Roma 8-11 (Romans 8-11)

ROMA OYATE WOWAPI WICOWOYAKE 8.

1 Heon etanhan, nakaha tona Jesus Messiya en un kin, hena wiconte iwicayacopi wanin unpi, wicacehpi eciyatanhan manipi šni, tuka Woniya kin eciyatanhan.

2 Wiconi Woniya toope kin Jesus Messiya en un kin, he woahtani wiconte ko woope kin etanhan makiyuška.

3 Woope kin wicacehpi eciyatanhan wašake šni un qon he taku okihi šni kin hee Wakantanka econ, iye Cinhintku wicacehpi wahtani ouncage kin en hiyuya, woahtani on, qa wicacehpi kin en woahtani yaco.

4 Hecen tona wicacehpi kin eciyatanhan maunnipi šni, tuka Woniya eciyatanhan, unkiyepi en woope wicoowotanna kin ecetu kta.

5 Tona wicacehpi eciyatanhan un kin hena wicacehpi taku tawa kin awacinpi; qa tona Woniya kin eciyatanhan un kin hena taku Woniya tawa kin awacinpi.

6 Wicacehpi awacinpi kin he wiconte kin ee; tuka Woniya awacinpi kin he wiconi qa wookiye kin hee.

7 Wicacehpi wicotawacin kin he Wakantanka toka ya. He Wakantanka toope kin ope šni, qa nakun ecaca okihi šni.

8 Hecen tona wicacehpi kin en un kin hena Wakantanka iyokipi yapi kta okitpanipi.

9 Tuka niyepi wicacehpi kin en yaunpi šni, Woniya kin en yaunpi, Wakantanka Taniya kin niyepi kin en ounye cinhan. Qa tuwe Messiya Taniya kin yuhe šni kinhan he tawa šni.

10 Qa Messiya en niunpi kinhan, wicatancan kin he woahtani eciyatanhan ta, tuka wicanagi kin he wiconi un, wicoowotanna eciyatanhan.

11 Tuwe Jesus wicate cin etanhan najin kiye ciqon he Taniya kin niyepi en ounye cinhan, tuwe Messiya wicate cin etanhan najin kiye ciqon hee nitancan tapi kte cin ekicetu ye kta, iye Taniya Wakan niyepi en ounye cin he eciyatanhan.

12 Heon etanhan, mihunkawanji, wicacehpi kin takudan ikicazo šni unyakonpi, on etanhan wicacehpi kin eciyatanhan unnipi kta.

13 Wicacehpi kin eciyatanhan yanipi kinhan nitapi kta; tuka Woniya kin eciyatanhan wicatancan wicohan kin te yakiyapi kinhan yanipi kta.

14 Wakantanka Taniya kin tona yus awicaye cin hena Wakantanka cinca wicaye cin eepi.

15 Ake wokokipe kta e on ookiyeyapi woniya kin iyacupi šni, tuka cinhintkuyapi Woniya kin he iyacupi, on Abba, Ate, eya hoyeunkiyapi ece.

16 Qa Wakantanka cinca kin heuncapi e unnagipi kin kici Woniya kin e unyuotaninpi.

17 Unkan uncincapi kinhan tawayapi kte cin heuncapi; Wakantanka tawayapi; Messiya kici tawayapi kte cin; kici unkakijapi kinhan, nakun kici wowitan unhapi kta ce.

18 De nakaha wicokakije kin he, wowitan unkiyepi en ecadan yutaninpi kte cin kici akiyecen yawapi kta e iyecece šni wadaka.

19 Wakantanka cinca wicayutaninpi kte cin on taku kagapi kin cantokpaniyan ape yanka.

20 Taku kagapi kin he woecetu šni kin en ihukuya ye kta cin šni, tuka tuwe woape on he wowidagye cin hee on etanhan.

21 Qa taku kagapi kin hee kaeš wicahwin wowidagyapi kin etanhan kiyuškapi kta, qa Wakantanka cincawicaye cin ihduhapi wowitan kin en yeyapi kta.

22 Taku icage cin owasin dehanyan witaya comnihdazi, qa hokšiksuya un e sdonunyanpi.

23 Qa hecedan šni, tuka unkiš eya Woniya kin taku tokaheya icahya unhapi kin, unkiyepi qe comniunhdazipi,qa atayedan cinca yapi kte cin unkapepi, unkitancanpi ekicetu ye kte cin hee.

24 Woape kin on niunyanpi; tuka woape wanyakapi kin he woape kin ee šni, tuwe taku wanyake cinhan tokeca e nahahin ape yanka he?

25 Tuka taku wanunyakapi šni kin he unkapepi hecinhan, hehan wacintankapi on unkicupi kta e ape unyakonpi ece.

26 Qa nakun Woniya kin iš waunšakapi šni kin en icunhan ounkiyapi ece. Token wocekiye unkeyapi kte cin sdonunkiyapi šni, tuka Woniya kin e qe unkiyepi on wocekiye eya, howayapi oyagpica šni kin on.

27 Qa tuwe wicacante iyukcan kin he Woniya kin token wacin yuze cin sdonya, he Wakantanka tawacin kin eciyatanhan tona owotanna un kin hena on wocekiye eya ece.

28 Unkan Wakantanka wašte dakapi kin hena taku owasin tanyan owicakihan ece e sdonunyanpi, tona iye tawacin kin eciyatanhan wicakicopi kin hena.

29 Tona otokaheya tanhan sdonwicakiye ciqon hena wicakiconza, iye Cinhintku ouncage kin en icagapi kte cin heon, qa hecen he hunkawanjitku ota ehna tokapa kta.

30 Qa tona wicakiconze ciqon hena wicakico; qa tona wicakico qon hena wicayaowotanna; qa tona wicayaowotanna qon hena iš eya wicayutan.

31 Heon etanhan hena taku kin en taku unkeyapi kta he? Wakantanka unkicipi un kinhan, tuwe kašeunyanpi kta he?

32 Tuwe iye Cinhintku kin kpatan šni, tuka unkiyepi owasin on kpagan qon, he iye kici taku owasin iyakicuya unqupi kte šni he?

33 Tona Wakantanka wicakahnige cin hena tuwe taku iyawicaonpe kta he? Wicayaowotanna kin he Wakantanka kin ee ce.

34 Tuwe wayaco kta he? Tuwe te ciqon he Messiya ee, qa ake piya ikicage cin hee, Wakantana etapa kin eciyatanhan yanke ca, unkiyepi on wocekiye eciya.

35 Tuwe Messiya towašte kin etanhan unyušpapi kta he? Wicokakije, wošitkihda, wicokicize, wicaakihan,tancowicakadan, wokokipe, qa mazasagye okihi kta he?

36 (Owapi qon he hecetu, Niye kin on anpetu ohinniyan unktepi unyakonpi, tahinca ktepi kte cin iyecen unyawapi ce.)

37 Tuka hena taku kin owasin en, tuwe canteunkiyapi qon he eciyatanhan, tanyan ohiye unyakonpi.

38 Heon, wiconte, qa wiconi, qa mahpiya ohnihde cin hena, qa wokiconze kin, qa wicowašake kin, qa taku nakaha un kin taku u kte cin ko;

39 Qa taku wankantuya un kin, qa taku mahentuya un kin, qa taku icage cin tokeca, takudan Wakantanka towašte, Jesus Messiya Itancan unkiyapi en un kin, he etanhan unyušpapi kte šni e sdonwaye hinca.

ROMA OYATE WOWAPI WICOWOYAKE 9.

1 Messiya eciyatanhan wowicake epe, itonšni mawanica, minagi kin hee e Woniya Wakan kin kici mahdutanin:

2 Nina iyomakišice ca micante ekta ohinniyan iyokišin waun.

3 Mihunkawanji qa tona wicacehpi eciyatanhan takuwicawaye cin hena on, Messiya etanhan mayacopi tawatenwaya owakihi tuka.

4 Hena Israel wicašta kin hecapi, qa atayedan cinkši wicaye cin hena eepi, qa wowitan, qa wicotakuye, qa woope wicaqupi kin, qa wawokiyapi kin, qa wahoyapi kin hena tawapi.

5 Qa hunkake wicayapi kin etanhanpi kin hena eepi, qa hena etanhan wicacehpi eciyatanhan Messiya inapa, he owasin iwankam Wakantanka kin ee, owihanke wanin wowašte yuha nunwe.

6 Wakantanka oie kin ecetu šni aye cin he wake šni. Tona Israel etanhanpi kin hena owasin Israel hecapi šni.

7 Qa Abraham etanhan icagapi kin heon owasin cincapi kin hecapi šni. Tuka, Isaac etanhanpi kin hena nicinca ewicakiyapi kta ce.

8 He kaketu, tona Wakantanka cinca wicaye cin hena wicacehpi eciyatanhan cinca wicayawapi qon heon etanhan šni, tuka tona cinca wahoyapi qon hena e wicowazi kin ee iyawapi.

9 Wahoyapi wicoie kin he decetu, Omaka dehantu kinhan wau kta, qa Sara cinhintku wan ton kta ce.

10 Qa heceyedan šni, tuka Rebecca nakun wanjidan on, Isaak ateunyanpi kin hee on, ihdušake cehan,

11 Nahanhin tonpi šni, taku wašte taku šica ko unmana nahanhin econpi šni, Wakantanka tawacin kin wicakahnigapi kin en sutaya un kte cin heon, wicohan kin eciyatanhan šni, tuka tuwe wicakico kin he eciyatanhan;

12 Hehan heciyapi, Hakakta kin he tokapa kin wowidag ye kta ce.

13 Owapi qon he kaketu, Jakob wašte wadaka, tuka Esau šice wadaka ce.

14 Hecen token unkeyapi kta he? Wakantanka owotanna šni econ he? Hiya hecetu šni.

15 He Moses heciya; Tuwe onšiwakida kte cin he onšiwakida kta, qa tuwe wacin en mduze kte cin he wacin en mduze kta ce.

16 Heon etanhan tuwe cin kin eciyatanhan šni, qa tuwe inyanke cin he nakun eciyatanhan šni, tuka Wakantanka onšiwicakida kin he eciyatanhan ece.

17 Wowapi wakan kin he Pharoah heciya; He dee on etanhan icahciya, niye en mitowašake kin wahduotanin kta, qa maka owancaya micaje kin oyakapi kte cin heon.

18 Heon etanhan tuwe kahnige cinhan, he onšikida ece; qa tuwe kahnige cinhan he yutehi ece.

19 Hecen hemayakiye kta nace; Tokeca e nahanhin wicaba he? tuwe e iye tawacin kin ecetušniya he?

20 Hiya, wicašta kin, niš nituwe he, hecen Wakantanka i en hiyeyaya he? Taku kagapi kin he tuwe kage cin, Tokeca hecen mayakaga he, eciye kta he?

21 Maka wakšica kage cin heca maka kin okihi šni he, upšija omnaye wanjidan etanhan wakšica wan woyuonihan, qa wanji iš wowištece on kage kte šni he?

22 Hecen Wakantanka wocanniye kin hdutanin kta cin, qa towašake kin sdonye unkiyapi kta e on wocanniye wakšica wicotakuni šni kicagapi qon hena wawacinkta yuza tanka on wicakuwa kinhan;

23 Qa tona wowaonšida wakšica kin otokaheya tanhan wowitan on wiyeya ehnakapi qon, hena en iye towitan wowijice kin hduotanin kta.

24 He wicakico kin hena unkiyepi, Juda oyate etanhanpi kin hecedan šni, tuka nakun Ikcewicašta etanhanpi.

25 Hosea en heye ciqon iyececa; Tona mitaoyate šni kin hena mitaoyate ewicawakiye kta, qa wašte dakapi šni qon he wašte dakapi kin ewakiye kta.

26 Qa tukten, Mitaoyate kin he niyepi šni ce, ewicakiyapi qon, hen, Wakantanka ni un cinca kin ewicakiyapi kta ce, eya.

27 Isaiah iš eya Israel oyate kin on hotanin; Israel cincapi kin miniwanca wiyaka sukaza iyecen ota yawapi ešta, tona okaptapi kin henana nipi kta ce, eya.  

28 Wayawapi yuptecedan kta qa wicoowotanna en hduštan kta; maka akan Itancan kin wayawapi ptecedan wan kage kta.

29 Qa he itokam Isaiah heye ciqon; Sabaoth Itancan kin wicowazi wan unkokicicaptapi šni unkanš, Sodom iyecen unyakonpi kta, qa Gomorra en unkiyoptapi kta tuka.

30 Hecen token unkeyapi kta he? Ikcewicašta kin wicoowotanna iyeyapi ce, wacinyanpi kin eciyatanhan wicoowotanna kin hee.

31 Tuka Israel wicoowotanna woope odepi qon hena wicoowotanna woope kin iyohipi šni.

32 Tokeca he? Wacinyanpi kin eciyatanhan šni, tuka woope wicohan kin eciyatanhan odepi kin, heon etanhan. Inyan ibotopi kin de on siha ibotopi.

33 Wowapi kagapi qon iyececa; Wanyaka wo, Zion en inyan ibotopi, qa imnija on hicahanpi wan ewahde; qa tuwe he wacinye cinhan inihan kte šni.

ROMA OYATE WOWAPI WICOWOYAKE 10.

1 Mihunkawanji, micante cantiheye ca taku Wakantanka icewakiye cin, Israel oyate kin wicani kte cin hee.

2 Hena wicaweciyaotanin, Wakantanka wacin en yuzapi tuka he wosdonye eciyatanhan šni.

3 Wakantanka toowotanna kin sdonyapi šni, qa iye wicoowotanna tawapi kin hduautapi akitapi, qa Wakantanka toowotanna kin he ihukuya iyeiciyapi šni.

4 Tona wicadapi kin owasin en Messiya kin he wicoowotanna woope woyuštan kin hee.

5 Woowotanna woope kin eciyatanhan kin he on Moses kaken owa qon; Wicašta tuwe hena taku kin econ kinhan, hee hena on ni kta ce.

6 Tuka wacinyanpi eciyatanhan wicoowotanna un kin he kaken eya, Nicante kin mahen, Messiya kun ahi kte cin heon tuwe mahpiya ekta wankan ye kta he?

7 Kaeš, Wicate cin etanhan Messiya yuwankan au kte cin heon tuwe wosbe kin ekta ye kta he? eye šni wo.

8 Tuka taku eya he? Wicoie kin he nikiyedan un, nii kin ohna, qa nicante kin en un, wacinyanpi wicoie unkoyakapi kin he hee.

9 Nii kin on Jesus Itancan kin yahdaotanin, qa he wicate cin etanhan Wakantanka ekicetu ye cin he, nicante kin eciyatanhan wicayada kinhan, yani kta.

10 Wicoowotanna kta e wicacante on wicadapi, qa wiconi kta e wicai kin on wohdakapi ece.

11 Wowapi wakan kin he heya, Tuwe he wacinye cinhan, he wištece kte šni ce.

12 Juda qa Helenes oyate kin kici ocikpanipi wanica. Tuwe owasin en Itancan kin he tona hoyekiyapi kin hena owasin en wijinya un.

13 Tona Itancan caje kin hoyekiyapi kinhan hena otoiyohi nipi kta.

14 Tuka tuwe kin wacinyanpi šni kinhan token on he hoyekiyapi kta he; qa he nahahin nahonpi šni kinhan token waeinyanpi kta he; qa tuwedan oyakešni kinhan token nahonpi kla he.

15 Qa ekta ye wicašipišni kinhan token oyakapi kta he? Owapi qon he hecetu; Tona wookiye wotanin wašte kin oyakapi, qa taku wašte en wotanin wašte oyakapi kin hena sihapi kin iyotan wašte ce.

16 Tuka owasin wotanin wašte kin anagoptanpi šni. Isaiah heye ciqon; Itancan, tuwe unkoyakapi kin wicada he?

17 Heon etanhan wanahonpi kin eciyatanhan wicadapi kin u, qa wanahonpi kin he Wakantanka oie kin eciyatanhan.

18 Unkan miš, Hena nahonpi šni he? epe. Han, hena oqo kin makoce owasin ekta iyaye ca wicoie kin maka ihanke kin hehanyan i.

19 Qa Israel oyate kin he sdonyapi šni he? Tokaheya Moses heya, Tona oyate šni se un kin hena on iyocipaštakapi kta, qa ikce oyate wacinton šni wan on šinhdaciyapi kta ce.

20 Tuka Isaiah nina waditake ca heya; Tona omadepi šni qon hena e iyemayanpi, qa tona amakitapi šni qon hena en mihdutanin ce.

21 Qa Israel oyate kin hewicakiya, Anpetu osan oyate wanahon šni qa wacetunhdapi kin he nape wicawakiyugata ce.

ROMA OYATE WOWAPI WICOWOYAKE 11.

1 Heon hepa, Wakantanka taoyate kin ehpewicakiya he? Hiya hecetušni. Israel wicašta kin hemaca, Abraham cinca, qa Benjamin wicoun kin hematanhan.

2 Wakantanka taoyate kin tona otokaheya tanhan sdonwicakiye ciqon hena ehpewicakiye šni. Wowapi wakan Elijah on token eye cin sdonyayapi šni he? Wakantanka cekiye ca, Israel oyate kin cajeyata qa heya;

3 Itancan, wicašta wokcanpi nitawa kin hena wicaktepi, qa wahna wošnapi nitawa kin yujujupi, qa miye mišnana omakaptapi, unkan te mayanpi kta akitapi ce.

4 Tuka Taku Wakan kin token eya ayupta he? Nahahin Baal en canpeska makehde inajinpi šni kin wicašta kektopawinge šakowin wicawahduha ce.

5 He iyecen nakaha wowaonšida wicakahnigapi kin eciyatanhan hunh okaptapi.

6 Qa he wowaonšida  eciyatanhan kinhan hehan wicohan eciyatanhan šni; hecetu šni kinhan, wowaonšida  kin wanna wowaonšida  heca šni. Qa wicohan eciyatanhan kinhan, hehan wowaonšida  eciyatanhan šni; hecece šni kinhan, wicohan kin wanna wicohan heca šni.

7 Hecen toketu kta he? Israel taku akite ciqon he iyeye šni, tuka tona wicakahnigapi kin hena e iyeyapi, qa unniapi kin ištagonge wicayapi.

8 (Wowapi qon iyececa; Wicahba wicacante kin Wakantanka wicaqu, ista on wiwanyakapi kte šni, qa noge on winahonpi kte šni,) anpetu kin dehanyan.

9 Qa David heya; Wahna wotapi tawapi kin he mazahtakiyapi, qa wihmunke, qa wonahnaye, qa iyunwin yuhapi kin hee kta ce.

10 Išta kin aotpaswicayapi kte, heon wawanyakapi kte šni; qa cankahu ohinniyan patuš inajinpi nunwe.

11 Heon hepe; Hinhpayapi kta on hicahanpi he? Hiya hecetu šni; tuka hicahanpi kin on etanhan Ikcewicašta kin wiconi iyowicahi, hena iš eya iyowicapaštakapi kta e heon.

12 Hena e hicahanpi kin he wicoicage kin en wowijice kin hee, qa hena wioayuaoptetu kin he Ikcewicašta kin en wowijice kin hee hecinhan, wicayuecetupi kin he sanpa hince kta.

13 Ikcewicašta henicapi kin hena hecen eciciyapi; Ikcewicašta kin ekta yemašipi waun, qa heon mitohtani kin wahdutan.

14 Hecen tona micehpi etanhanpi kin hena inahni wicawaye kta, kinhan wanjikji ni wicawaye kta.

15 Hena ehpewicayapi kin he wicoicage kin en wookiye kin hee hecinhan, hena ake wicayuecetupi kinhan he taku kta he; wiconte etanhan wiconi kin hee kta?

16 Taku tokaheya suton kin he wakan kinhan, ocowasin hecece kta; qa can huta kin he wakan kinhan, can adetka kin hena nakun hecece kta.

17 Unkan can adetka kin hena wanjikji yuksapi, qa niš can wihdi hu ikceka henica, tuka can adetka qon ehna can kin en icahniyanpi, qa can wihdi cepa can huta kin etanhan, en opeya yaun kinhan;

18 Can adetka qon on ihdatan šni wo. Nihdatan keš can huta kin he duhešni tuka can huta kin hee niyuha.

19 Hehan, Hen emahdepi kta on can adetka qon yuksapi ce, ehe kta naceca.

20 Han, hecetu; wicadapi šni kin heon hena yuksapi, qa niye wacinyanpi on ecen nayajin ece. Wahanicida šni qa kokipa wo.

21 Can adetka tawa qon hena Wakantanka kpatan šni hecinhan, okinni niš eya nikpatan kte šni.

22 Wakantanka towaonšida tocantiyahde ko wanyaka po; tona hinhpayapi qon hena en wocantiyahde, qa niye en wowaonšida kin, wowaonšida  kin he en nayajin kinhan, tuka heeanon šni kinhan niš eya nicaksapi kta.

23 Qa hena cetunhdapi ecen unpi šni kinhan, iš eya ake can kin en iyekiyapi kta. Ake can kin en Wakantanka icahwicaya okihi.

24 Qa niye can wihdi ikceya icage ciqon etanhan nicaksapi, qa inicage cin eciyatanhan šni, can wihdi wašte kin en iyeniyanpi kinhan, tona can kin he aicage ciqon hena iyotan ake can wihdi tawapi kin en iyeyapi kta. 

25 Mihunkawanji, wowiyukcan kin de sdonye šni dukanpi kta wacin šni, okinni ksape nicidapi kta; Israel oyate kin apa ištagonge aya, Ikcewicašta kin ocowasin en hiyu kte cin hehanyan.

26 Qa hecen Israel oyate kin owasin nipi kta. Wowapi en kagapi qon iyecetu; Zion etanhan Wanikiya wan u, qa woahtani Jakob yutokan iyekiciciye kta.

27 Qa woahtani yutokan iyewicaweciciye cinhan hehan wicotakuye wicawaqu kte cin hee ce.

28 Wotanin wašte kin ekta, hena niyepi kin on etanhan toka wicayawapi, tuka wicakahnigapi kin ekta, hena e hunkakepi kin on etanhan wašte wicakidapi.

29 Wakantanka taku wicaqu qa wicakico kin hena iyopeiciyapi wanin un.

30 Unkan niš niyepi kin ehanna Wakantanka anayagoptanpi šni, tuka nakaha hena wicadupi šni kin on wowaonšida  nicupi.

31 He iyecen nakaha hena is eya anagoptanpi šni kin, niye nitowaonšida kin on etanhan onsiwicadapi kta.

32 Hena owasin witaya wicadapi šni kin en Wakantanka onawicataka, iyuhpa onšiwicada kta heon etanhan.

33 Wakantanka toksape qa wosdonye tawa wowijica ošbe kin he tanka hinca. Woyaeo tawa kin okahnihpica šni, qa tacanku kin iyeyepica šni.

34 Tuwe Itancan tawacin kin sdonya he? qa tuwe okiya un he?

35 Qa tuwe he tokaheya taku qu he; kinhan kicicajujupi kta?

36 lye etanhan, qa iye eciyatanhan, qa iye ohna taku owasin un; owihanke wanin wowitan kiciun nunwe.