Ohanyanpi Qon (Acts) 17-20

OHANYANPI QON WICOWOYAKE 17.

1 Unkan Amphipolis qa Apollonia opta yapi kin, hehan Thessalonica en ipi; hen Juda oyate omniciye tipi kin wanji yukan.

2 Unkan Palos token econ ece kin ake ecen econ, qa timahen i, qa anpetu okihpapi yamni, wowapi wakan kin eciyatanhan, oyate kin wowicakiyaka.

3 Ie ca Messiya te kte ca, wiconte kin etanhan najin kta e hecetu e yaotanin, qa, Jesus ociciyakapi kin he Messiya kin ee ce, eya.

4 Unkan hunh wicadapi, qa Palos qa Silas kici owicapapi, Helenes wicašta owotanna ota, qa winohinca tokapapi kin wanistinpidan šni.

5 Tuka Juda oyate wicadapi šni kin hena wohinyanpi,qa wopeton tipi hocoka kin etanhan wicašta šica wanjikji iwicacupi, qa kiwitaya iheyapi, qa otonwe  kin ocowasin oqoyeyapi, hehan Jason tipi kin takpe ipi, qa oyate kin ekta tankan hiyu wicayapi kta e akitapi.

6 Qa iyewicayapi šni qehan, Jason hunkawanjin kiciyapi wanjikji om otonwe kin en wicašta itancanpi kin ekta awicaipi, qa hotankakiya hotaninpi, Tona maka kin yuahdapšinyan ehpeyapi qon hena den hipi:

7 Qa Jason hena tin u wicaši. Unkan hena owasin Cæsar toope kin opapi šni, qa, Wicaštayatapi tokeca wan Jesus hee ce, eya oyakapi ece, eyapi.

8 Unkan otonwe en wicašta itancanpi kin oyate ko, hena nahonpi kin inihan wicayapi.

9 Unkan Jason qa unmapi kin taku iwakta wicayapi, hehan awicayuštanpi.

10 Hehan hunkawanjin kiciyapi kin Palos qa Silas kici hanyen Berea ekta awicayapi. Hena ekta ipi, qa Juda oyate omniciye tipi yuhapi kin he en timahen yapi.

11 Hena iš Thessalonica oyate kin sam iyeya wacin ksapapi, wicoie kin tawacin inahni on icupi, qa hena hecetu e sdonyapi kta, heon anpetu iyohi wowapi wakan kin en akitapi ece.

12 Heon etanhan wicota wicadapi, Helenes winohinca okinihan, qa nakun wicašta ota.

13 Tuka Berea ekta Palos Wakantanka oie kin oyake cin he, Juda wicašta Thessalonica en un kin hena sdonyapi qehan, ekta ipi, qa wicota kin wicayaskiškapi.

14 Unkan hehan hunkawanjinkiciyapi kin Palos miniwanca kin ekta ye kta se tokan ye šipi; tuka Silas qa Timotheos hen owanji yukanpi.

15 Unkan tona Palos ayapi qon hena Athens ekta aipi; qa Silas Timotheos kici kohanna en upi kta e iwahowicaye cin he hoši wicakahdapi.

16 Unkan hena Athenas ekta upi kta e Palos awicape yanke cin, he icunhan, otonwe kin wakagapi ojudan e wanyake ca on wacin iyokišica hinhda.

17 Qa heon omniciye tipi kin ohna Juda oyate, qa tona owicapapi kin hena om wohdaka, qa nakun anpetu otoiyohi wopeton tipi hocoka kin ekta tona itkowicakipe cin hena om.

18 Unkan hehan Epicureos qa Stoikos oyate kin etanhan, wicašta woksape cinpi wanjikji Palos itkokipapi qa, I wakan kin de token eye kta he? hunh eyapi; qa hunh iš, He taku wakan tokeca ehde sececa ce, eyapi; Jesus qa wiconte etanhan woekicetu kin hena owicakiyaka, heon etanhan.

19 He icupi, qa Areopagus ekta aipi qa, Woonspe teca odake cin he taku kin sdonunyanpi kta uncinpi:

20 Taku wotanin tokeca noge on nahon unyayapi kin hena token kapi hecinhan, sdonunyanpi kta ce, eciyapi.

21 Athens oyate, qa wicašta tokeca en yukanpi kin owasin, taku tokeca econpi šni, taku nakaha otanin kin oyakapi, qa nahonpi kin heceyedan.

22 Hehan Palos Mars Paha Kin cokaya inajin, qa heya; Athens wicašta kin, taku wakan kin nina awacannipi e, taku owasin on imdukcan.

23 Naka taku wakan yadapi kin en awahimdamda, unkan iho, wahna wošnapi wan, Taku Wakan Sdonyapi Šni Un Kin, akan owapi kin he iyewaye. He iyukcanšniyan ohoyadapi kin hee e ociciyakapi.

24 Taku Wakan kin tuwe maka taku ohnaka ko owasin kage ca, mahpiya maka ko Itancan kin hee, heon tipi wakan wicanape on kagapi kin ohna ti šni;

25 Qa iye kin owasin wiconi, qa woniya, qa taku owasin ko wicaqu ece kin, he taku icakije cin iyecen, wicašta nape kin on okiyapi šni ece.

26 Qa wicawe wanjidan on, wicašta oyate hiyeye cin owasin, maka kin owancaya etipi kta e wicakaga; qa tohanhan nipi, qa tuktekten tipi kte cin hena otokahe tanhan wicakiciyuštan.

27 Heon Itancan kin akitapi kta iyececa, okinni yutantan akitapi kinhan iyeyapi kta, otoiyohi unkitehanpi šni un tuka ce.

28 lye atayedan on unnipi, qa unškanškanpi, qa en unyakonpi ece: enitanhanpi wicašta odowan kagapi ece kin hena wanjikji heyapi qon,  Unkiš eya he cinca unyakonpi ce.

29 Hecen Wakantanka cinca unyakonpi kin,  mazaskazi, qa mazaska, qa inyan, wicašta wayupike wacinksape bagopi kin, Taku Wakan kin iyacinpi kta iyececa unkecinpi kte šni.

30 Qa wookahnige šni omaka kin hena, Wakantanka ekta etonwe šni; tuka wanna wicašta owasin owancaya ihduecetu wicaši,

31 Qa anpetu wan en wicašta kin woowotanna on wicayaco kta e konza, wicašta kahnige ciqon he on hecon kta, qa wiconte kin etanhan najin kiye cin heon he owasin sdonye wicaya ce, eya.

32 Unkan wicate cin piya icahyapi kin he nahonpi qehan, hunh ihahapi; qa apa iš, He on ake naunnihonpi kta ce, eyapi.

33 Hecen Palos wicacokaya tanhan tokan iyaya.

34 Tuka wicašta wanjikji opapi, qa wicadapi; Dionysius Areyos paha omniciye kin en ope ciqon he wanji ee,qa winohinca wan Damans eciyapi, qa nakun toktokecapi.

OHANYANPI QON WICOWOYAKE 18.

1 Hena iyohakam Palos Athens ayuštan, qa Corinth ekta i:

2 Qa hen Juda wicašta wan iyeya, Akula eciyapi, Pontos en tonpi, qa aškatudan Italia etanhan hiyu, tawicu Priscilla kici; Kladios Juda wicašta kin owasin Roma ayuštan wicaši kin heon etanhan. Unkan hena en wicahi;

3 Qa kici wicohtani okonwanjidan, heon om un, qa om htani, wakeya kagapi kin hecapi.

4 Qa anpetu wakan eca omniciye tipi kin ohna wowicakiyaka ece, qa Juda oyate Helenes ko cinwicakiya.

5 Unkan Silas qa Timotheos Macedonia etanhan hiyupi qa en hipi qehan, Palos nagi kin ekta iyopaštag iciye ca, Jesus he Messiya kin ee ce, Juda oyate kin owicakiyaka.

6 Unkan hena e wakipajinpi, qa šicaya iapi kin, hehan Palos wokoyake aihdatata, qa hewicakiya, Niwe kin nipapi kin akan niunpi nunwe, miye mabapica šni waun, detanhan Ikcewicašta kin ekta mde kta ce.

7 Unkan hetanhan tankan ye ca, wicašta wan Wakantanka ohoda, Justus eciyapi he ti kin omniciye tipi kin ikiyadan han; unkan tipi kin he en tin iyaya.

8 Unkan Crispus, omniciye tipi kin en itancan kin, he Itancan kin wacinyan, tiyohnaka owasin om; qa Corinth oyate kin wicota nahonpi qehan wicadapi, unkan baptem wicaqupi.

9 Unkan hehan hanyen wowihamde en, Itancan kin Palos heciya, Ihnuhan taku koyakipe cin, tuka nina ie ca, inina yanke šni wo.

10 Miye cicica, qa tuwedan kiuniniye kta e iyanihpaye kte šni; otonwe kin de ohna oyate ota wicamduha ce, eya.

11 Unkan hen wi ake šahdogan hehanyan iyotanke ca, Wakantanka oie kin onspewicakiya.

12 Unkan Gallio Achaia makoce kin en itancan un kin, hehan Juda oyate witaya Palos takpe ipi, qa woyaco oiyotanke kin en ahipi;

13 Qa, Woahope kin eciyatanhan šni Wakantanka cekiyapi kta e wicašta kin onspewicakiye cin he dee ce, eyapi.

14 Unkan Palos i hdukawa kta, hehan Gallio Juda oyate kin hewicakiya; Juda wicašta kin, de taku šica econpi, kaeš wicaštašniyan ohanyanpi kin hee unkanš, nacihonpi kta iyececa tuka:

15 Tuka wieoie, qa wicacaje, qa woope nitawapi on wiwangapi kin heca hecinhan, niš ito ekta etonwan po; taku hececa on wimdukcan kte šni ce.

16 Hehan woyaco oiyotanke kin etanhan kaham iyewicaya.

17 Unkan Helenes wicašta kin owasin Sosthenes, omniciye tipi kin en itancan kin he, icupi, qa woyaco oiyotanke kin itokam apapi. Tuka Gallio hena taku kin ekta ewacin šni yanka.

18 Unkan he iyohakam Palos anpetu ota hen yanke cehan, hunkawanjin kiciyapi kin awicayuštan, qa Syria ektakiya watom iyaya, Priscilla Aquila kici opapi Cenchreya ekta paha kin bakišda, hecen iciconza kin heon.

19 Hehan Ephesus ekta iyohi, qa hen ehpewicaya; tuka iye kin omniciye tipi kin en tin iyaye ca, Juda oyate kin om wohdaka.

20 Unkan en tehan owanji yanke kta e cinpi ešta wicada šni:

21 Tuka napewicayuze ca, Jerusalem ekta wošnapi u kte cin he en owape kta, tuka Wakantanka iyokipi kinhan, ake en cihdipi kta ce, eya. Hehan Ephesus etanhan watom iyaya.

22 Qa Cæsareya en huta ekta ihunni, qa hen ihe ca okodakiciye kin napewicayuze cehan, Antioch ekta apamahde iyaya.

23 Qa anpetu ota hen un kin, hehan Galatia qa Phrygia makoce kin owancaya ye ca, waonspewicakiyapi kin owasin wašag wicakiya.

24 Unkan Juda wicašta wan, Apollos eciyapi, Alexandrea en tonpi, wicašta wayapike ca wowapi wakan on wašaka, he Ephesus ekta hi.

25 Wicašta kin he Itancan tacanku kin onspe, qa nagi kata, heon ninana ie ca, Itancan taku tawa kin onspewicakiya, Johannes baptem tawa kin hecedan sdonya tuka.

26 Hee omniciye tipi kin ohna waditagya ia; unkan Aquila qa Priscilla nahonpi qehan, he icupi, qa Wakantanka tacanku kin sanpa tanyan okiyakapi.

27 Unkan Achaia ekta ye wacin, hehan hunkawanjin kiciyapi kin heciya wowapi wicakicagapi, qa he iyowinkiyapi kta e iwahokonwicakiyapi. He heciya i, qa tona wowaonšida  kin on wicadapi qon hena nina owicakiya;

28 Qa Juda oyate kin omniciye en nina awacin wicaye ca, wowapi wakan kin eciyatanhan Jesus he Messiya kin ee e yatanin.

OHANYANPI QON WICOWOYAKE 19.

1 Unkan Apollos Corinth en un kin icunhan, Palos iheyata makoce kin opta ye ca, Ephesus ekta iyohi, qa hen waonspewicukiyapi wanjikji iyewicaya:

2 Qa hewicakiya, Wicayadapi ehantanhan Woniya Wakan kin iyacupi he? Unkan iš, Woniya Wakan yukan e nahahin naunhonpi šni ce, eyapi.

3 Unkan, Taku on baptem nicupi he? ewicakiya. Unkan, Johannes baptem tawa kin hee ce, eyapi.

4 Unkan Palos, Johannes ihduecetupi kte cin on baptem wicaqu, qa oyate kin tuwe u kte cin he wicadapi kta, kewicakiya, he Jesus Messiya kin ee ce, eya.

5 He nahonpi, unkan Jesus Itancan caje kin on baptem wicaqupi.

6 Hehan Palos nape on awicaputake ca, Woniya Wakan en wicahi, unkan ceji tokeca on iapi qa wokcanpi.

7 Hena owasin wica ece wikecmna ake nonpa.

8 Unkan omniciye tipi kin tin iyaye ca, wi yamni waditagya ie ca wohdaka, qa Wakantanka tokiconze taku tawa kin onspewicakiya.

9 Tuka wanjikji suta icicagapi qa wicadapi šni kin hena, wicota kin en, canku kin de on šicaya eyapi qehan, hena awicayuštan, qa waonspewicakiyapi kin aiyog iyewicaye ca, anpetu otoiyohi, tuwe Tyrannus eciyapi, he oyawa tipi yuhe cin ohna woyaka ece.

10 Waniyetu nonpa hehanyan hecen econ, unkan tona Asia en yakonpi kin hena owasin Jesus Itancan oie kin nahonpi, Juda Helenes wicašta ko.

11 Unkan Palos nape kin on Wakantanka wowapetokeca wakan kin econ ece.

12 Hecen iye tancan kin etanhan, napipakinte qa makuakahpe kin wayazanpi kin en akipi; unkan wowayazan kin ayuštan iyaye ca, taku wakanšicapi kin tankan inanpapi.

13 Unkan wanjikji, Juda wicašta wapiyapi kin been, tona taku wakanšicapi yuhapi kin hena en, Jesus Itancan kin cajeyata utapi, qa, Jesus Palos oyake cin he cajeyan naunhon po, eyapi.

14 Qa Juda wicašta wosnapi kagapi wanji, Skeva eciyapi, he cinhintku šakowin kin hena heconpi.

15 Tuka woniya šice cin he waayupte ca, Jesus sdonwaye ca, Palos nakun sdonwaya, tuka niš nituwepi he? eya.

16 Unkan wicašta taku wakanšica yuhe cin he iyawicahpaye ca, ohiwicaya, hecen tancodan kiunniyanpi ecen tipi kin etanhan tankan najicapi.

17 Unkan tona Ephesus en yukanpi kin, Juda qa Helenes oyate kin owasin he sdonyapi; qa wokokipe owasin awicahinhpaya, unkan Jesus Itancan caje kin yatanpi.

18 Unkan tona wicadapi kin etanhan wicota en ahi, qa wohdakapi, wicohan qon ohdakapi;

19 Qa tona wapiyapi econpi kin hena wicota wowapi tawapi kin en ahipi, qa owasin wicitokam huhnahyapi; hena iyopeyapi kin hdawapi, qa mazaska kektopawinge wikcemna zaptan iyawapi.

20 Hecen Itancan oie kin nina icage ca ohiya.

21 Unkan hena taku kin wanna enakiyapi, hehan Palos woniya eciyatanhan konza, Macedonia qa Achaia opta ye cinhan, hehan Jerusalem ekta ye kta, qa, Heciya wai kinhan hehan Roma wanmdake kta ce, eya.

22 Qa ookiye wicayuhe cin nom, Timotheos qa Erastos, hena Macedonia ekta ye wicaši, tuka iye anpetu tonana Asia en owanjidan yanka.

23 Unkan he icunhan canku kin de on nina owodutaton.

24 Tuwe Demetrius eciyapi, mazaska kage cin heca, he mazaska kokadan Diana kicaga ece, qa tona woecon kin he econpi kin hena taku ota wicakicamna.

25 Hena eepi, qa tona opeya htanipi kin hena ko wicakico qa hewicakiya, Wicašta kin, wicohitani kin de on woyuha untonpi e sdonyakiyapi.

26 Qa nakun Ephesus ecedan šni, tuka Asia owancaya, Palos kin de oyate ota wahokonwicakiye ca, wicayuhomni qa, Taku wakan nape on kagapi kin hena wakan šni ce, eya owicakiyaka e sdonyayapi qa nayahonpi.

27 Qa hecen taku on waunkaninanpi ece kin he wahtedapi kte šni seca, qa hecedan šni, nakun Diana taku wakan tanka tipi wakan tawa kin takudapi kte šni, qa wowitan hduhe cin yutakuni kte šni, he qe Asia owancaya, qa oyate kin iyuhpa ohodapi tuka ce, eya.

28 Unkan hena nahonpi qehan, nina canteptanyanpi qa, Diana Ephesus oyate tawapi kin he tanka ce, eyaya hotaninpi.

29 Unkan otonwe kin owancaya nina owodutaton; qa Gaius qa Aristarchus kici, Macedonia wicašta kin, Palos kici hipi qon hena iwicacupi, qa tawacin wanjidan owanyake tipi kin en inyang yapi.

30 Unkan Palos oyate kin en wicai kta, tuka waonspewicakiyapi kin iyokipi šni:

31 Qa Asia en wicašta tokapapi wanjikji, iye takodawicaye cin hena wahoyapi, qa owanyake tipi kin timahen iyohpaye kte šni e icekiyapi.

32 Heon hunh taku eya hotaninpi, qa hunh iš togye eyapi; omniciye kin nina oqoyapi; qa tokeca e on mniciyapi kin ota sdonyapi šni.

33 Hehan Alexander wicota kin etanhan ahiyupi, qa Juda wicašta kin he cokata iyaye yapi. Unkan Alexander namwicakicawin, qa oyate kin wowicakiyake kta.

34 Tuka he Juda wicašta kin heca e sdonyapi, unkan wihiyayedan oape nonpa hehanyan, owasin ho wanjidan hotankakiya hotaninpi, Diana Ephesus oyate tawapi kin he tanka ce, eyaya yukanpi.

35 Unkan wowapi kage cin he oyate kin wicayuinina qehan, hecen eya, Ephesus wicašta kin, Ephesus otonwe kin de Diana taku wakan tanka he tipi wakan tawa kin awanyag un, qa wakagapi Jupiter etanhan hinhpaye ciqon he nakun, he tuwe wicašta kin he sdonye šni he?

36 Dena taku kin cetunhdapica šni, heon inina dukanpi, qa takudan inahniyan ecanonpi kte šni tuka.

37 Wicašta kin dena tipi wakan kin etanhan takudan manonpi šni, qa taku wakan nitawapi kin yašicapi šni, tuka den awicayahipi.

38 Demetrius qa tona om htani kin hena tuwe en taku aupi cinpi kinhan, woyaco anpetu yukan, qa nakun wicašta wayacopi kin; otoiyohi wiyakicionpapi kta.

39 Qa niš taku tokeca on winungapi hecinhan, omniciye wicoope kin eciyatanhan un kin he en yacopi kta.

40 Anpetu kin de owodutaton kin on wiunwaugapi kta naceca; omniciye kin de on etanhan taku unkeyapi kte cin takudan unhapi šni ce, eya.

41 Unkan hena hecen eye cehan, hehan omniciye kin hde wicaši.

OHANYANPI QON WICOWOYAKE 20

1 Owodutaton kin ho henakeca, hehan Palos waonspewicakiyapi kin wicakico, qa i iwicaputaka, qa Macedonia ekta ye kta e hetanhan iyaya.

2 Unkan makoce kin hena opta iyaye ca, oie ota on iwahokonwicakiyecehan, Helenes makoce kin en iyohi:

3 Qa wi yamni hen owanji yanka. Unkan Syria ekta watom ye kta, hehan Juda wicašta kin nahmana iyapepi kin heon Macedonia opta icicawin hde kta e iciconza.

4 Unkan Sopater Berea etanhan, qa Thessalonica etanhan Aristarchus Secundos kici, qa Gaius Derbe etanhan, qa Timotheos, qa Asia wicašta, Tychicus qa Trophimus, hena Asia ekta Palos kici yapi.

5 Hena e tokata yapi, qa Troas en unkapepi.

6 Unkan aguyapi on napohyapi codan anpetu kin iyohakam, Philippi etanhan watounpapi, qa anpetu zaptan hehan Troas en wicunkihdegapi, qa hen anpetu šakowin unkokihpapi.

7 Unkan anpetu tokaheya kin he en waonspewicakiyapi kin aguyapi kiyušpa imniciyapi, hehan Palos wowicakiyaka, hanhanna hetanhan hde kta, hecen hanye cokaya hehanyan wahokonwicakiya yanka.

8 Unkan wankan tipi ohna mniciya yukanpi kin he en petijanjan ota hdepi.

9 Unkan koška wan, Eutychus eciyapi kin he owanyeye kin en iyotankehan yanke ca, ištinbe hinca: unkan Palos tehan woyake cin icunhan, ištinma iwanke ca, owanka iciyamni kin hetanhan hinhpaye ca ta ecen eyakupi.

10 Hehan Palos kun ye ca akan ehpeiciye ca, poskin yuze ca, Ihnuhan yaceyapi kin, taniya kin nahahin mahen un ce, eya.

11 Qa ake wankan ye ca, aguyapi kiyušpe ca, yute ca, tehan ia yanke cin, anpa kamdeze cin hehanyan, hehan hetanhan kihda.

12 Unkan koška qon ni ikikcupi qa nina pidapi.

13 Unkan unkiye tokaheya wita wata kin ekta unyanpi, qa Assos ekta watoni unyanpi, heciyatanhan Palos en ope ungipi kta unkecinpi; iye qe hehanyan uiani cin, qa heon hecon unšipi.

14 Unkan Assos ekta eunkihdegapi qehan, hehan en ope unkiyapi, qa Mitylene en unhipi.

15 Unkan hetanhan iyoopta watom unyanpi, qa ihanhanna qehan Chios en iyotakons unyanpi; qa ake ihanhanna qehan Samos iyounhipi, qa Trogyllium en owanji unkanpi; qa ake ihanhanna qehan Miletus ekta unkipi.

16 Palos Ephesus en icunom watom iyaye wacin, Asia en okihpe kte šni, qa okihi kinhan anpetu iwikcemna zaptan kin he en Jerusalem en un kta cin, qa heon inahni.

17 Unkan Miletos etanhan ye wicaši, qa Ephesus en okodakiciye hunkawicayapi kin wicakico.

18 Unkan hena en hipi, hehan hewicakiya; Asia en wahi qon anpetu tokaheya hehantanhan, token ohinniyan cicipi waun kin sdonyayapi.

19 Tawacin ocowasin wahbayedan waun, Itancan kin ohowada, ištamnihanpe ota, qa taku wawiyutanyan un kin, Juda oyate nahmana iyamapepi kin on mahiyahde kin hena koya.

20 Qa taku on tanyan yaunpi kte cin takudan ipicidapišni, tuka omnieiye kin en, qa tipi iyaza wociciyakapi qa waonspeciciyapi ece.

21 Wakantanka ekta ihduecetupi, qa Jesus Messiya Itancan unkiyapi wacinyanpi kin hena, Juda Helenes oyate ko en mdaotanin ece.

22 Unkan nakaha iho, Woniya kin on makaškapi ecen Jerusalem ekta mda, qa heciya taku mahiyahde kte cin sdonwakiye šni.

23 Tuka otonwe otoiyohi en Woniya Wakan mayaotanin qa, On kaškapi qa wokakije miciun, keya ce.

24 Tuka hena takuwada šni, qa wiconi mitawa kin tehike wakida šni, iyuškinyan ihunniyan waimnanke kta, qa wicohan Jesus Itancan maqu kin, Wakantanka towaonšida wotani n wašte omdake kte cin hee tanyan mduštan kinhan.

25 Qa nakaha iho, niyepi kin Wakantanka tokiconze kin ociciyag ciipi qon owasin ake miite kin wanmayadakapi kte šni e sdonwakiya.

26 Heon anpetu kin de waayatanin ciciyapi, wicašta owasin we kin on ašape šni waun.

27 Wakantanka tawacin kin ocowasin ociciyakapi qa takudan anawahbe šni.

28 Heon tanyan piiciyapi, qa optaye owasin en, Woniya Wakan waawanhdake nicagapi kin hena koya, qa Wakantanka taokodakiciye kin, iye we kin on opekiton qon he awanhdaka po.

29 Miye imdamde cinhan, hehan šunktokeca ocinšicapi kin niyepi en niipi kta, qa tahinca kin itonwicapapi kte šni he sdonwaya.

30 Qa niyepi enitanhanpi wicašta icagapi kta, kaeš iyepi ihakam waonspewicakiyapi kin u wicakiyapi kta e nina yaškiškapi kta.

31 Heon kiktahan un po, qa waniyetu yamni, anpetu hanyetu ko, ištamnihanpe amau, qa otoiyohi wahokonciciyapi amdaštan šni, he kiksuya po.

32 Hunkawanjinciyapi, nakaha Wakantanka iš iye, qa towaonšida oie kin en aciupi; he icahniyanpi, qa tona ska wicakagapi kin owasin om taku yuhe niciyapi kta e okihi.

33 Tuwe mazaska, qa mazaskazi, qa wokoyake tawa kin wakon šni.

34 Han, minape kin dena on taku wacin kin mihdamna, qa tona om waun kin hena wicawecamna qon he niye sdonyayapi.

35 Hena owasin en waonspeciciyapi, hecen htayanipi, qa tona wašake šni un kin owicayakiyapi kta, qa Jesus Itancan oie qon yeksuyapi kta, Wicaqupi kin hee wowašte, qa icupi kin hee aoptetu, eye ciqon he.

36 Hena hecen eya, unkan hehan canpeška makehde inajin, qa owasin om cekiya.

37 Unkan owasin nina ceyapi, qa Palos poskin yuzapi, qa i iputakapi.

38 Miite kin ake tohinni wanmayadakapi kte šni eye ciqon, oie kin de on iyotan nina iyokišicapi. Unkan wita wata kin ekta kici yapi.