Johannes 3-6

JOHANNES WICOWOYAKE 3.

1 Wicašta wan Pharisee etanhan Nicodemus eciyapi, Juda oyate itancanpi kin he wanji ee;

2 Hanyetu wan Jesus yanke cin en i qa heciya; Itancan, waonspekiye Wakantanka eciyatanhan u kin henica sdonunniyanpi; taku wapetokeca ecanon ece kin tuwedan hecen okihi šni, Wakantanka kici un šni kinhan.

3 Unkan Jesus ayupte ca heciya; Wowicake, wowicake eciyatanhan heciciya, Wicašta kin wankantanhan teca nien tonpi šni kinhan Wakantanka tokiconze kin uanyaka okihi kte šni.

4 Wicašta kin kan ehantanhan token ecin teca ni en tonpi kta he? Ake hunku tezi kin mahen kihde ca ake teca ni en tonpi kta he token okihi kta he? Nicodemus eciya.

5 Unkan Jesus ayupte; Wowicake, wowicake eciyatanhan heciciya, Wicašta kin mini qa Woniya kin on tonpišni kinhan Wakantanka lokiconze kin en tin iyaya okihi kte šni ce, eya.

6 Tuwe wicacehpi on tonpi kin he wicacehpi, qa tuwe Woniya kin eciyatanhan tonpi kin he woniya.

7 Wankantanhan nitonpi kta ce, eciciye cin heon ihnuhan niyušinyaye cin.

8 Tateyanpa kin tokiyatanhan cin eca eciyatanhan ipogan ece, qa oqo kin he nayahon, tuku tokiyatanhan u, qa tokiya ye cin he sdonyaye šni. Wicašta Woniya kin eciyatanhan tonpi kin owasin hecetu.

9 Nicodemus ayupte ca heciya; Hena token okihipica he?

10 Jesus ayupte ca heciya; Israel en waonspekiye cin heni ca, tuka dena oyakahnige šni he?

11 Wowicake, wowicake eciyatanhan heciciya; Taku sdonunyanpi kin hena unkeyapi ece, qa taku wanunyakapi kin dena unkoyataninpi, tuka wounyataninpi kin ayaktapi šni.

12 Taku maka kin detanhan ociciyakapi kin wicayadapi šni ehantanhan, mahpiya kin ckla taku ociciyakapi kinhan hee token wicayadapi kta he?

13 Nahahin tuwedan mahpiya kin ekta I šni, tuwe mahpiya kin eciyatanhan kuntkiya u, qa hi kin he Wicašta Cinhintku kin hee, nahahin nakun mahpiya kin ekta yanka.

14 Nakun hewoskan wanmduška Moses wankan ehde qon he iyecen Wicašta Cinhintku kin wankan ehdepi kta.

15 Heon tuwe awacin kinhan owihanke kte šni, qa owihanke wanin wiconi yuhe kta.

16 Wakantanka oyate kin cantewicakiya, heon Cinhintku išnana icage cin wicaqu, qa tuwe awacin kinhan owihanke kte šni, tuka owihanke wanin wiconi yuhe kta.

17 Wakantanka Cinhintku kin wicoicage kin en u ši kin, heon oyate kin wicayaco kta e hecon šni; tuka iye on oyate kin nipi kta e hecon.

18 Tuwe he wacinye cinhan he yacopi kte šni; tuka tuwe wacinye šni kinhan he wanna yacopi; Wakantanka Cinhintku išnana icage cin he caje kin wacinye šni kin heon etanhan.

19 Wicayacopi kin he kaketu; Oyate kin iyoyanpa en wicahiyohi, tuka wicašta kin otpaza e waštedakapi, qa iyoyanpa e cinpi šni, wicohan šicapi kin heon.

20 Tuwe taku šica icon kin he iyoyanpa šice daka, qa iyoyanpa ikiyedan u šni, ohan iyopeyapi kte cin heon.

21 Tuka tuwe wowicake eciyatanhan ohanye cin he iyoyanpa kin en u, ohan yuotaninpi kta, Wakantanka eciyatanhan ohanye cin heon.

22 Hena iyohakam Jesus waonspewicakiye cin om Juda makoce kin en i; qa en om un. qa baptem wicaqu.

23 Unkan he icunhan Johannes iš eya Enon Salim ikiyedan baptem wicaqu, hen mini ota kin he etanhan. Unkan baptem wicaqupi kta e etkiya aye.

24 Hehanyan hinyahin Johannes kaškapi šni.

25 Hehan taku hdokinicapi, Johannes waonspewicakiye cin wanjikji qa Juda wicašta om, wicayujajapi kin he icahtagya.

26 Unkan Johannes ekta ipi qa heciyapi; ltancan, Jordan wakpa akasanpa tanhan tuwe kici yaun qa daotanin qon he, iho, wanna baptem wicaqu, unkan owasin en ece iyoptapi.

27 Unkan Johannes waayupte ea heya; Wicašta kin mahpiya eciyatanhan taku qupi šni ehantanhan takudan iye cinka icu okihi kte šni ece.

28 Messiye kin he miye šni, tuka itokam u mašipi ce, epe ciqon he niye sdonyayapi.

29 Tuwe tawicu ton kin he hihna yanpi kin hee, tuka hihna yanpi takodaku kin en taninyan anagoptan najin, qa hihna yanpi ho kin nahon kin heon iyuškin ece. Heon etanhan wowiyuškin mitawa kin wanna yuecetupi ce.

30 lye kin nina sanpa icage kta, tuka miye yuhukun amaye kta.

31 Tuwe wankan tanhan hi kin he taku owasin iwankam ounye. Tuwe maka etanhan hi kin he maka etanhan, qa maka kin iye cenya oie kiton. Tuwe mahpiya kin eciyatanhan hi kin he taku owasin on iyotan.

32 Qa taku wanyake ca taku nahon kin he owasin yaotanin ece; tuka taku yaotanin kin tuwedan wicada šni.

33 Taku yaotanin kin he tuwe wicada kinhan Wakantanka wicake cin he yutanin ece.

34 Wakantanka tuwe u ši kin he Wakantanka oie oyaka; Wakantanka Taniya kin iyuta qu šni, ocowasin qu.

35 Atkuku kin Cinhintku waštekidake ca, taku owasin iye nape kin en qu:

36 Hecen tuwe Cinhintkuyapi kin, wacinye cinhan owihanke wanin wiconi kin wanna yuha; tuka tuwe wacinye šni kinan, he wiconi wanyake kte šni, tuka Wakantanka tocanniye kin wanna akan un.

JOHANNES WICOWOYAKE 4.

1 Jesus waonspewicakiya ota icicage ca baptem wicaqu, Johannes econ qon sam iyeya, Pharisee kin hecen nahonpi, he Itancan kin sdonya,

2 (Tuka Jesus iye atayedan baptem wicaqu šni, waonspewicakiye cin hena heconpi,)

3 Hehan Juda makoce kin ayuštan, qa Galilee heciya ake ekta hda.

4 Qa Samariya he en ncankuyo kta iyececa.

5 Hecen otonwe wan Sykar eciyapi Samariya makoce en, Joseph en ounye ktu e Jakob  atkuku qu qon he ikiyedan, he ekta hi.  

6 Jakob miniyowe tawa kin he etu; Jesus mdokite hda, qa miniyowe kin he ahankeya iyotanka. Anpetu kin he en wiyotanhe cin hehantu.

7 Samariya oyate etanhan winohinca wan mini huwe hi; unkan Jesus, Mini maqu wo, eciya.

8 He lcunhan waonspewicakiye cin otonwe kin ekta taku yutapi opeton iyayapi.

9 Winohinca Samariya oyate etanhan qon hecen eya, Juda wicašta kin henica, Samariya oyate kin hematanhan, he tokeca e mini mayakida he? Juda oyate Samariya oyate kici takudan ikicitukapi wanice ciqon.

10 Jesus ayupte ca heciya; Wakantanka taku wicaqu kin he, qa, Mini maqu wo, eniciye cin he tuwe kin sdonyaya unkanš, niye yakida kta, kinhan mini wiconi kin nicu kta tuka ce.

11 Itancan, mini kin de temahentuya hiyeya qa takudan on edaku kte šni; tokiya tanhan mini wiconi kin duha he? winohinca kin eciya.

12 Jakob ateunyanpi miniyowe kin de unqupi, qa etanhan iye mini yatkan, qa cinca qa tawanunyanpi ko, he hecon tuka niye iniyotan he?

13 Unkan Jesus ayupte ca heciya; Tuwe mini kin de etanhan yatke cin nakun ipuza kta;

14 Qa tuwe mini waqu kte cin etanhan yatke cin icimana ipuza kte šni. Tuka mini waqu kte cin he owihanke wanin wiconi iyahdeya kaduze kta, eya.

15 Unkan winohinca kin heciya; Itancan, mini kin he etanhan maqu ye, hecen imapuza kte šni, qa nakun icimana mini kin de huwe wahi kte šni, eya.

16 Unkan, Nihihna kico ya wo, qa den kici hi wo, Jesus eciya.

17 Tuka winohinca kin waayupte ca heciya; Mihihna kin wanica ce. Nihihna wanica kehe cin he hecetu e ecen eha ce;

18 Nihihna zaptan, tuka nakaha hihnayaye cin de nitawa šni; hecen ehe cin he wicayaka ce, Jesus eciya.

19 Hehan winohinca kin heciya; Itancan, wicašta wokcan kin henica imdukcan;

20 Hunkake wicunyanpi paha kin de en ohodapi ece; tuka niye, Jerusalem he en wicašta ohodapi ece e kta, kehapi ce.

21 Unkan Jesus heciya; Winohinca, wicamada wo, anpetu wan u ce, paha kin de en, qa Jerusalem nakun en, Ateyapi kin ohoyadapi kte šni.

22 Niye taku ohoyadapi kin sdonyayapi šni; unkiye taku ohoundapi kin sdonunyanpi ece. Juda oyate kin eciyatanhan wanikiyapi kin u ce.

23 Tuka anpetu u kin he wanna hiyohi, tona wowicake eciyatanhan ohodapi kin hena woksape wowicake eciyatanhan Ateyapi kin ohodapi kta. Ateyapi kin he tona hecen ohodapi kte cin akita ece.

24 Woksape kin he Wakantanka kin ee; qa tona ohoda kinhan hena woksape wowicake eciyatanhan ohoda kta.

25 Hehan winohinca kin heciya; Messiya Sdayapi eyapi kin hi kta, tohan hi kinhan taku kin owasin unkokiyakapi kta e sdonwaya.

26 He miye e ociciya ce, Jesus eciya.

27 He icunhan waonspewicakiye cin en hdipi, qa winohinca kin kici okiciciya un kin heon yušinyayapi. Tuka wanjidan; Taku ayakita he? kaeš, Tokeca kici iyaa he? eyapi šni.

28 Hehan winohinca kin wakiškokpa ehpeya kihde ca, otonwe kin ekta ki, qa wicašta kin hewicakiya;

29 Wicašta wan taku ecamon qon owasin omiciyake cin he ito wanyag u miye. He Messiya kin ee šni he?

30 Hehan otonwe kin etanhan enanpa, qa yanke cin en ai.

31 He icunhan waonspewicakiye cin cekiyapi qa, Itancan, wota wo, eciyapi.

32 Tuka iye hewicakiya; Taku yutapi sdonyayapi šni kin heca wate kta e mduha ce.

33 Heon, Tuwe taku yutapi kahi he? waonspewicakiye cin ekiciyapi.

34 Tuka Jesus hewicakiya; Tuwe u maši kin he tawacin kin ecen ecamon kta, qa iye tohan kin weciyuštan kte cin he taku wate cin ee.

35 Ehake wi topa kinhan taku mnauntanpi kta ce, ehapi? Tuka miš kaken eciciyapi; Wankan etonwanpi qa maga kin wanyaka po, wanna owasin ska qa mnayanpi kin wanna iyehantu.

36 Qa tuwe taku mnaye cin he wokajuju icu ece, qa owihanke wanin wiconi waskuyeca mnayan ece; hecen on tona woju, qa tona mnaye cin napin wiyuškinpi kta.

37 Wanji woju qa wanji mnayan, eyapi qon dee e wicakapi.

38 Niye htayanipi šni tuka wamnayanpi he eeon cišipi. Wicašta tokeca htanipi unkan he htanipi kin en niye oyapapi.

39 Winohinca kin, Token ecamon qon owasin omiciyaka ce, eye ciqon heon wicašta Samariya oyate otonwe kin he en ota Messiya hee kin wicadapi.

40 Heon Samariya oyate Jesus en hipi qa cekiyapi, iye tipi kin en un šipi. Unkan nonpa can hen un.

41 Unkan ia nahonpi kin hehan wicota wicadapi.

42 Qa, Taku odake cin he etanhan wicaundapi kin hee šni, unkiš eya naunhonpi, Messiya hee qa oyate wanikiye kte cin hee e sdonunyanpi, winohinca kin eciyapi.

43 Anpetu nonpa iyohakam hehan hetanhan ye ca Galilee heciya hda.

44 Jesus iye atayedan hdaotanin, wicašta wokcan kin heca iye tamakoce kin en yuonihanpi šni ece.

45 Unkan Galilee ekta ki, hehan Galilee wicašta kin iyowinkiyapi, Jerusalem ekta wošnapi kin icunhan taku econ qon owasin wanyakapi kin heon etanhan; iš eya wošnapi kin ekta ipi nakaeš.

46 Unkan Galilee en Kana otonwe kin, mini ikceka miniša icahye ciqon he ake en hdi. Unkan Kapernaum ekta wicašta itancan wanji cinhintku wayazanka:

47 He Jesus Juda makoce kin hetanhan Galilee en hi, nahon kin heon ekta ye ca cekiya, cinhintku kin asniye kta e ekta u kta; wanna te kta ikiyedan.

48 Hehan Jesus heciya; Taku wowanyake wowapetokeca ko wandakapi šni keš wicayadapi kte šni ce.

49 Unkan wicašta itancan kin heciya; Itancan, micinkši te šni itokam ktin u wo.

50 Tuka Jesus heciya; Hunktiya wo, nicinkši ni ce. Unkan wicašta kin Jesus ie cin wicada, qa ekta hda.

51 Tiyatakiya hda, unkan wicašta wowidake wicayuhe cin awicakipa, unkan, Nicinkši kin ni ce, eya okiciyakapi.

52 Wi kin tohan yanka hehan asni aya he, eya iwicawanga. Unkan, Htanihan wiyotanhan kitiinna inašdoka, hetanhan tancan kata ayuštan ce, eyapi.

53 Unkan atkuku kin tohan Jesus, Nicinkši ni ce, eciye ciqon hehantu e kiksuya. Unkan iye qa tiyohnaka tawa koya wicadapi.

54 Jesus Juda makoce etanhan Galilee icicawin en hdi, wowapetokeca econ kin icinonpa kin he dee.

JOHANNES WICOWOYAKE 5.

1 Hehan iyohakam Juda oyate omniciye wan kagapi he icunhan Jesus Jerusalem he en i.

2 Jerusalem en tahinca wanunyanpi tiyopa kin he en ikiyadan, mini kiwitayapi, Hebrew iapi Bethesda eciyapi, zaptankiya aohanziya hdepi.

3 Hena ohna wicašta wayazanka ota, hušte, ištagonga, tataka ko ota en makan hiyeya, mini škanškan ape hiyeya.

4 Tohan iyehantu eca, mahpiya ohnihde wan mini kin en hi qa škanškanya ece. Tokiya yazan kin owasin tohan mini kin he škanškan eca tuwe tokaheya en iyohpeiciya eca asni ece.

5 Wicašta wan he en wanka, waniyetu wikcemna yamni sanpa šahdogan hehanyan wayazanka.

6 Wicašta kin he makata wanka, wanakaja tanhan wayazanka Jesus wanyaka, qa, Anisni kta yacin he? eciya.

7 Wicašta wayazanke cin heciya; Itancan, mini kin škanškan keš tuwedan en iyohpemaye šni; en mde kta keš tuwe tokeca mitokam en iyeiciya ece.

8 Najin, owinja ehdaku qa mani wo, Jesus eciya.

9 Unkan ecahankeya wicašta kin akisni, qa owinja kin ehdaku, qa mani. Unkan anpetu kin he anpetu wakan.

10 Heon etanhan Juda oyate kin wicašta asniyanpi qon heciyapi; Nakaha anpetu wakan; owinja yecin kin he hecetu šni ce.

11 Tuwe as,nimaye cin he, Owinja ehdaku qa mani wo,emakiya ce, ewicakiya.

12 Hehan, Wicašta kin, Owinja ehdaku qa mani wo, eniciye cin he tuwe he? eya iwangapi.

13 Tuka wicašta asniyanpi kin he tuwe kin sdonye šni: he icunhan wicota hen unpi hecen Jesus icunonpa iyaya.  

14 Hehan iyohakam tipi wakan en wicašta kin he Jesus wanyaka, unkan, Wanyaka ye, wanna anisni; icimana wahtani šni wo; okinni ake taku wanji šica sanpa tanka iyanihde kta ce, eciya.

15 Unkan wicašta kin he kihde ca, Tuwe asniye ciqon he Jesus ee, Juda oyate owicakiyaka.

16 Heon etanhan Juda oyate Jesus kuwa ayapi, qa anpetu wakan kin icunhan hena econ kin heon teyapi kta e akitapi.

17 Unkan, Ate nahahin htani he etanhan miš eya htawani, Jesus ewicakiya.

18 Unkan Juda oyate hehan iyotan Jesus teyapi kta sanpa  akitapi, anpetu wakan botica, qa nakun Wakantanka atayedan  Ateya keiciye cin, Wakantanka kici akiyecen ihdawa kin, hehon etanhan.

19 Unkan Jesus waayupte ca hewicakiya; Wowicake, wowicake eciyatanhan heciciyapi, Cinhintkuyapi kin takudan iye cinka econ kta okihi šni; Ateye cin taku econ wanyaka eca, hehan Cinhintku kin iš eya iyecen econ ece.

20 Ateyapi kin Cinhintku wašte kidake cin heon taku econ kin hena owasin onspekiya; qa nakun ceš wicohan dena sanpa tanka onspekiye kta, hecen ininihanpi kta.

21 Ateyapi kin tuwe ta keš niye ca wiconi wicaqu ece; he iyecen Cinhintku kin iš tona cin kinhan wiconi wicaqu ece.

22 Nakun Ateyapi kin tuwedan yaco šni, tuka woyaco owasin Cinhintku kin qu.

23 Heon etanhan owasin Ateyapi kin token ohodapi hecinhan he iyecen Cinhintku kin ohodapi kta. Tuwe Cinhintku kin ohoda šni kin he Atkuku u ši kin he nakun ohoda šni.

24 Wowicake, wowicake eciyatanhan heciciyapi, Tuwe mioie kin anagoptan, qa u maši kin he awacin kinhan, owihanke wanin wiconi yuhe kta; qa woyaco en i kte šni, wanna wiconte etanhan wiconi ekta e i.

25 Wowicake, wowicake eciyatanhan heciciyapi, Anpetu wan u qon wanna hi, wicašta ta tona Wakantanka Cinhintku ho kin nahon kta; qa tona nahon kinhan hena ni kta.

26 Ateyapi kin iye cinka wiconi hduha, he etanhan Cinhintku kin iš iye cinka wiconi hduhe kta e qu.

27 Qa nakun wowašake woyaco kin he nakun Cinhintku qu, Wicašta Cinhintku kin e heon etanhan.

28 Ihnuhan hena ininihanpi kin do; anpetu wan hi kta ce, wicašta wicahapi kin owasin iye ho kin nahonpi kta;

29 Qa hninanpapi kta, tona wašte econpi kin hena wiconi woekicetu ekta; qa tona taku šica econpi kin hena woyaco woekicetu ekta hiyupi kta.

30 Miye cinka taku ecamon owakitpani; taku mdaco kin hena taku nawahon kin heciya tanhan; qa taku mdaco kin hena hecetu. Miye mitawacin he owakide šni, tuwe u maši kin he tawacin owade.

31 Miye mihdaotanin kinhan, taku mdaotanin kin he wowicake šni.

32 Wanji tokeca mayaotanin ece; unkan wayaotanin iye mayaotanin kin he wowicake e sdonwakiya.

33 Johannes ekta ye wicayašipi; unkan taku yaotanin kin wowicake kin hee.

34 Tuka wicašta akantu wayaotaninpi kin iwacu šni; tuka dena on yanipi kta e heciciyapi.

35 He peta ijanjan iyege ca okitanin; unkan iyoyanpa tawa kin on kohanna iyuškin wacannipi.

36 Tuka Johannes sam iyeya tanka wayaotanin mduha; wicohan ecamon kta Ate maqu qon hena e ecamon ece; Ate umaši e yuotanin kin hena ee.

37 Qa Ateyapi umaši qon he nakun mahduotanin: He tohinni ho kin nayahonpi šni, qa itohnake wandakapi šni:

38 Qa oie kin en niunpi šni, tuwe u ši kin he wicayadapi šni, heon etanhan.

39 Wowapi wakan kin en akita po; heciyatanhan wiconi owihanke wanica duhapi kecannipi; unkan omayake cin hena ee.

40 Tuka owihanke wanin wiconi duhapi kta e on miye en mayaupi yacinpi šni.

41 Wicašta ekta mitawootanin kin awecite šni.

42 Tuka Wakantanka waštedakapi kin he en niunpi šni e sdonciyapi.

43 Ate cajeyan wahi, tuka iyowinmayakiyapi šni; tuwe iye caje atayedan hduha hi kin hee iyowinyakiyapi kta.

44 Niye iyakitedan nitawootaninpi kin ayecitapi, qa Wakantanka eciyatanhan wootanin kin ayakitapi šni, he token on wicayadapi kta he?

45 Ate en aciyapi kta e kecanmakinpi šni po; Moses he wacinyayapi qon he iye taku iyanionpapi ce.

46 Moses wicayadapi unkanš miš eya wicamayadapi kta tuka. He miye on wowapi kaga.

47 Tuka iye wowapi kage cin hena wieayadapi šni kinhan, ecin token mioie kin wicayadapi kta he?

JOHANNES WICOWOYAKE 6.

1 Hena iyohakam Jesus Galilee mde kin, he nakun Tiberias mde kin ee, he akasanpa iyaya.

2 Unkan oyate ota ihakam yapi, wicašta wayazanpika en wapetogya ohanyan wanyakapi qon heon etanhan.

3 Unkan Jesus paha wan ekta iyaya, qa waonspewicakiye cin om akan iyotanka.

4 Unkan woacakšin, Juda oyate wošnapi tawapi wan, he wanna ikiyedan ihan.

5 Jesus išta yuwankan ikikcu, qa wicota iye yanke cin en au wanwicayake cehan, Philip heciya; Aguyapi dena yutapi kte cin tokiyatanhan opeuntonpi kta he?

6 He yukcan kta on etanhan heciya; token econ kte cin he sdonkiya tuka.

7 Hehan Philip ayupte; Kašpapidan opawinge noupa aguyapi iyopeyapi, qa otoiyohi cikcistinna icupi ešta, nakun iyowicahi kte šni ce, eya.

8 Hehan waonspewicakiye cin wanji, Simon Inyan sunkaku, Andrew eciyapi, he nakun heciya;

9 Psin ska aguyapi zaptan qa hogan nom hena den hokšidan wan yuha; tuka wicota qa henana on token hanpica he?

10 Unkan, Wicašta kin iyotanke wicaši po, Jesus eya. He en peji ota. Wicašta kin hena iyotankapi, unkan kektopawinge zaptan iyecetu.

11 Hehan Jesus aguyapi kin hena icu qa yawakan, qa waonspewicakiye cin wicaqu; unkan waonspewicakiye cin iyotang hiyeye cin wicakipamnipi; qa nakun hogan tohanyan cinpi kin.

12 Unkan imnanpi hehan waonspewicakiye cin hewicakiya, Oyaptapi kin hena pahi po, hecen takudan atakuni kte šni.

13 Unkan psin ska aguyapi oyaptapi qon he etanhan makanopiye ohnaka ake nonpa pahipi; wotapi etanhan iwicakiciyaye cin hena ee.

14 Taku wapetogya Jesus econ kin oyate kin wanyakapi, qa heon heyapi, Wicašta wokcan itancan oyate en hi kta keyapi qon he wanna dee.

15 Oyate kin Jesus icupi, qa wicaštayatapi kah wacinpi e sdonkiya, qa paha kin icunonpa akan išnana iyaya.

16 Unkan wanna htayetu hehan waonspewicakiye cin mde kin ektakiya yapi;

17 Qa wata wan en opapi qa mde kin he opta yapi, Kapernaum heciya i wacinpi. Unkan otpaza tuka nahanhin Jesus ekta wicahi šni.

18 Unkan tateyanpa hinca, on etanhan mde kin nina taja aya.

19 Unkan wiyutapi wikcemna nonpa sam zaptan, kaeš wikcemna yamni hehanyan watopapi, hehan wata kin ikiyedan Jesus mini kin amani u wanyakapi; unkan yušinyayapi.

20 Tuka, He miye ce, ihnuhan koyakipapi kin do, ewicakiya.

21 Hehan iyokipiya wata kin en iyowinkiyupi; unkan tokiya yapi qon, wata kin kohanna he en ihunni.

22 lhanhanna hehan oyate mde kin icahda yukanpi kin, hen wata wanica, wanji waonspewicakiye cin en opapi qon heceyedan, qa Jesus waonspewicakiye cin om wata kin en ope šni, tuka waonspewicakiye cin išnana iyayapi, he wanyakapi:

23 Tuka Jesus aguyapi yawakan qa yutapi qon he en ikiyadan Tiberias eciyatanhan wata toktokeca en hipi. 

24 Oyate kin Jesus waonspewicakiye cin om he en yukanpi šni wanyakapi, unkan oyate kin wata kin hena en opapi qa mde kin opta yapi, Jesus Kapernaum heci un kin he akin yapi.

25 Unkan mde kin akasanpa hen iyeyapi qehan, heciyapi; Itancan tohinni den yahi he?

26 Jesus awicayupte ca heya; Wowicake, wowicake eciyatanhan heciciyapi, Omayadepi kin he taku wapetokeca wandakapi kin heon hecanonpi šni, aguyapi imnahan yatapi qon e heon.

27 Taku yutapi on wicatakuni šni heon htanipi šni po; tuka taku yutapi owihanke wanin wiconi hehanyan kte cin hee on htani po, he Wicašta Cinhintku kin nicupi kta; Wakantanka Ateyapi kin wanna he askamton.

28 Hehan heciyapi; Token econkupi kta, on Wakantanka tohan kin unkohanyanpi kta he?

29 Jesus waayupte ca hewicakiya; Wakantanka wicohan tawa kin he dee, tuwe u ši kin he wicayadapi kta.

30 Heon etanhan heciyapi; Taku wapetokeca ecanon kin tukte e heon, wanunyakapi qa wicaunnidapi kta? taku yakaga he?

31 Hunkake wicunyanpi kin eya wanna hewoskan manna yutapi qon; Mahpiya eciyatanhan aguyapi yutapi kta e wicaqu ce, eya owapi qon he iyececa.

32 Unkan Jesus hewicakiya; Wowicake, wowicake eciyatanhan heciciyapi; Moses aguyapi kin he mahpiya kin eciyatanhan nicupi šni; tuka Atewaye cin he aguyapi wowicake kin mahpiya eciyatanhan nicupi.

33 Aguyapi Wakantanka tawa kin he tuwe mahpiya eciyatanhan kuntkiya u, qa oyate wiconi wicaqu kin hee.

34 Unkan, Eca Itancan, aguyapi kin he ohinniyan unqu po, eciyapi.

35 Tuka Jesus hewicakiya; Aguyapi wiconi kin he miye ce. Tuwe en mau kinhan wotektehda šni un kta; qa tuwe wicamada kinhan ipuza šni un kta.

36 Eya wanna wanmayadakapi, tuka wicamayadapi šni e, eciciyapi qon.

37 Ate tona maqu kin owasin miye en mau kta; qa tuwe en mau kinhan tankan iyewaye kte šni.

38 Mahpiya eciyatanhan wahi kin, he mitawacin owape kte šni, tuwe u maši kin he tawacin owecipe kta.

39 Atewaya u maši kin he tawacin kin he dee, tona maqu kin wanjidun toki ehpewaye šni, ecen anpetu ihankeya kin piya icahwaye kta.

40 Tuwe u maši kin he tawacin kin he dee, tona Cinhintkuyapi kin he wanyake ca wicada kin hena owihanke wanin wiconi yuhe kta, qa anpetu ihankeya kin he en piya icahwaye kta.

41 Heon Juda oyate kin ajijipi ; Aguyapi mahpiya eciyatanhan kun u kin he miye ce, eye ciqon heon etanhan.

42 Qa heyapi; Jesus Joseph cinhintku qon he dee šni he, atkuku hunku ko sdonwicunyanpi ce: hecen token, Mahpiya eciyatanhan wahi ce, eya okihi he?

43 Heon Jesus waayupte ca hewicakiya; Niye iyakitedan waajijipi šni po.

44 Tuwedan iye cinka en mau kte šni, Ate u maši qon tuwedan en au šni kinhan, qa anpetu ihankeya kin en piya icahwaye kta.

45 Unkan owasin Wakantanka eciyatanhan onspewicakiyapi kta ce, wicašta wokcan kin en eya owapi qon. Heon tona Ate waonspewicakiye ca anagoptanpi kin hena owasin en maupi kta.

46 Tuwedan Ateyapi kin tohinni wanyake šni, tuwe Wakantanka etanhan u kin hecedan Atkuku wanhdaka.

47 Wowicake, wowicake eciyatanhan heciciyapi, Tuwe miye wicamada kinhan, he owihanke wanin wiconi yuhe kta.

48 Aguyapi wiconi he miye.

49 Nihunkakepi kin hewoskan manna yutapi, tuka tapi.

50 Mahpiya eciyatanhan aguyapi hi kin he dee, tuwe etanhan yute cinhan te kte šni.

51 Aguyapi ni un kin he miye, mahpiya eciyatanhan wahi; tuwe etanhan yute cinhan owihanke wanin ni kta. Aguyapi wicawaqu kte cin he micehpi kin ee, he oyate wicani kta e wicawaqu ce, eya.

52 Wicašta kin de iye cehpi etanhan unqupi qa untapi kta heye cin, he token okihi kta e heya he, Juda oyate iyakitedan eya hdokinicapi.

53 Hehan Jesus hewicakiya; Wowicake, wowicake eciyatanhan heciciyapi; Wicašta Cinhintku kin cehpi etanhan yatapi šni, qa we kin datkanpi šni kinhan wiconi takudan en niunpi kte šni.

54 Tuwe micehpi etanhan yute ca mawe yatke cinhan owihanke wanin wiconi yuha ece, qa anpetu ihankeya kin en piya icahwaye kta.

55 Micehpi kin he woyute otancanke, qa mawe kin he woyatke otancanke.

56 Tuwe micehpi yute ca mawe yatke cin he mici un, qa miš kici waun.

57 Ate u maši kin he ni un, qa Ate on ni waun, he etanhan tuwe mayute cinhan miye on ni un kta.

58 Aguyapi mahpiya eciyatanhan hi kin he dee. Nihunkakepi manna yutapi qon de iyecece šni, he yutapi tuka tapi. Tuwe aguyapi kin de etanhan yute cinhan owihanke wanin ni kta ce, eya.

59 Capernaum en omniciye tipi kin he ohna waonspekiya icunhan hena hecen eya.

60 Heon etanhan waonspewicakiye cin ota he nahonpi qehan, Wicoie kin de tehika ce, tuwe e nahon okihi kta he, eyapi?

61 Unkan Jesus waonspewicakiye cin hena heya ajijipi kin, iye atayedan sdonye ca hewicakiya; Tokeca de iyanipatopi he?

62 Wicašta Cinhintku kin wankan un qon ake ekta kihde ca, wandakapi kinhan, tokeca kta he?

63 Woniya kin he wiconi kaga ece, wicacehpi kin takudan okihi šni. Wicoie eciciyapi kin hena woniya qa wiconi kin hee.

64 Tuka wanjikji he wicayadapi šni. Otokahe ekta tanhan tona wicadapi kte šni, qa nakun tuwe wiyopeye kte cin hena Jesus sdonya.

65 Unkan heya; He etanhan heciciyapi qon, Tuwedan iye cinka en mau okihi kte šni, tuwe Atewaye cin he qu kinhan heceyedan okihi kta.

66 Hecetu, unkan heon waonspewicakiye cin ota ayuštanpi, qa icimana ihakam yapi šni.

67 Hehan Jesus akenonpapi kin, Niš eya yahdapi kta he, ewicakiya?

68 Unkan Simon Inyan ayupte; Itancan, tuwe ekta unyanpi kta he? owihanke wanin wiconi wicoie duhe cin.

69 Qa Messiya Wakantanka ni un Cinhintku kin he niye e wicaundapi qa sdonunyanpi ye, eya.

70 Unkan Jesus awicayupte; Akeninonpapi kin miye cicahnigapi šni he; tuka wanji wakanšica yaunpi ce, eya?

71 Simon cinhintku Judas Iskariyot he ke ca hecen eya. Ake nonpapi kin he etanhan tuka he wiyopeye kte cin ee.