonya.

11 Wicašta kin ekta tuwe taku wicašta tawa kin sdonya he, wicašta taniya iye mahen un kin hee sdonkiya. He iyecen taku Wakantanka tawa kin tuwedan sdonye šni, tuka Wakantanka Taniya kin hecedan.

12 Unkan unkiye wicoicage kin de en wicoksape kin he unkicupi šni; tuka Wakantanka eciyatanhan Woniya Wakan kin he unkicupi, hecen taku Wakantanka iyunwin codan unqupi kin hena sdonunyanpi kta.

13 Qa hena unkoyakapi, wicašta wicoksape woonspe wicoie kin eciyatanhan šni, tuka Woniya Wakan woonspe tawa kin eciyatanhan, hecen wicoie wakan kin wicašta wakan iyukcanwicunyanpi ece.

14 Tuka wicacehpi wicašta kin he Wakantanka Taniya taku tawa kin icu šni, hena taku witkotkoke dake ca okahniga okihi šni, hena wakanyan iyukcanpi nakaeš.

15 Tuka tuwe wakanyan un kin he taku owasin iyukcan, tuka iye kin tuwedan on yukcanpi šni.

16 Itancan tawacin kin tuwe he iyukcan he, hecen onspekiye kta. Tuka unkiye Messiya tawacin kin unhapi.

1 CORINTHWICOWOYAKE 3.

1 Unkan mihunkawanji, miš wicašta wakanpi kin iyecen ociciyapi kta owakihi šni, tuka wicacehpi wicašta kin heca, qa Messiya en hokšiyopa kin iyececa.

2 Pteasanpi yatke ciciyapi, qa waconica kin he cicupi šni; he ehan nahahin he oyakihipi šni, qa dehan nahahin nakun oyakihipi šni.

3 Nahahin wicacehpi wicašta kin henicapi. Niyepi ekta winawizipi, qa wakinicapi, qa yuomdecapi yukan hecinhan, wicacehpi kin henicapi, qa wicašta akantu iyecen mayanipi šni he?

4 Wanji, Palos opeya waun, qa wanji iš, Apollos opeya waun, eye cinhan, wicacehpi wicašta kin henicapi šni he?

5 Palos he tuwe, qa Apollos he tuwe he; wowidake unpi kin hecapi, on wicayadapi, otoiyohi Itancan kin wicaqu kin iyececa?

6 Miye wowaju, Apollos mini akaštan, qa Wakantanka icahya.

7 Tuwe woju kin he taku šni, qa tuwe mini akaštan kin kin he nakun, tuka Wakantanka waicahye cin hee tanka

8 Tuwe woju qa tuwe mini akaštan kin hena okonwanjipidan; otoiyohi iye tohtani kin iyacinyan iyunwin icupi kta.

9 Wakantanka kici htanipi kin hena unkiyepi; Wakantanka tamaga, qa Wakantanka tipi kage cin he niyepi.

10 Wakantanka towaonšida maqupi kin eciyatanhan wicašta ticaga ksape cin iyecen, taku ahehde kin ewahde, qa he akan wicašta tokeca tipi kaga; tuka otoiyohi token ticage cin he on waktaya un kte.

11 Tuka ahehde kin tokeca tuwedan ehde kta okihi šni, taku ehdepi kin hecedan, Jesus Messiya hee.

12 Unkan tuwe ahehde kin de akan mazaskazi, qa mazaska, qa inyan okitanin, qa can, qa peji, qa cedi en kage cinhan,

13 Otoiyohi ohan kin atanin kta; anpetu kin he yuotanin kta, peta on yuotaninyan aye kta; qa peta kin otoiyohi ohan kin he taku kin iyukcan kta.

14 Tuwe ticage cin en ohan kin sutaya un kinhan he wokajuju icu kta.

15 Qa tuwe ohan kin huhnage cinhan he iwahpanice kta, tuka iye qe peta kin etanhan iyecen niyanpi kta.

16 Wakantanka tipi tawa kin he niyepi, qa Wakantanka Taniya kin onitipi kin he sdonyakiyapi šni he?

17 Tuwe Wakantanka ti kin ašamye cinhan he Wakantanka ihangye kta. Wakantanka tipi kin he wakan, qa he niyepi.

18 Ihnuhan tuwe icihnaye cinhan. Tuwe niyepi ekta wicoicage kin de en ksapeicida kin he witkotkoke icicaga nunwe; hecen ksape kta.

19 Wicoicage kin de en taku woksape kin he Wakantanka witkotkoke daka. Kaken wowapi en kagapi; Wicašta ksape cin hena iye wohnaye tawapi kin on wicayuza ece.

20 Qa ake, Wicašta ksape cin tawacinpi kin hena taku šni e, Itancan kin sdonya ce.

21 Hecen tuwedan wicašta kin on iwinkta kte šni. Taku owasin nitawapi.

22 Palos, qa Apollos, qa Cephas, qa wicoicage kin, qa wiconi, qa wiconte, qa taku nakaha un kin, qa taku u kte cin hena owasin nitawapi;

23 Qa Messiya tawa niyanpi, qa Wakantanka Messiya tawa ya.

1 CORINTHWICOWOYAKE 4.

1 Wicašta kin kaken ecanunkinpi kta, Messiya iwicadake cin qa Wakantanka tawowiyukcan awanyakapi kin heuncapi.

2 Nakun tona waawanyakapi un kin hena owotanna ohanyanpi kta iyececa wicadakapi ece.

3 Tuka mayadacopi, qa wicašta akantu mayacopi ešta, he taku šni wadaka; qa nakun mihdaco šni.

4 Miye cinka takudan sdonwakiye šni, tuka heon owotanna mihdawa šni; tuka tuwe mayukcan kin Itancan kin hee.

5 Hecen iyehantu šni kin itokam takudan yacopi šni po, Itancan kin he hi šni kin hehanyan; he iye kin taku otpaza en nahmanpi qon aiyoyam ye kta, qa wicocante awacinpi kin yuatanin kta; unkan hehan otoiyohi Wakantanka eciyatanhan idowanpi kta.

6 Mihunkawanji, niyepi on etanhan hena hecen Apollos kici miye imihdacin; hecen unkiyepi kin on wowapi en kagapi kin isanpa kecanwicayakinpi kte šni onnispepi kta, qa hecen otoiyohi on wahannicidapi kte šni.

7 Tuwe hecen iyotan nicaga he? qa taku nicupi šni kin tukte e duha he? Qa nicupi kinhan tokeca nicupi šni kin iyecen on iniwinkta he?

8 Nakaha winipipi; nakaha winijicapi; unkiyepi unkicunonpa tanhan wicaštayatapi yaunpi: Unkan wicaštayatapi yaunpi wacin, hecen niyepi kici wicaštayatapi unyakonpi kta tuka.

9 Miš kaken wacin mduza; Wakantanka yewicašipi unkiyepi kin ehake taninyan eunhdepi, wiconte iyacopi kin iyececa; hecen wicoicage qa mahpiya ohnihde cin, qa wicašta kin en woiwanyake kin he unkiyepi kta.

10 Messiya on wiuntkotkopika, tuka niye Messiya en yaksapapi. Unkiye waunšakapi šni, tuka niye wanišakapi. Unkiye unyuonihanpi šni, tuka niye nicinihanpi.

11 Qa nakun anpe dehan wotekteunhdapi, qa iunpuzapi, qa tancounkapidan, qa unkaštakapi, qa tuktedan tinsadan unyakonpi šni;

12 Qa hununkitapi, unnapepi kin on htaunnipi. Unkaiapi keš wicunyawaštepi; šicaya unkuwapi keš wacin untankapi;

13 Unyašicapi keš ceunkiyapi ece. Wicoicage en watušekšeca kin iyecen unkagapi, qa anpe dehanyan taku owasin etanhan taku kahin ehpeyapi kin hecen unyawapi ece.

14 Ištenciyapi kta heon hena hecen wowapi wakage šni, tuka micinca waštewicawakidake cin iyecen wahokonciciyapi.

15 Messiya en waonspekiyapi kektopawinge wikcemna duhapi ešta, ateyapi ota duhapi šni; Jesus Messiya en wotanin wašte on cinca cicagapi.

16 Heon etanhan ceciciyapi ce, ecen omicipa po.

17 Heon niyepi kin ekta Timotheus ye waši, he nakun micinca hokšincantkiyapi,qa Itancan kin en wacinyepica, he mitacanku Messiya en un kin kiksuye niyanpi kta, ohinniyan okodakiciye otoiyohi en waonspewakiye cin iyececa.

18 Ekta ciupi kte šni se ececa, heon wanjikši wahanhanicidapi.

19 Tuka ecadan ekta ciupi kta, Itancan kin iyokipi kinhan, qa tona wahanicidapi token eyapi kin hee šni, tuka taku okihipi kin he sdonwaye kta.

20 Wakantanka tokiconze kin he wicoie en ahe šni, tuka wowašake en han.

21 Cansakadan yuha ekta ciupi kta, kaeš wacantkiyapi cante ahbayedan ko hduha wau kta, unmu tukte yacinpi he?