Ohanyanpi Qon (Acts) 8-9

OHANYANPI QON WICOWOYAKE 8.

1 Unkan he te cin Saul iyowinkiya. Unkan anpetu kin he en okodakiciye Jerusalem en un kin šicaya wicakuwapi tanka. Qa owasin Juda makoce qa Samaria ekta enanakiya iyewicayapi, yewicašipi kin henana yapi šni.

2 Unkan wicašta awacin unpi kin heca Stephanos yuha ayapi, qa nina akiceyapi.

3 Tuka Saul okodakiciye kin yutakuni šni wicakuwa, tipi iyaza tin iyaye ca, wica winyan ko wicayuze ca, wicakaška tipi kin en iyewicaya.

4 Heon etanhan tona enanakiya iyayapi qon hena owancaya iyayapi, qa wicoie kin oyakapi ece.

5 Hehan Philip Samaria otonwe kin ekta apamahde iyaye ca, Messiya owicakiyaka.

6 Unkan oyate kin Philip taku wapetokeca econ kin nahonpi qa wanyakapi qehan, taku tona oyake cin cante wanjidan on anagoptanpi.

7 Taku wakanšicapi hotankakiya hotaninyan tona wicayuhnaškinyanpi kin etanhan inanpapi, qa tona tatapike cin huštepi ko ota okizipi.

8 Unkan otonwe kin he en wiyuškinpi tanka.

9 Unkan wicašta wan Simon eciyapi, otonwe kin he en wanakaja tanhan wapiyapi econ, qa Samaria oyate kin yušinyewicaye ca, iye wicašta tanka keiciya.

10 He owasin anagoptanpi, cistinpidan tankinkinyan ko, qa; Wakantanka towašake tanka kin he dee ce, eyapi.

11 Wanakaja tanhan wapiyapi econ kin on yušinyewicaye cin heon he anagoptanpi.

12 Tuka Wakantanka tokiconze kin, qa Jesus Messiya caje kin eciyatanhan taku Philip oyake cin hena wicadapi qehan baptem wicaqupi, wica winyan ko.

13 Qa Simon iš eya wicada, qa baptem qupi; hehan Philip kici un, qa wowakta taku wapetokeca tanka ko wanyake cin heon yušinyaya.

14 Unkan Jerusalem ekta yewicašipi kin, Samaria Wakantanka oie kin icupi kin he nahonpi qehan, Inyan qa Johannes kici ekta ye wicašipi.

15 Hena e ekta apamahde hipi, qa Woniya Wakan icupi kta heon wocekiye ewicakiciyapi.

16 He nahahin tuwedan ahinhe šni, Jesus Itancan caje kin on baptem wicaqupi kin hecedan.

17 Hehan nape on awicaputakapi, unkan Woniya Wakan kin icupi.

18 Unkan yewicašipi kin nape on awicaputakapi kin he eciyatanhan Woniya Wakan wicaqupi kin he Simon wanyaka, hehan mazaska wicakahi;

19 Qa heya; Tuwe nape on awaputake cinhan he Woniya Wakan icu kta e wowašake kin he maqu po.

20 Tuka Inyan heciya; Mazaska nitawa kin niye kici atakuni šni nunwe. Taku Wakantanka wicaqu ece kin he mazaska on opetonpi kta kecanni kin heon etanhan.

21 Wicoie kin de en oyape šni qa takudan nitawa šni; Wakantanka itokamya nicante kin owotanna šni.

22 Heon etanhan taku šice cin de on iyopeiciye ca, Wakantanka cekiya wo, nicante taku awacin kin nicicajujupi nun ce.

23 Nahanhin pizi pa hinca, qa woahtahi icaške kin en yaun e wanmdaka ce.

24 Hehan Simon ayupte ca heya; Taku ehapi kin takudan mahiyahde kte šni heon niš ito miye on Itancan kin cekiya po.

25 Unkan wanna yaotaninpi, qa Itancan oie kin oyakapi qehan, Jerusalem ekta icicawin hdapi, qa Samaria otonwe ota kin en wotanin wašte kin oyakapi.

26 Unkan Itancan taohnihde ye cin Philip okiye ca heciya; Najin qa itokahkiya, canku wan Jerusalem hetanhan iyaye ca Gaza en iyohpaye cin he en i wo, he hewoskan kin ee.

27 Hehan iye najin, qa iyaya. Unkan iho, Ethiopia wicašta wan yunokos heca, Ethiopia wicastyatapi winohinca, Candace eciyapi, he ihukuya wicašta tanka, qa woyuha tawa kin owasin kiciyuha un kin, he Jerusalem ekta cekiye kta e i.

28 Qa he wanna hde ca canpahmihma ohna kiyotanke ca, Isaya wicašta wokcan kin he yawa yanka.

29 Unkan Woniya Wakan kin Philip heciya; Ekta ye ca canpahmihma kin de kici ya wo.

30 Hehan Philip ekta inyang ye ca Isaya wicašta wokcan kin yawa yanke cin he nahon qa; Taku dawa kin he oyakahniga he? eciya.

31 Unkan; Tuwedan onspemakiye šni ecin token owakihi kta he? eye ca, Philip en u qa kici iyotanke kta, keya.

32 Wowapi yawa yanke cin iapi kin he dee; Tahinca wan ktepi kte cin en aipi,qa tacincadan hin wicayušda kin itokam inina yanke cin, he iyecen iš iye i hdukawa šni.

33 Wicawahpanica en un qehan, yacopi kin he ekiciyakapi; qa wicoicage tawa kin tuwe oyake kta he? wiconi tawa kin maka kin etanhan ayapi ce.

34 Hehan yunokos kin Philip ayupte ca heciya; Ceciciya ce, tuwe on wicašta wokcan kin hena hecen eya he, iye icica kaeš wicašta tokeca ka?

35 Hehan Philip i hdukawa qa wowapi kin he etanhan ie ca Jesus e okiyaka.

36 Unkan canku kin ohna hdapi, qa mini yuke cin wan iyohipi. Hehan yunokos kin; Mini wanyaka wo, baptem maqupi kta e taku tehinda kta he? eya.

37 Unkan Philip, Nicante kin ocowasin on wicayada kinhan enicicetu kta, eciya. Hehan iš ayupte ca; Jesus Messiya he Wakantanka Cinhintku kin ee wicawada ce, eya.

38 Hehan canpahmihma kin owanji yanke ši; qa mini kin ekta kun iyayapi, Philip qa yunokos kin; unkan baptem qu.

39 Unkan mini kin etanhan hdicupi qehan, Itancan Taniya kin Philip eyaku, qa yunokos kin ake wanyake šni; unkan canku kin ohna iyuškinyan hda.

40 Tuka Philip Azotus ekta iyekiyapi; qa otonwe kin owasin opta ye ca wotanin wašte kin oyaka, ecen Cæsarea ekta iyohi.

OHANYANPI QON WICOWOYAKE 9.

1 Unkan Saul waaiapi tin wicaktepi ko Itancan waonspewicakiye cin awicapogan, wošna kagapi itancan kin en i;

2 Qa Damascus en omniciye tipi kin ekta wowapi da; hecen canku kin de ohna yakonpi kin tona iyewicaye kte cin, wica winyan ko, Jerusalem ekta kaška awicahdi kta e heon.

3 Unkan icimani ye cin Damascus ikiyedan ya; unkan ihnuhanna ojanjan wan mahpiya eciyatanhan ihdukšan iyoyanpa.

4 Hehan makata hinhpaye cehan, wicaho wan nahon, Saul, Saul, tokeca sicaya mayakuwa he? eciya.

5 Unkan iš; Itancan nituwe he? eya? Hehan Itancan kin iš; Jesus šicaya yakuwa kin he miye; can pesto kin nayahtake cin he tehika ce, eya.

6 He cancan qa yušinyaye ca; Itancan taku ecamon yacin he? eya. Unkan Itancan kin; Najin qa otonwe kin ekta ya wo, token ecanon kte cin oniciyakapi kta ce, eciya.

7 Unkan wicašta om icimani kin yušinyaya najinpi, wicaho kin nahonpi tuka tuwedan wanyakapi šni.

8 Unkan Saul maka kin etanhan najin qa išta kamdaya hehan, tuwedan wanyake šni; unkan nape on yus ayapi, qa Damascus ekta aipi.

9 Unkan anpetu yamni wawanyake šni un; qa takudan yute šni qa yatke šni.

10 Unkan Damascus en waonspekiyapi wan, Ananias eciyapi, he wowihanmde en Itancan kin; Ananias, eciya. Unkan iš; Itancan, de miye ce, eya.

11 Hehan Itancan kin heciya; Najin qa canku wan Owotanna eciyapi kin he ekta ye ca Judas ti kin en Saul eciyapi, Tarsus etanhan he akita wo; wanna cekiya un;

12 Qa wowihanmde wan en wicašta wan Ananias eciyapi tin hiyu, qa tonwe kta e on nape on aputake cin he wanyaka ce.

13 Hehan Ananias ayupta; Itancan, wicota etanhan wicašta kin he Jerusalem ekta, tona owotanna wicaduhe cin taku šica ecawicakicon kin hena nawahon;

14 Qa deciya nakun wošnapi kagapi kin eciyatanhan wowašake yuha un, tona nicaje hoyekiyapi kin hena owasin wicakaške kta ce, eya.

15 Tuka Itancan kin iš heciya; Hunktiya wo, wakšica wakahnige cin he wanji ee, micaje kin Ikcewicašta, qa wicaštayatapi kin Israel cinca ko itokam yuha un kta:

16 Qa micaje kin on taku token kakije kte cin he wakipazo kta ce, eya.

17 Hehan Ananias ye ca, tipi kin timahen iyaye ca, nape on aputake ca heya; Saul mihunkawanji, yatonwe ca Woniya Wakan on onijudan kta e Itancan kin u maši; Jesus canku ohna yau kin en taniniciye ciqon hee.

18 Unkan ihnuhanna taku hocešpu kin iyececa išta kin etanhan hinhpaya; unkan ecahankeya tonwe ca najin, qa baptem qupi.

19 Unkan taku yutapi icu qehan, wašaka aya. Unkan Saul anpetu tonana waonspewicakiyapi kin, Damascus en yakonpi, hena om un.

20 Qa kohanna omniciye tipi kin ohna Messiya he Wakantanka Cinhintku kin ee ce, eya oyaka.

21 Unkan tona nahonpi kin owasin yušinyayapi qa heyapi; Jerusalem ekta tona wicacaje kin de hoyekiyapi kinšicaya wicakuwa, qa nakaha wicakaške ca, wosnapi kagapi kin ekta awicaye kta e on den hi kin he dee šni he?

22 Tuka Saul sanpa wašaka icage ca Juda wicašta Damascus ekta yakonpi kin hena inina yanke wicakiye ca, He Messiya kin ee e yawicaka.

23 Wanna anpetu ota hehan Juda oyate kin he te yapi kta e akiiapi.

24 Tuka hecen konzapi kin he Saul sdonya. Unkan ktepi kta e anpetu hanyetu ko otonwe tiyopa kin awanhdakapi.

25 Hehan waonspewicakiyapi kin hanyen icupi, qa makanopiye wan ohna otonwe conkaške kin etanhan kun iyeyapi.

26 Unkan Saul Jerusalem en hdi qehan, waonspewicakiyapi kin om un kta cin; tuka owasin kokipapi, qa wanna waonspekiyapi kin heca e wicadapi šni.

27 Tuka Barnabas he icu,

qa yewicašipi kin en ahi, qa token tahepi Itancan kin wanyake ca, he okiye ca, token Damascus ekta Jesus caje kin on waditagya oyake cin hena owicakiyaka.

28 Unkan Jerusalem ekta om un, qa timahen u qa tankan ya ece; qa Jesus Itancan kin on wašagya woyaka.

29 Qa Helenes oyate kin om hdokinica. Tuka hena eqe he ktepi kta akitapi.

30 Hunkawanjin kiciyapi kin he sdonyapi, unkan Cæsarea ekta aipi, qa Tarsos heciya hde šipi.

31 Hehan okodakiciye kin Juda makoce kin owancaya, qa Galilee, qa Samaria ekta wookiye yuhapi, qa icagapi; qa Itancan kin kokipeyahan manipi, qa Woniya Wakan wicakicanpte cin en unpi, qa hecen ihduotapi.

32 Unkan Inyan makoce kin owasin opta iyaye cehan, Lydda ekta wicašta owotanna yukanpi kin hena en wicahiyohi.

33 Qa wicašta wan Æneas eciyapi hen wanyaka; he waniyetu šahdogan makan wanka, tataka ececa.

34 Unkan Inyan; Æneas Jesus Messiya asniniyan, najin qa owinja hdatata wo, eciya. Unkan ihnuhanna najin hiyaya.

35 Unkan tona Lydda qa Saron en yakonpi kin owasin he wanyakapi, qa Itancan kin ekta ihduhomnipi.

36 Unkan Joppa ekta waonspekiyapi wan Tabitha eciyapi, he Tatokadan eyapi kin he kapi; winohinca kin he ohan wašte qa taku wacantkiya econ kin ojudan:

37 Unkan he anpetu kin hena en wayazanka, qa ta iyaya. He yujajapi qehan, wankan tipi wan ekta ehnakapi.

38 Unkan Lydda Joppa ikiyedan, qa Inyan hen un kin waonspewicakiyapi kin nahonpi qon, heon wicašta nom ekta ye wicašipi, qa ecadan en wicau kta e iwahoyapi.

39 Hehan Inyan najin qa hena om hda. Ekta i, unkan wankan tipi kin en aipi, unkan wiwazica kin owasin en najinpi, qa ohde wokoyake ko, Tabitha ni un qehan, kage ciqon hena pazo yankapi, qa ceyapi ece.

40 Tuka Inyan hena owasin tankan iyewicaye ca, canpeška makehde inajin qa wocekiye eya, hehan tancan wanke cin ekta ihdamna qa; Tabitha, najin wo, eya. Unkan išta kamdaye ca Inyan wanyake cehan iyotanka.

41 Unkan nape yekiye ca najinkiya ; qa wicašta owotanna wiwazica ko wicakico qehan, he ni un e wicakipazo.

42 Unkan Joppa owancaya he otanin, qa wicota Itancan kin wacinyanpi.

43 Unkan Inyan anpetu ota Joppa en, wicašta wakpanyan wan Simon eciyapi, he kici yanka.