Ohanyanpi Qon (Acts) 6-7

OHANYANPI QON WICOWOYAKE 6.

1 Unkan anpetu kin hena en, waonspewicakiyapi kin wanna wicota aya qehan, Helenes Hebrew oyate kin wicahapi, anpetu otoiyohi wapamnipi kin en wiwazica wicayuhapi kin hena awicatonwanpišni kin heon etanhan.

2 Hehan akenonpapi kin waonspewicakiyapi kin owasin wicakicopi qa hewicakiyapi; Wakantanka oie kin unkayuštanpi, qa wahna wotapi wiyeya eunhnakapi kte cin hecetu šni.

3 Heon hunkawanjin unniyanpi enitanhanpi wicašta owotanna yawapi, qa Woniya Wakan wicoksape ko on ojupidan šakowin wicakahniga po, wicohan kin de yuhe wicunkiyapi kta.

4 Tuka unkiye qe cekiyapi qa wicoie oyakapi kin en ohinniyan ye unkiciyapi kta ce.

5 Unkan wicoie kin he oyate kin owasin iyokipipi; qa Stephanos, wicašta wan wacinyanpi Woniya Wakan ko ojudan, kin he kahnigapi, qa Philip, qa Prochorus, qa Nicanor, qa Timon, qa Parmenas, qa Nicolas Antioch ekta en opekiyapi qon.

6 Hena yewicašipi kin wicacokaya ewicahdepi; unkan wocekiye eyapi, hehan nape on awicaputakapi.

7 Unkan Wakantanka oie kin icage ca Jerusalem en waonspewicakiyapi kin nina ota aya; qa wošnapi kagapi kin ota nakun wacinyanpi kin en opapi.

8 Unkan Stephanos wowacinye wowašake ko on ojudan, taku on yušinyayapi, qa wapetokeca tanka econ, oyate kin en.

9 Unkan wicašta wanjikji omniciye tipi wan, Wicakiyuškapi tawapi eciyapi kin hetanhan, qa Cyrene qa Alexandria wicašta kin, qa Cilicia qa Asia etanhanpi, hena en inajinpi qa Stephanos kici hdokinicapi.

10 Tuka Woksape Woniya ko on ie cin he okihipi šni.

11 Hehan wicašta opewicatonpi, unkan hena e, Wicašta kin de Moses qa Wakantanka nakun wicoie šica ewicakiya, namihonpi ce, eyapi.

12 Hecen oyate kin, qa hunkawicayapi, wowapi kagapi ko iyowicapaštakapi; unkan anatan hipi, qa yuzapi, qa omniciye kin en ahipi.

13 Qa oitonšni waayatanin kin heca najin wicakiyapi; hena iš heyapi; Wicašta kin de tipi wakan kin de wicoope ko on taku šica eye cin ayaštan šni.

14 Jesus Nazareth etanhan qon he tipi kin de ihangye ca, wicohan Moses unqupi qon hena yutokeca kta ce, eya naunhonpi ce.

15 Unkan omniciye kin en iyotankapi kin owasin ophahta yukanpi, qa ite kin he mahpiya ohnihde wan ite kin iyececa wanyakapi.

OHANYANPI QON WICOWOYAKE 7.

1 Hehan wosna kagapi itancan kin heya; Hena hecetu he?

2 Unkan iye hehan heya; Wicašta hunkawanjinciyapi, ateciyapi ko anamagoptan po. Wowitan Wakantanka kin, Abraham ateunyanpi Mesopotamia en ounye ciqon, Charran en ahiti kin he itokam, en ikpazo;

3 Qa heciya; Nita makoce qa nitakuye kin etanhan ya wo, qa makoce wan cicipazo kte cin he ekta u wo, eciya.

4 Hehan Chaldeya makoce kin etanhan hiyu qa Charran en ahi ti. Hen atkuku kin ta, unkan hetanhan makoce kin en nakaha oununyanpi kin den ahi ti.

5 Unkan tawa kte cin siha oahe kin hinskokeca qu šni, tuka he yuhe kta qa iyohakam cinca kin yuhapi kta e qu kta iwahoya; nahahin cinca wanica.

6 Unkan Wakantanka kaken eya; He cinca kin makoce tokeca en unhdaka unpi kta; unkan hen wowidake wicayuhapi, qa waniyetu opawinge topa hehanyan šicaya wicakuwapi kta.

7 Qa oyate kin hena wowidag wicayuhapi kte cin he wicamdaco kta; qa he iyohakam etanhan hiyupi kta qa makoce kin den ohomadapi kta ce, Wakantanka eya.

8 Hehan bakihdayapi wicoope kin he qu. Unkan hecen Isaak cincaya, qa anpetu išahdogan hehan bakihdaya. Isaak Jakob cincaya; qa Jakob hunkakewicayapi akenonpapi qon cincawicaya.

9 Unkan hunkakewicayapi qon Joseph inakiwizipi, qa Egypta ekta wiyopekiyapi. Tuka Wakantanka kici un;

10 Qa wokakije kin owasin etanhan ehdaku, qa Pharoah Egypta wicaštayatapi kin itokam wowaonšida woksape ko qu; unkan Egypta en wicašta itancan kaga, qa iye ti kin ocowasin en.

11 Hehan Egypta makoce Kanaan ko owancaya wicaakihan, qa nina wicakakija; unkan hunkake wicunyanpi kin taku yutapi iyeyapi šni.

12 Tuka hehan Egypta heciya wamnaheza yukan, Jakob nahon, unkan hunkake wicunyanpi kin tokaheya ekta ye wicaši.

13 Unkan inonpa hehan, Joseph hunkawanjinwicaye cin sdonkiyewicakiye, ca hehan Joseph otakuye kin Pharoah en oyakapi.

14 Hehan Joseph atkuku kin wahoye ca kico, qa takuwicaye cin owasin nakun, wicanagi wikcemna šakowin sanpa zaptan.

15 Hecen Jakob Egypta ekta apamahde iyaye ca hen ta, iye qa nakun hunkake wicunyanpi kin:

16 Unkan Sychem ekta awicayapi, qa wicahnakapi wan, Abraham Sychem atkuku Emmor he cinca kin, mazaska on, opewicakicaton qon he en wicahnakapi.

17 Tuka anpetu wahoyapi, Wakantunka Abraham konza iwahoye ciqon he wanna kiyadan u, hehan oyate kin icage ca Egypta en ihduotapi.

18 Hehan wicaštayatapi tokeca wan Joseph sdonye šni kin he icaga.

19 Unkan he qe takuwicunyanpi kin wicahnaye ca, hunkake wicunyanpi kin šicaya ecawicakicon, hecen hokšiyoqopa kin nipi kte šni e tankan ehpewicakiyapi qon.

20 He ehan Moses tonpi, he qe hokšiyopa owanyag wašte hinca; unkan wi yamni hehanyan atkuku ti kin otina icahkiyapi.

21 Qa tankan ehpeyapi, hehan Pharoah cunwintku kin eyaku, qa iye cinca kin hecen icahya.

22 Unkan Moses Egypta oyate wicoksape kin owasin onspekiyapi, qa wicoie, wicohan ko on wašaka.

23 Unkan wanna waniyctu wikcemna topa, hehan hunkawanjitku Israel cinca kin wanwicahdag ye kta wacinyuza.

24 Qa wanji šicaya ecakiconpi kin he wanhdake cehen, okiye ca šicaya ecakiconpi qon he tokicicon, qa Egypta wicašta kin kaštaka.

25 Hunkawanjitku kin, iye nape kin on Wakantanka wiconi wicaqu kte cin he iyukcanpi kta kecin, tuka okahnigapi šni.

26 Ihanhanna hehan ake kicizapi kin en taniniciye ca wookiye wicakicage kta wacin qa heya; Wicašta hunkawanjin yeciyapi, tokeca šicaya ecayeciconpi he?

27 Tuka tuwe takodaku kin šicaya ecakicon kin he paha iyeye ca, Tuwe unkiyepi en wicašta itancan qa wayaco nicaga he?

28 Egypta wicašta htanihan yakte qon he iyecen mayakte kta he? eya.

29 Wicoie kin de on Moses nape ca Madian makoce kin en hewotahedan un, qa hen hokšidan nom cinca wicaya.

30 Unkan wanna waniyetu wikcemna topa ihunniyan, hehan hewoskan makoce kin en Sinai Paha kin hetu, can yuhaha wan ohna peta ide kin en, Itancan taohnihde wan taniniciya.

31 Unkan Moses he wanyake cehan, wowanyake kin on yušinyaya; qa tanyan wanyake kta e on kiyedan ya, hehan Itancan ho kin en tanin;

32 Qa, Nihunkake Wakantanka tawapi kin he miye; Abraham ta Wakantanka, Isaak ta Wakantanka, qa Jakob ta Wakantanka kin, eya. Unkan Moses cancan qa ekta etonwan okihi šni.

33 Unkan Itancan kin heciya; Nitahanpe kin hdušdoka wo, tukten nayajin kin he maka wakan ce.

34 Ekta ewatonwe ca, Egypta en mitaoyate token kakijapi kin he wanmdake ca comnihdazipi kin nawahon, qa wicawakiyuške kta e on kun hibu ; unkan nakaha u wo, Egypta ekta ye ciši kta.

35 Moses aktapi šni qa; Tuwe wicašta itancan qa wayaco nicaga he? eciyapi qon he Wakantanka wicašta itancan wanikiya ko kage ca ye ši, mahpiya ohnihde can yuhaha kin en taniniciye cin he nape kin on.

36 Unkan hee tankan awicau, qa taku on yušinyayapi wapetokeca ko, Egypta makoce kin en, Mde sa ekta, qa hewoskan makoce kin etu, waniyetu wikcemna topa hehanyan econ.

37 Moses Israel cinca kin; Hunkawanjin wicayayapi etanhan wicašta wokcan wan miye iyemaceca, Itancan Wankantanka nitawapi kin icahniciciyapi kta, he anayagoptanpi kta ce, ewicakiye ciqon he dee.

38 Qa hewoskan makoce kin ekta okodakiciye kin kici un qon hee, Sinai paha kin etu, mahpiya ohnihde kin okiye ca nakun hunkake wicunyanpi kin; qa he wiconi oie kin unqupi kta e icu.

39 Unkan hee kin hunkake wicunyanpi kin anagoptonpi cinpi šni, tuka heyata iyeyapi, qa cantepi kin en Egypta ekta hdapi.

40 Qa Aaron heciyapi; Taku wakan unkitokam yapi kte cin unkicaga po; Moses Egypta makoce kin etanhan unkaupi qon he tokiya iyaya sdonunyanpi šni ce.

41 Unkan anpetu kin hena en ptejicadan wan kagapi, qa wakagapi kin he taku wakiyušnapi, qa iye nape kagapi kin on wiyuškinpi.

42 Hehan Wakantanka ihduhomni, qa mahpiya ohnaka kin ohodapi kta e awicayuštan; wicašta wokcan tawowapi en kagapi kin he iyececa; Israel ti kin woteca ktepi wošnapi ko, hewoskan makoce kin en, waniyetu wikcemna topa hehanyan mayaqupi he?

43 Unkan ito Molok tawakeya kin, qa Remphan taku wakan yadapi wicanllpi tawa kin he iyacupi; hena wakagapi kin itokam canpeška makehde inayajinpi kta e yakagapi: Unkan ito Babylon akotanhan aciyapi kta ce.

44 Hunkake wicunyanpi kin hewoskan makoce kin en waaya tanin wakeya kin yuhapi; tuwe Moses okiye ca, token wanyake cin he iyecen kage kta keciye ciqon, hee yuštan qon iyececa.

45 He hunkake wicunyanpi kin icupi, qa Joshua kici Ikcewicašta tamakoce kin en ahipi, hena e Wakantanka hunkake wicunyanpi itepi kin etanhan heyata iyaye wicaya, David taanpetu kin hehanyan;

46 He Wakantanka itokam wowaonšida iyeye ca, Jakob ta Wakantanka kin tipi wan iyekiciciye kta cin.

47 Tuka Solomon tipi wan kicaga.

48 Hececa tuka, Iyotan Wankan un kin tipi wicanape on kagapi kin ohna ti šni; wicašta wokcan hecen eye ciqon;

49 Mahpiya kin he oiyotanke mitawa kin ee, qa maka kin he misiha oahe kin hee; ecin tukte tipi miyecagapi kta he? qa tukten ozimiciye kta he?

50 Minape kin taku henana owasin kage šni he? Itancan kin eya ce.

51 Tahu nisutapi, qa cante noge ko banicihdayapi šni kin,ohinniyan Woniya Wakan kin yakipajinpi, nihunkakepi econpi qon he niye iyenicecapi.

52 Wicašta wokcan kin tukte wanji e nihunkakepi kin šicaya kuwapi šni he? Wanji Owotanna un kin he u kte cin tona oyakapi qon hena wicaktepi; qa he qe niš niyepi wanna iyopeyayapi qa yaktepi.

53 Mahpiya ohnihde ahipi kin he eciyatanhan woope kin iyacupi, tuka tanyan yeciyuhapi šni ce, eya.

54 Unkan hena taku kin nahonpi hehan, cante kin ekta nina iyoyakapi, qa hi ahdakokokapi.

55 Tuka iye Woniya Wakan kin ojudan mahpiya ekta opahta yanke ca, Wakantanka towitan kin, qa Jesus Wakantanka etapa kin eciyatanhan najin e he wanyaka;

56 Qa heya; Wanyaka po, mahpiya kin yuzamnipi, qa Wicašta Cinhintku kin Wakantanka etapa kin eciyatanhan najin e wanmdaka ce, eya.

57 Hehan hotankakiya hotaninpi, qa nogepi kin ohmus hduzapi, qa tawacin wanjidan on iyahpayapi;

58 Qa otonwe kin tankan ehpeyapi, qa inyan on kininpi. Unkan waayataninpi kin wokoyake kin koška wan, Saul eciyapi, he siha kin en ekihnakapi.

59 Unkan Stephanos inyan on kininpi, he icunhan cekiye ca heya, Jesus Itancan, minagi kin ehdaku wo.

60 Hehan canpeška makehde inajin qa hotankakiya hoyekiya; Itancan woahtani kin de iyepi kin en awicau šni wo. Hena hecen eye ca hehan ištinma iyaya.