Romans (ROMA) 1-3

PALOS, ROMA OYATE WOWAPI WICAKICAGE CIN

WICOWOYAKE 1.

1 Palos Jesus Messiya taokiye, yewicašipi kin en kicopi, Wakantanka tawotanin wašte on kahnigapi;

2 Ehanna wowapi wakan kin en wicašta wokcan oyakapi qon hee;

3 lye Cinhintku Jesus Messiya Itancan unyanpi kin heon etanhan; he qe wicacehpi eciyatanhan David cinca kin hetanhan icaga;

4 Qa wowašake on Wakantanka Cinhintku kin hee e yuotaninpi, Woniya Wakan kin eciyatanhan, wiconte etanhan piya ikicage cin he en;

5 lye kin eciyatanhan wowašte unkicupi, qa oyate owasin wacinyanpi kin anagoptanpi kte cin heon yewicašipi wicohan kin he nakun, iye caje kin on:

6 Hena ehna Jesus Messiya wicakico kin he niyepi.

7 Tona Roma ekta un kin owasin, Wakantanka wašte wicakida, yaowotanpidan kte cin on wicakico kin hena, wowapi cicagapi. Wowaonšida , wookiye ko, Wakantanka ateunyanpi, qa Jesus Messiya Itancan kin etanhan, nicipi un nunwe.

8 Tokaheya, Jesus Messiya eciyatanhan, niyepi owasin on etanhan, Wakantanka mitawa kin wopida ewakiya ece, niye wacinyayapi kin he maka kin owancaya cajeyatapi kin heon.

9 Wakantanka minagi kin eciyatanhan ohowada, iye Cinhintku tawotanin wašte kin en, he sdonmayan, ayaštan šni wocekiye epa eca, ohinniyan cajeciyatapi ece;

10 Qa nakaha Wakantanka tawacin kin eciyatanhan ekta ciupi owakihi kte cin heon cewakiya ece.

11 Wanciyakapi nina wacin, woniya etanhan taku wicaqupi wan cicupi kta, on niyusutapi kte cin heon etanhan.

12 Niyepi kin on iyuškinmayanpi kte cin he waka, niš niye qa miš miye napin wacinunyanpi kin on etanhan.

13 Mihunkawanji, he de sdonye šni dukanpi kta wacin šni, wanna ota ekta ciupi kta kepca, tuka dehanyan iyomakipi šni, niyepi ekta waskuyeca wanjikji mduhe kta wacin, oyate toktokeca kin en mduhe cin he iyececa.

14 Helenes, Ikcewicašta ko, ksapapi, wacintonpi šni ko, hena iyohi wicaweciye šni waun.

15 Hecen token owakihi kin, niyepi nakun Roma ekta yaunpi kin, wotanin wašte kin ociciyakapi kta wacin.

16 Messiya tawotanin wašte kin on imaštece šni; he niwicaye kte cin on Wakantanka towašake kin hee, tona wicadapi kin hena en, Juda wicašta kin he tokaheya, qa hehan Helenes wicašta kin hena.

17 Heon etanhan Wakantanka owotanna ohanye cin he wacinyanpi kin etanhan wacinyanpi ekta yuotaninpi; wowapi qon iyececa, Tuwe owotanna kin he wacinyanpi on ni kta ce.

18 Mahpiya kin etanhan Wakantanka tocanniye kin yuotaninpi, woaktašni owasin qa wicašta woahtani econpi kin en, tona woahtani on wowicake kin anaptapi kin hena en.

19 Hena on Wakantanka token sdonyapi kte cin taninyan un; Wakantanka sdonye wicakiya nakaeš.

20 Maka kagapi kin hetanhan Wakantanka towakan qa towašake otokahe wanice cin hena tanin, hena wanyagpica šni ešta, taku kage cin on etanhan sdonyapi ece; hecen on woanahbe yuhapi kte šni.

21 Qa hecen Wakantanka sdonyapi, tuka Wakantanka iyecen yutanpi šni, qa pidapi šni; tuka tawacinpi kin ekta wahanhanicida ayapi, qa iye cantepi wacintonšni kin otpas aya.

22 Ksapeicidapi kin en icunhan witkotkoka icah ayapi.

23 Qa Wakantanka tepica šni towitan kin he wicašta te kte cin ouncage kin iyecen yutokecapi, qa zitkadan, wahutopa, watutka kin hena koya.

24 Heon iye cantiheyapi šice cin en Wakantanka awicayuštan, ihdušapapi kte ca, iye tancanpi kin kiciyušihtinpi kte cin heon.

25 Hena Wakantanka wowicake tawa kin woitonšni kagapi, qa taku icahyapi kin he yuonihanpi qa ohodapi, waicahye cin he isanpa, he qe owihanke wanin yawaštepi nunwe.

26 Heon etanhan wocantiheye šice cin en Wakantanka awicayuštan; hecen winohinca wicayuhapi kin hena e wicohan owotanna kin yutokecapi, qa owotanna šni econpi ece.

27 Qa wicašta kin iš eya winyan yuhapi kin he ayuštanpi, qa iš iyepi otoiyohi winktapi on kicicinpi, wica kin wica kici wowištece okicihanyanpi, qa iye tancan mahen wahtanipi kin taku iyohi kte cin he yuhapi.

28 Qa Wakantanka wacin en yuze wacinpi šni kin he iyecen, Wakantanka iš eya wicotawacin wahte šni kin en awicayuštan, hecen taku wowištece kin hduštanpi kta.

29 Hena e woahtani owasin, wiinahmanpi, wicošice, waicucupi kte cin, qa ohinyanpi on iyatahdepi; winawizipi, tin wicaktepi, wakinicapi, wohnaye, qa wocanniye on ojupidan.

30 Waajijipi sa, waaiapi sa, Wakantanka šice dapika, wananicidapi, wamnaicidapi, ihdatanpi sa, taku šica kagapi sa, hunkakeyapi kin anawicagoptanpi šni;

31 Wacintonpi šni, woope kicaksapi, wacantkiyapi šni, wacin tankapi šni, qa waonšidapi šni.

32 Hena Wakantanka toope kin sdonyapi; (tona hecen econpi kin hena wiconte iyahdeiciyapi,) tuka iš iye hecen econpi qa tona heconpi kin hena on iyokipipi ece.

ROMA OYATE WOWAPI WICOWOYAKE 2.

1 Heon etanhan wicašta kin nituwe kašta, wadaco kinhan iyaonpepica šni yaun kte šni. Taku on wicašta tokeca daco kinhan he en niye nihdaco, wadaco tuka niš eya he kici taku okonwanjidan ecanon ece.

2 Tona wicohan hecen econpi kin hena Wakantanka wowicake eciyatanhan wicayaco kin he sdonunyanpi.

3 Qa wicašta kin, niš tona heconpi kin wicadaco, qa iyecen ecanon kinhan, Wakantanka wicayaco kin he nayecipe kta kecanni he?

4 Kaeš towašte wowijice kin ayakta šni he, wacintanka qa wawacinkta yuza tanka koya; qa Wakantanka towašte kin nihduecetu kta aniye cin hee e sdonyaye šni he?

5 Tuka cante nitehika, qa nihduecetu šni kin eciyatanhan, wocanniye anpetu, qa Wakantanka owotanna wicayaco kin yutaninpi iyehantu kte cin en, wocantiyahde amnayaya he;

6 He wicašta otoiyohi iye ohan kin eciyatanhan wicakicu ece e kta:

7 Tona wicohan wašte en ape yukanpi, qa wowitan, woyuonihan, qa tepica šni kin akitapi ece kin hena wiconi owihanke wanice kta:

8 Tuka tona wakinin unpi, qa wowicake kin anagoptanpi šni, tuka woahtani awacinpi kin hena, wošihda, qa wocanniye,

9 Wošitkihda, qa wokakije, wicašta otoiyohi taku šica econ kin wicanagi kiciun kta, Juda wicašta kin he tokaheya, qa hehan Helenes hee kta.

10 Tuka wowitan, woyuonihan, wookiye ko, tona wašteya ohanye cin hena kiciun kta, Juda wicašta kin he tokaheya, qa hehan Helenes hee kta.

11 Wakantanka wicašta itohnake ekta etonwe šni ece

12 Tona woope codan wahtanipi kin hena woope codan yutakunipi kte šni, qa tona woope kin en wahtanipi kin hena woope kin eciyatanhan wicayacopi kta.

13 Wakantanka ekta tona woope nahonpi kin hena owotanna kin eepi šni, tuka tona woope kin ecen econpi kin hena owotanna wicayawapi kta.

14 Tohan Ikcewicašta woope yuhapi šni kin hena iye cinka woope wicohan kin ecen econpi kinhan, woope yuhapi šni ešta, iš iye woope ihduhapi ece.

15 Hena iš iye cantepi kin ekta woope wicohan owapi kin he hdutaninpi, iye tawiyukcan kin nakun he yaotanin, qa tawacinpi kin otoiyohi tuktekten iyakicionpapi, qa akeš anakihmanpi ece.

16 Anpetu wan en, Wakantanka wotanin wašte mitawa kin eciyatanhan, Jesus Messiya on, wicašta taku nahmana awacinpi kin yaco kinhan.

17 Iho, Juda wicašta eniciyapi, qa woope kin awacin nanke ca Wakantanka on nihdatan,

18 Qa iye tawacin kin sdonyaya, qa taku tona wašte kin idukcan, woope kin tanyan onnispe nakaeš;

19 Qa tona ištagongapi kin tanyan yewicayaye ca, otpaza ehna un kin iyoyamwicaye cin he niye kecannicin;

20 Qa wacinton šni kin hena waonspekiya niyuhapi, qa hokšiyoqopa kin onspewicayakiya ece, qa woope kin en wosdonye wowicake ko ouncage kin yuha yaun.

21 Heon etanhan wicašta tokeca onspeyakiye cin niš niye onspeniciciye šni he? Wamanonpi kte šni keya odake cin, niš niye wamayanon he?

22 Wawicihahapi econpi kte šni kehe cin, niš niye tuwe wawiyakihaha he? Wakagapi kin wahteyada šni kin niš niye tipi wakan kin etanhan wamayanon he?

23 Niš woope kin en iniwinkta kin, woope kicaksapi kin on Wakantanka wowištenyaya he?

24 Niyepi eciyatanhan Ikcewicašta kin Wakantanka caje kin oštehdapi ece; wowapi en kagapi qon iyececa;

25 Woope kin oyape cinhan, awicakehan bakihdayapi kin taku okihi ece; tuka woope yakaksa ece kinhan, banicihdayapi kin he bakihdayapi šni icaga.

26 Heon bakihdayapi šni kin he woope woowotanna kin tanyan ope cinhan, he bakihdayapi šni kin bakihdayapi kiciyawapi kte šni he?

27 Qa bakihdayapi šni ece kin he woope kin ope cinhan, he, niye oowa qa bakišdayapi kin eciyatanhan woope yecakse cin, niyaco kte šni he?

28 Tuwe akan tanhan ecedan hecece cin, he Juda wicašta kin heca šni; qa bakihdayapi akan tanhan qa wicacehpi ecedan en un kin he hee šni;

29 Tuka tuwe mahen tanhan hecece cin he Juda wicašta kin hee, qa bakihdayapi kin he oowa kin en he šni, tuka wicanagi kin en un kin hee; he wowitan kin wicašta akantu eciyatanhan šni, tuka Wakantanka eciyatanhan un.

ROMA OYATE WOWAPI WICOWOYAKE 3

1 Hecen Juda wicašta kin token iyotan un he, qa bakihdayapi kin he taku okihi he?

2 Taku owasin on iyotan, tuka tokaheya Wakantanka oie kin wicaqupi qon he.

3 Qa wanjikji wicadapi šni ešta, hecen tokeca kta he? Hena wicadapi šni kin he Wakantanka wacinyanpi kin ecetu šni ye kta he?

4 Hiya, hecetu šni; Wakantanka wowicake kta, qa wicašta otoiyohi iton kte šni; wowapi en kagapi qon iyececa; Nioie kin on nihdaowotanna kta, qa niyacopi kin en ohiyaye kta ce.

5 Tuka waunhtanipi kin hena Wakantanka toowotanna yutanin kinhan token unkeyapi kta he; Wakantanka kakišwicaye cin he owotanna šni he? (wicašta akantu kin iyecen iwaa;)

6 Hiya hecetu šni; hecetu kinhan token Wakantanka wicoicage kin wicayaco kta he?

7 Oiwaton sui kin on etanhan Wakantanka towicake kin he iye towitan kin hduotanin kinhan, token on etanhan wahtani sa iyecen mayacopi he?

8 Qa tokeca taku wašte u kte cin heon taku šica econkupi kte šni he, unkakicagapi qa wanjikji, unkeyapi ce, keyapi kin iyececa? hena wicayacopi kin he owotanna.

9 He etanhan tokeca kta? unkiye iyotan unwaštepi he? Hiya, takušnina on. Wanna Juda Helenes wicašta ko, owasin woahtani ihukuya yukanpi kin he unyaotaninpi qon.

10 Wowapi en kagapi qon iyececa; Tuwedan owotanna un šni;

11 Tuwedan okahnige šni; tuwedan Wakantanka akite šni;

13 Owasin icunonpa iyayapi, ptaya ihdušicapi; tuwedan taku wašte econ šni, wanjidan ešta.

13 Dotepi kin wicahnakapi yuhdokapi kin hee; cejipi kin on wicahnayanpi ece, ihapi kin en sintehda tage yukan:

14 Ipi kin wicayašicapi qa wicoie pa hinca ko on ojudan:

15 Sihapi kin iš weyapi kta e duzahanpi;

16 Tacankupi kin ohna wicotakuni šni wicokakije ko yukan;

17 Qa wookiye canku kin he sdonyapi šni.

18 Qa ištapi kin itokam Wakantanka kokipapi kin wanica ce.

19 Woope kin taku tona eye cinhan, tona woope ihukuya un kin hena hewicakiya ece e sdonunyanpi. Hecen wicai otoiyohi iohmus icupi kta, qa wicoicage owasin Wakantanka itokam wicayacopi kta.

20 Heon etanhan iye itokam, woope wicohan kin on, wicacehpi takudan yaowotanpi kte šni; woope kin eciyatanhan woahtani sdonkiyapi ece.

21 Tuka nakaha woope codan Wakantanka toowotanna kin yutaninpi; woope qa wicašta wokcanpi kin he yaotaninpi ece.

22 Wakantanka toowotanna kin, Jesus Messiya wacinyanpi kin eciyatanhan u kin hee, tona wicadapi kin owasin en, qa owasin akan un, qa owasin akiyececapi.

23 Owasin hin wahtanipi, qa Wakantanka towitan kin iyohi šni unpi.

24 Qa iye towaonšida kin on iyunwin codan owotanna wicayawapi, wopekitonpi Jesus Messiya en un kin he eciyatanhan.

25 He Wakantanka toka qehan ehde, wokajuju kta, iye we kin wacinyanpi kin eciyatanhan, iye toowotanna hduotanin kte, woahtani ehanna econpi qon hena kajujupi kin on etanhan.

26 Wakantanka tehan ape un kin en, nakaha iye toowotanna kin hdutanin kta e heon; hecen iye kin owotanna un kta, qa nakun tuwe Jesus wacinye cinhan, he yaowotan kta.

27 Hehan ihdatanpi kin toki un he? He anaptapi. Woope kin tukte e on? wicohan kin hee he? Hiya, wacinyanpi woope kin hee on etanhan.

28 Heon woope wicohan codan, wacinyanpi on etanhan, wicašta kin owotanna yawapi e he unkiyukcanpi.

29 Juda oyate išnana Wakantanka tawapi he? qa Ikcewicašta tawapi šni he? Han, nakun Ikcewicašta tawapi,

30 Tuwe wacinyanpi on bakihdayapi kin yaowotanna kte, qa wacinyanpi eciyatanhan bakihdayapi šni kin owotanna yawa kte cin he Wakantanka wanjidan.

31 Hecen wacinyanpi kin on woope kin ecetu šni unyanpi he? Hiya hecetu šni; han, tuka woope kin unyusutapi.