Ohanyanpi Qon (Acts) 10-12

OHANYANPI QON WICOWOYAKE 10.

1 Unkan Cæsarea en wicašta wan Cornelius eciyapi, akicita opawinge obe wanjidan, Italike eciyapi, kin he en itancan kin hee;

2 Wicašta wakinihan, qa Wakantanka kokipeyahan un, tiyohnaka kici; qa oyate kin nina cantewicakiya, qa ohinniyan Wakantanka cekiya un ece.

3 He qe anpetu wan en, napcinwanka apa hehantu, wowanyake wan en, Wakantanka taohnihde wan en hi, qa, Cornelius, eciye cin he taninyan wanyaka.

4 Unkan he opahta yanke ca inihan qa; Itancan taku he? eya. Unkan iš ito heciya; Wocekiye nitawa qa wacantkiya oyahande cin he Wakantanka itokam kiksuyapi.

5 Heon nakaha Joppa ekta wicašta ye wicaši, qa Simon Inyan eciyapi kin he kico wo.

6 Wicašta wakpanyan wan Simon eciyapi ti kin miniwanca kahda han, he kici yanka. He token ecanon kte cin oniciyake kta ce.

7 Unkan mahpiya ohnihde Kornelios okiye cin he wanna kihda, hehan tiawanyag wicakiye cin nom, qa akicita wašte ohinniyan tankiyadan wicahduhe cin wanjidan, hena wicakico;

8 Qa hena taku kin owasin owicakiyake cehan, Joppa ekta ye wicaši.

9 Unkan icimanipi, qa ihanhanna wanna otonwe kin ikiyadan, hehan Inyan tipi kin akan wocekiye eya iyaya, wanna wiyotanhe cin hehantu.

10 Nina wotektehda, qa wote kta cin, tuka taku yutapi wiyeya ehnakapi kin he icunhan wokiksuye šni wan ahinhpaya.

11 Unkan mahpiya kin yuzamnipi e wanyaka, qa heciyatanhan taku wan mininuha ska tanka iyececa, oise topa kin iciyakaškapi he kutkiya u, qa maka kin ahe kiyapi.

12 He ohna taku maka akan wahutopa ocaje owasin, qa woteca, qa watutka, qa mahpiya okinyanpi kin.

13 Unkan wicaho wan tanin qa; Inyan, najin, qa kte, qa yuta wo, eciya.

14 Tuka iš; Itancan, hecetu šni, tohinni taku ikceka qa ašape cin wate šni ce, eya.

15 Unkan ake icinonpa wicaho kin tanin qa; Taku Wakantanka pakinte cin he ikceka eciye šni wo, eya.

16 Yamni akihde hecen econpi, qa hehan taku kin he mahpiya kin ekta akiyahdapi.

17 Unkan Inyan wowanyake wanyake cin he taku kin iyukcan šni un, he icunhan, ito wicašta Cornelius u wicaši qon hena Simon ti kin akitapi, qa wanna tiyopa kin itokam en hinajinpi;

18 Qa panpi qa; Simon Inyan eciyapi den yanka he, eya iwicawangapi.

19 Wowanyake kin he Inyan awakicin un kin he icunhan, Woniya Wakan kin heciya; Wanyaka wo, wicašta yamni onidepi.

20 Heon najin qa kun hde ca, takudan cetunhda šni om ya wo, hena u wicawaši ce, eya.

21 Hehan Inyan wicašta Cornelius u wicaši qon hena ekta kun wicai, qa; Tuwe ayakitapi kin he miye ce; taku on yahipi he? ewicakiya?

22 Unkan iš heyapi; Cornelius akicita opawinge wicayuhe cin, wicašta owotanna, qa Wakantanka kokipeyahan un he Juda oyate kin iyuhpa oyakapi, hee mahpiya ohnihde wakan wan okiye ca, tuwe nihuwe u wicaši, qa iye ti kin ohna nioie kin nahon kta, keya ce, eyapi.

23 Hehan tin u wicaši qa won wicaya. Unkan ihanhanna Inyan hena om hda, unkan Joppa etanhan hunkawanjinkiciyapi kin wanjikji opapi.

24 Unkan ihanhanna qehan Cæsarea iyohipi. Unkan Cornelius tona takuwicaye ca koda wicaye cin hena wicakico, qa om ape yanka.

25 Unkan Inyan en u, hehan Cornelius itkokim ye ca, siha kin en makata ehpeiciye ca cekiya.

26 Tuka Inyan iš najin kiye ca; Najin wo, miš eya wimacašta ce, eya.

27 Qa kici wohdaka ecen tipi kin timahen i, qa wicota mniciyapi kin wanwicayaka.

28 Hehan hewicakiya; Tuwe Juda wicašta kin heca e oyate tokeca etanhan wan kici un, qa en hi kin he hecetu šni e sdonyayapi, tuka tuwedan wicašta ikceka qa ašape cin ewakiye kte šni he Wakantanka sdonye makiya.

29 Heon etanhan mahuwe ipi kin ecen wacetunhda šni hibu, heon taku on miyecopi hecinhan he iciwangapi, eya.

30 Unkan Cornelius heya; Wanna ehantanhan anpetu topa he ehan, qa nakaha oape kin dehantu, wote šni waun, qa napcinwanka ape cin hehan wati kin en cekiya waun; unkan wicašta wan wokoyake wiyatpa koyake cin he en mahinajin;

31 Qa, Cornelius wocekiye nitawa kin he nahonpi, qa taku wacantkiya ecanon kin he Wakantanka itokam kiksuyapi ce.

32 Heon Joppa ekta tuwe ye ši, qa Simon Inyan eciyapi kin he kico wo; he wicašta wakpanyan wan, Simon eciyapi, ti kin miniwanca kahda he cin he ohna yanka. He hi kinhan taku eniciye kta ce, eya.

33 Heon kohanna wahociya; qa yahi kin he tanyan ecanon. Heon nakaha unkiyepi kin owasin Wakantanka itokam unkanpi, taku Wakantanka eye niši kin owasin naunhonpi kta ce

34 Hehan Inyan i hdukawa qa heya; Awicakehan Wakantanka wicašta itohnake kin iwanyake šni e imdukcan.

35 Tuka oyate otoiyohi en, tuwe kokipeyahan un, qa owotanna ohanye cin he waštedaka ece.

36 Jesus Messiya kin, owasin en Itancan kin hee, he eciyatanhan wicoie Israel cinca kin wookiye iwahowicayapi qon.

37 Wicoie kin he sdonyayapi, Juda makoce kin owancaya oyakapi, Galilee etanhan, Johannes baptem oyake cin hehan tanhan.

38 Jesus Nazareth etanhan kin he Wakantanka sdakiya, Woniya Wakan wowašake ko on; qa he qe taku wašte econ iyaya ece, qa tona taku wakanšica wicayuhnaškinyan kin hena okiziwicaya ece, Wakantanka kici un kin heon.

39 Qa taku Juda oyate tamakoce, qa Jerusalem ekta econ qon owasin unyaotaninpi ece. He iye kin ktepi, qa can wan akan otkeyapi qon.

40 Tuka anpetu iciyamni qehan Wakantanka piya icahkiye ca, taninyan wicakipazo.

41 Oyate kin iyuhpa šni, tuka tona otokaheya ekta Wakantanka wicakahnige ciqon hena en, waayataninpi kin unkiyepi, wiconte etanhan piya ikicage cin iyohakam kici wauntapi qa waunyutkanpi ece.

42 Unkan oyate kin wahokonwicakiye unšipi qa nipi tapi ko en wayaco Wakantanka kage cin he iye ce, eya oyake unšipi.

43 He wicašta wokcan kin owasin oyakapi; iye caje kin eciyatanhan tuwe wicada kinhan woahtani wokajuju kin yuhe kta ce.

44 Wicoie kin dena Inyan ecen eye cin he icunhan, tona oie kin nahonpi owasin Woniya Wakan kin awicahinhpaya.

45 Unkan bakihdayapi kin etanhanpi tona wicadapi qon, tona Inyan kici hipi kin hena yušinyayapi, Woniya Wakan wicaqupi ece kin he Ikcewicašta iyepi kaeš awicakaštanpi kin heon etanhan.

46 Wicaceji tokeca on iapi, qa Wakantanka yatanpi kin he nahonpi. Hehan Inyan waayupte ca;

47 Tuwe mini tehinda okihi, qa hena baptem wicaqupi kte šni he; hena eqe unkiyepi kin iyecen Woniya Wakan kin icupi ce? eya.

48 Hehan Itancan caje kin on baptem wicaqu wicaši. Hehan anpetu ota en yanke kta e icekiyapi.

OHANYANPI QON WICOWOYAKE 11.

1 Unkan yewicašipi kin hunkawanjinkiciyapi ko, Juda makoce kin en yakonpi qon, Ikcewicašta Wakantanka oie icupi kin he nahonpi.

2 Unkan Inyan Jerusalem en hdi kin, hehan tona bakihdayapi kin etanhanpi qon he kici akinicapi;

3 Qa heyapi, Wicašta bakihdayapi šni kin heca en wicayai, qa om wayata ce.

4 Hehan Inyan wohdake ca owasin ecekcen owicakiyake ca heya;

5 Joppa otonwe kin en, wocekiye eya waun, unkan wokiksuye šni wan en taku wowanyake wanmdaka, taku wan mininuha ska tanka iyececa, oise topa kin iciyakaškapi mahpiya kin eciyataiihan kun aupi, qa miye ekta mahiyohi.

6 He opahta manke ca awacin waun, unkan maka akan taku wahutopa, qa wamanica, qa watutka, qa mahpiya okinyanpi kin wanmdaka.

7 Unkan wicaho wan; Inyan najin, qa kte, qa yuta wo, emakiye cin he nawahon.

8 Tuka miš; Itancan hecetu šni, taku ikceka qa ašape cin tohinni mii kin ohna iyaye šni, epa.

9 Tuka mahpiya kin eciyatanhan wicaho kin ake amayupta; Taku Wakantanka pakinte cin he ikceka eciye šni wo, eya.

10 Yamni akihde hecen econpi, qa hehan mahpiya kin ekta owasin hdokiyahdapi.

11 Unkan ito wicašta yamni, Cæsarea etanhan miye ekta mahiyu šipi qon, hena wanna tipi ohna waun kin itokam hinajinpi.

12 Hehan Woniya Wakan kin iš; Takudan cetunwicahda šni hena om yahde kta ce, emakiya. Unkan hunkawanjinkiciyapi kin dena šakpe om imdamde ca wicašta qon he ti kin en unkipi.

13 Hehan iye, token mahpiya ohnihde wan iye ti kin en hinajin wanyake ciqon he unkokiyakapi; hee kin kaken eciya; Toppa ekta wicašta ye wicaši, qa Simon Inyan eciyapi kin he u ši wo.

14 He taku eniciye kte cin on yani kta, qa nakun tiyohnaka nitawa kin owasin, eya ce, eya.

15 Unkan miš tokaheya iwae cin, hehan Woniya Wakan kin awicahinhpaya, tokag ehan unkiyepi kin en hi qon iyececa.

16 Hehan Itancan oie qon weksuya; Awicakehan Johannes mini on baptem wicaqu, tuka niyepi km Woniya Wakan on baptem nicupi kta ce, eye ciqon he.

17 Hecen unkiye Jesus Messiya Itancan kin wicaundapi, Wakantanka taku unqupi qon he iyecen wicaqu kinhan, miš matuwe he, Wakantanka anawapte kta owakihi he?

18 Hena oie kin nahonpi unkan inina yukanpi qa Wakantanka yatanpi qa heyapi; Awicakehan Ikcewicašta on nipi kta e ihduecetupi kin Wakantanka wicaqu ce.

19 Unkan Stephanos te cin on šicaya wicakuwapi qon, heon enanakiya iyewicayapi kin hena Phenice, qa Cyprus, qa Antioch ekta ipi, qa wicoie kin Juda oyate kin ecedan owicakiyakapi.

20 Unkan hena wanjikji Cyprus qa Cyrene wicašta kin heca, hena Antioch en hipi qehan, Helenes wicašta kin wowicakiyakapi, qa Jesus Itancan kin oyakapi.

21 Unkan Itancan nape kin hena om un, qa wicota wicadapi, qa Itancan kin ekta ihduhomnipi.

22 Hena taku kin okodakiciye Jerusalem en un kin nogepi kin en otanin, hehan Barnabas Antioch ekta i kta e ye šipi.

23 He ekta i, unkan Wakantanka towaonšida kin wanyake cehan iyuškin, qa cante kin ocowasin on Itancan kin opapi kta e owasin iwahokonwicakiya.

24 He wicašta wašte, qa Woniya Wakan wacinyanpi ko on ojudan. Unkan wicota Itancan kin opapi.

25 Hehan Barnabas Saul akite kta e Tarsos ekta iyaya. He iyeya, unkan Antioch en ahdi.

26 Qa waniyetu mdoketu ahna, tipi wakan kin en mniciyapi, qa oyate ota waonspewicakiyapi; unkan Antioch ekta, waonspewicakiyapi kin tokaheya Christian ewicakiyapi.

27 Unkan anpetu kin hena en, wicašta wokcan Jerusalem etanhan Antioch ekta hipi.

28 Hena wanji, Agabus eciyapi kin he inajin, qa maka kin owancaya wicaakihan wan tanka u kta e Woniya Wakan kin eciyatanhan oyaka. Unkan he Claudius Cæsar taanpetu kin en ecetu.

29 Unkan hehan waonspewicakiyapi kin otoiyohi, token okihipi kin, hecen hunkawanjitkupi Juda makoce kin en yakonpi kin, wawokiyapi kin wicaqupi kta e konzapi.

30 Hecen econpi, qa Barnabas qa Saul kici napepi kin on hunka wicayapi kin wicakai wicašipi.

OHANYANPI QON WICOWOYAKE 12.

1 Unkan hehan Herod wicastayatapi kin okodakiciye kin wicakiyuše kta e nape yekiya;

2 Qa Jakob Johannes cincu qon he mazasagye on kte.

3 Qa he Juda oyate kin iyokipipi e wanyake cehan, Inyan nakun yuze kta aya; aguyapi on napohyapi codan anpetu kin he ehan.

4 Unkan he iyahpaye cehan, wicakaška tipi kin en ehnake ca akicita ake šakpe awanyag wicasi, wošnapi kin enakiyapi kinhan oyate kin ekta tankan au kta kecin.

5 Hecen Inyan wicakaška tipi kin ohna awanyakapi; unkan on okodakiciye kin Wakantanka nina cekiyapi.

6 Unkan Herod wanna tankan au kta hehan, hauyetu kin he en Inyan akicita nom, unma itan anokatanhan ištinma wanke ca, maza icicahiha nom on iyakaškapi, qa tiawanyag kiyapi kin hena tiyopa kin itokam wicakaška tipi kin awanyakapi.

7 Unkan inyun, Itancan taohnihdeye cin en hi, qa ojanjan wan wicakaška tipi kin en iyoyanpa; unkan Inyan cuwi kin en ape ca najin kiye ca heya; Kohanna najin wo. Unkan maza icicahiha kin nape kin etanhan hinhpaya.

8 Hehan mahpiya ohnihde kin; Ipihdag kiton qa hanpokihan wo, eciya. Unkan iš ecen econ. Hehan; Šina hdowin qa miyahna u wo, eciya.

9 Hehan tankan ya; unkan iš eya ihakam ye ca, mahpiya ohnihde taku ecakicon kin he wicakapi kin sdonye šni; tuka wowanyake wan wanyaka kecin.

10 Unkan wicakaška tipi tokaheya qa iyokihe kin etanhan hinanpapi, hehan maza tiyopa kin en iyohipi, he otonwe kin ekta iyahde, he iye cinka wicakiyuhdog iyaya. Unkan tankan yapi, qa canku wanjidan ihunnipi, hehan mahpiya ohnihde kin ehpeya kihda.

11 Unkan Inyan kiksuya hinhda qa heya; Nakaha awicakehan Itancan kin ohnihde tawa kin u ši, qa Herod nape kin, Juda oyate apepi ko, owasin etanhan emahdaku e sdonwakiya ce.

12 Unkan he awakicin qehan, Johannes Markos eciyapi kin, he hunku Mary ti kin ekta i, hen wicota mniciyapi, qa cekiya yukanpi.

13 Unkan Inyan tipi tiyopa kin kabubu yanke cin he icunhan, wicinyanna wan Rhoda eciyapi, he ekta wanahon i:

14 Qa Inyan ho kin iyekiye cehan, wowiyuškin on tiyopa yuhdoke šni, tuka inyang hdicu qa, Inyan tiyopa kin itokam najin e oyaka.

15 Unkan, Niyuhnaškinyanpi ce, eciyapi. Tuka iš hecen eya kitan. Hehan, Mahpiya ohnihde tawa kin hee ce, eyapi.

16 Tuka Inyan katinyan tiyopa kin kabubu yanka. Unkan yuhdokapi qa wanyakapi hehan yušinyayapi.

17 Tuka inina yukanpi kta e namwicakicawin, qa token on Itancan kin wicakaška tipi kin etanhan tankan hiyu kiye cin he owicakiyaka. Qa heya, Jakob qa hunkawanjinkiciyapi kin hena oie kin owicakiyaka po. Hehan tankan kinape ca tokan iyaya.

18 Unkan anpa kamdeze cin hehan Inyan toki iyaye cin he akicita kin nina aoqoyapi.

19 Unkan Herod akita, tuka iyeye šni hehan, tiawanyag wicakiyapi kin hena wiwicawange ca, wicaktepi kta e konza. Qa hehan Juda makoce kin etanhan apamahde iyaye ca Cæsarea en ounyan.

20 Unkan Herod Tyre qa Sidon oyatepi kin wicakize wacin; tuka hena e wicocante wanjidan en hipi, qa Blastus wicaštayatapi ohehdepi tipi tawa kin awanyake cin he yuwaštepi qehan, wookiye dapi; iye tamakocepi kin wicaštayatapi tawa kin on icahyapi kin heon etanhan.

21 Unkan anpetu wan cajeyatapi qon he en Herod wicaštayatapi ihduze ca, woyaco oiyotanke kin akan kiyotanke ca, wowicakiyaka.

22 Hehan oyate kin hotankakiya hotaninpi qa ; He wicaho šni, Wakantanka ho kin hee ce, eyapi.

23 Unkan ihnuhanna Itancan taohnihde ye cin he kaštaka, Wakantanka wowitan qu šni kin heon etanhan. Unkan wamduškadan yutapi qa hecen ta iyaya.

24 Tuka Wakantanka oie kiu icage ca tankaya aya.

25 Unkan Barnabas Saul kici wawokiyapi qon hduštanpi qehan, Jerusalem etanhan hdicupi, qa Johannes Markos eciyapi qon he yuha hdapi.