Ohanyanpi Qon (Acts) 3-5

We are praying that everyone stays safe and warm during this crazy weather. God be with y'all!

OHANYANPI QON WICOWOYAKE 3.

1 Unkan hehan Inyan qa Johannes kici, tipi wakan kin ekta kaitawankanhde yapi, napcinwanka ape ein, wocekiye eyapi ece kin hehantu.

2 Unkan wicašta wan tonpi kin ehantanhan hušte un kin he yuha ahipi, anpetu otoiyohi tipi wakan tiyopa wan, Wašte eciyapi kin he en ehdepi, tona tipi wakan tin yapi kte cin hena taku wicakida kte cin heon.

3 Hee Inyan Johannes kici tipi wakan kin timahen yapi kta wanwicayake ca, taku wicakida.

4 Unkan Inyan opahta, qa Johannes kici, qa, Ekta unkatonwan po, eya.

5 Taku okini kta kecin qa hecen anawicagoptan yanka.

6 Hehan Inyan; Mazaska mazaskazi ko takudan mduhe šni, tuka taku mduhe cin cicu kta, Jesus Messiya Nazareth etanhan, he caje on najin, qa mani wo, eciya.

7 Qa nape etapa kin en yuze ca najin kiya; unkan ihnuhanna siha iškahu ko wašag hinhda.

8 Hehan iye kin psin iyaye ca najin, qa mani, qa om tipi wakan kin timahen iyaya, mani, qa psipsica, qa Wakantanka idowan.

9 He mani qa Wakantanka idowan kin oyate kin iyuhpa wanyakapi;

10 Qa wicašta tipi wakan, tiyopa Wašte eciyapi, kin en hiyotanke ca taku da ece qon he dee sdonyapi; qa taku ecakiconpi kin on etanhan nina inihanpi, qa yušinyayapi.

11 Unkan, wicašta hušte qon wanna okizi kin he Inyan qa Johannes kici wicayus najin, hena en oyate owasin kiwitaya inyang iheyapi, qa nina yušinyayapi, omanipi Solomon tawa kin hetu.

12 Unkan Inyan he wanyake cehan, oyate kin hewicakiya; Israel wicašta, tokeca he on niyušinyayapi, qa tokeca opaunhtapi nayajinpi he? unkiye wowašake qa wowašte unhduhapi kin heon wicašta kin de mani unyanpi kecanunyakinpi seca?

13 Abraham, qa Isaak, qa Jakob Wakantanka tawapi; hunkake wicunyanpi Wakantanka tawapi kin he Cinhintku Jesus wanna hdutan; he niyepi e wicayaqupi, qa Pilate itokam yakipajinpi, he iye kiyuške kte hinca tuka.

14 Tuka Wanji Wakan qa Owotanna un kin he niye yakipajinpi, qa wicakte sa wan kiyuškapi yacinpi.

15 Qa Wiconi Itancan kin he yaktepi; he qe Wakantanka wicate cin etanhan najinkiye cin unkiye unkoyakapi ece.

16 Qa iye caje kin, caje wicadapi kin heon, wicašta kin de wandakapi qa sdonyayapi kin he yuwašaka; han, iye wacinyanpi kin he wicašta kin de tanyan okiziya, niyepi owasin en.

17 Unkan nakaha mihunkawanji, iyukcan šni hecanonpi, qa wicašta itancan wicaduhapi kin hena nakun, he sdonwaya.

18 Tuka Wakantanka Messiya token kakije kte cin, wicašta wokcan kin owasin i kin eciyatanhan, oyake ciqon hena he en hduecetu.

l9 Heon ihduecetupi, qa ihduhomni po; hecen wayahtanipi kin nicicajujupi kta ce; tohan anpetu yuecetupi kin Itancan itohnake kin eciyatanhan u kinhan;

20 Qa Jesus Messiya oniciyakapi qon he u kta.

21 He qe mahpiya kin ekta eyakupi kta, taku owasin ekicetuyapi kta anpetu kin hehanyan, Wakantanka niaka icage cin hetanhan wicašta wokcan wakan wicahduhe cin owasin i kin eciyatanhan oyake ciqon hee.

22 Moses iye qe hunkakeyapi kin hewicakiya; Nihunkawanjipi kin etanhan wicašta wokcan wanji, miye iyemaceca, Jehovah Wakantanka nitawapi kin icahniciciyapi kta; he taku eniciyapi kte cin owasin anayagoptanpi kta.

23 Qa wicanagi otoiyohi, wicasta wokcan kin he unagoptan šni kinhan, he oyate kin etanhan ihangyapi kta ce.

24 Unkan wicašta wokcan owasin, Samuel hetanhan, tona iyohakam woyakapi qon anpetu kin dena cajeyatapi.

25 Wicašta wokcan cincapi kin he niyepi, qa wicoun Wakantanka hunkake wicunyanpi wicakicage ciqon, he qe Abraham heciya; Unkan nicinca kin on etanhan wicowazi maka akan un kin owasin yawaštepi kta ce.

26 Wakantanka iye Cinhintku Jesus najinkiye ca niyawaštepi kta e on niyepi tokaheya en u ši, otoiyohi wayahtanipi kin etanhan ihduhomni niyanpi kta e heon.

OHANYANPI QON WICOWOYAKE 4.

1 Unkan hena hecen oyate kin ewicakiyapi kin icunhan, wošnapi kagapi, qa tipi wakan en itancan kin, Sadducee ko en wicahipi:

2 Oyate kin waonspewicakiyapi, qa Jesus eciyatanhan wiconte etanhan woekicetu kin he oyakapi kin heon šihdapi;

3 Qa nape on iyawicahpayapi, qa wicakaška tipi kin en iyewicayapi, ihanhanna kte cin hehanyan; wanna htayetu nakaeš.

4 Tuka wicoie nahonpi qon hena wicota wicadapi; unkan wicašta kektopawinge zaptan ecetu.

5 Unkan ihanhanna hehan, wicašta itancanpi, hunkawicayapi kin, wowapi kagapi ko;

6 Qa Annas wošna kagapi itancan, qa Kaiaphas, qa Johannes, qa Alexandros, qa tona wošna kagapi itancan takuwicaye cin hena koya Jerusalem en mniciyapi.

7 Unkan wicacokaya ewicahdepi, qa wiwicawangapi; Taku wowašake, qa tuwe caje kin on hecanonpi he? eyapi.

8 Hehan Inyan Woniya Wakan on ojudan, hecen ewicakiya; Oyate en wicašta itancanpi, qa Israel hunkawicayapi kin;

9 Anpetu kin de wicašta hušte qon tanyan ecakiconpi, qa token on okizi kin, he on wiunyanungapi hecinhan;

10 Niyepi owasin, qa Israel oyate kin owasin de sdonya po, Jesus Messiya Nazareth etanhan, icipaweh oyakatanpi qon, Wakantanka wicate cin etanhan ekicetuye cin, he caje on wicašta kin de nitokam okizi najin.

11 Inyan kin de ticagapi yaunpi kin ayaktapi šni, tuka he oise en itancan kin ee.

12 Qa tuwe tokeca eciyatanhan wanikiyapi kin yuke šni; qa wicacaje tokeca mahpiya kin ihukuya wicašta wicaqupi, on unnipi kte cin wanica ce.

13 Unkan Inyan qa Johannes waditakapi kin he wanyakapi, qa taku ota onspeiciciyapi šni qa wicašta ikceka kin hecapi e sdonyapi qehan, nina yušinyayapi, qa hena Jesus kici unpi qon he iwicayukcanpi.

14 Qa wicašta okiziyapi qon he wiciyopeya najin wanyakapi; unkan taku awicayuptapi kte cin takudan yuhapi šni.

15 Tuka omniciye kin etanhan tankan ye wicašipi, hehan he akiiapi;

16 Qa iyakitedan hekiciyapi; Wicašta kin dena token ecawicunkiconpi kta hwo; wowapetokeca tanka kin de econpi kin he tona Jerusalem en yakonpi kin owasin sdonyapi, qa anaunhmanpi kta unkokihipi šni.

17 Tuka he oyate kin en anaptapi kta e heon nina wakokipe wicunkicagapi kta, qa caje kin de on tohinni wicašta wowicakiyakapi kte nunkeyapi kte šni, unkeyapi kta ce.

18 Unkan hehan wicakicopi, qa Jesus caje kin on takudan ie šni, qa waonspekiye šni wicašipi.

19 Tuka Inyan qa Johannes kici awieayuptapi qa heyapi; Wakantanka itokam, niyepi anaunnigoptanpi kta, kaeš Wakantanka anaungoptanpi kta, unma tukte owotanna kin, niš iyukcan po.

20 Taku sdonunyanpi qa naunhonpi qon hena oyake šni unyakonpi kta e unkokihipi šni.

21 Hehan ake wakokipe wicakicagapi tamwicakiyapi, qa hde wicašipi, taku on taku iyawicaonpapi kta takudan iyeyapi šni, oyate kin on etanhan; taku econpi kin heon owasin Wakantanka yatanpi.

22 Wicašta wookizi wowapetokeca kin he en econpi qon he wanna waniyetu wikcemna topa sam iyeya.

23 Unkan kihdewicayapi, hehan iye takodawicayapi kin ekta hdapi, qa wošnapi kagapi itancapi, hunkawicayapi kin ko, taku token ewicakiyapi qon owasin ohdakapi.

24 Unkan hena nahonpi qehan, witaya Wakantanka hoyekiyapi qa heyapi; Itancan Wakantanka he niye, mahpiya, maka, miniwanca qa taku ohnaka ko owasin yakaga.

25 David nitaokiye kin i kin eciyatanhan kaken ehe cin; Tokeca e Ikcewicašta kin oqoyapi, qa oyate kin taku ecinšniyan yukcanpi he?

26 Maka wicaštayatapi kin najin hiyaye ca, wicašta itancanpi kin witaya mniciyapi, Itancan kin en, qa Sdakiye ciqon he nakun.

27 Awicakehan Jesus Nicinkši wakan sdayakiye ciqon he en, Herod, qa Pontius Pilate, Ikcewicašta, Israel oyate ko mniciyapi;

28 Ehanna taku, ninape nitawacin ko on, econ yakonze ciqon, he ecen econpi kta heon etanhan.

29 Unkan nakaha, Itancan, token wakokipe unkicagapi kta tamunkiyapi kin he wanyaka wo; qa nitaokiye kin nioie nina waditagya oyakapi kta e wicaqu wo;

30 Wawokiziya on ninape kin yahdugate cin heon; qa Jesus Nicinkši wakan caje kin on taku wapetokeca, qa on yušinyayapi kte cin hena econpi kta.

31 Unkan wocekiye eyapi, hehan tukten witaya yukanpi kin he yuhuhuzapi, qa owasin Woniya Wakan kin on ojupidan, qa Wakantanka oie kin waditagya oyakapi.

32 Unkan wicota wicadapi kin hena wicacante wanjidan wicanagi wanjidan ko yuhapi; qa taku tempi kin tuwedan, he mitawa ce, eye šni; tuka taku owasin witaya yuhapi.

33 Unkan yewicašpi kin hena wowašake tanka on Jesus Itancan piya ikicage cin he oyakapi; unkan wowašte tanka owasin en un.

34 Unkan hena tuwedan takudan icakije šni unpi: tuka tuna maga, qa tipi yuhapi qon hena wiyopekiyapi, qa taku wiyopeyapi kin on taku icupi kin he ahipi,

35 Qa yewicašipi kin siha hdepi kin en ehnakapi: unkan wicašta otoiyohi taku token cinpi kin hecen pamni wicaqupi ece.

36 Unkan Joses, he yewicašipi kin Barnabas, eya cajeyatapi qon, Wicakicanpte cinhintku kin, eyapi kin he kapi, Levi wicowazi qa Cyprus makoce kin etanhan;

37 Hee makoce onšpa hduhe cin wiyopekiye ca mazaska kin hdohi, qa yewicašipi siha hdepi kin en ehnaka.

OHANYANPI QON WICOWOYAKE 5.

1 Tuka wicašta wan Ananias eciyapi, tawicu Sapphira kici, maga wan wiyopekiya;

2 Qa mazaska apa anakihbe, tawicu kin iš nakun sdotkiya; unkan apa ahi, qa yewicašipi kin sihapi kin en ehnaka.

3 Tuka Inyan heciya; Ananias, tokeca e Woniya Wakan kin oiyaton kte šni e Satan nicante kin en ocowasin iyohpaya, qa maga iyopeyapi kin apa anayakihman he?

4 Nahahin ecen un qon he ehan yahduhe šni he? qa wiyopckiyapi kin he ehan nakun nitawa šni he? Tokeca nicante ekta hecen econ wacani he? Wicašta akantu kin hee šni, tuka Wakantanka en iyatonšni ce.

5 Unkan Ananias hena oie kin nahon qehan, hinhpaye ca ta iyaya. Unkan tona hena taku kin nahonpi kin owasin nina wikopapi.

6 Unkan koška kin najinpi, qa opazuntapi, qa tankan ayapi, qa hapi.

7 He iyohakam wihiyayedan oape yamni, hehan tawicu kin taku econpi qon sdonye šni ecen tin hiyu.

8 Unkan Inyan heciya; Kana on maga iyopeyakiyapi he? omakiyaka wo. Unkan iš; Han, kana on, eya.

9 Unkan Inyan; Token on sakim Itancan Taniya kin iyutanyayapi kta ecen wacinduzapi he? Wanyaka wo, tona nihihna hapi kin hena sihapi kin tiyopa kin en najinpi, qa niye nakun tankan aniyanpi kta, eciya.

10 Hehan iš eya hecehnana iye siha kin ekta hinhpaye ca ta iyaya. Unkan koškapi qon en hiyupi, qa wanna ta e wanyakapi, hehan iš eya tankan ayapi, qa hihnaku kin kici hapi.

11 Unkan okodakiciye kin ocowasin, qa tona hena taku kin nahonpi owasin nina wikopapi.

12 Unkan yewicašipi kin napcpi kin on oyate kin en wowinihan wicohan qa wowapetokeca ota econpi. Unkan owasin wicacante wanjidan yuha Solomon omanipi tawa kin ohna yukanpi.

13 Qa wicašta tokeca tuwedan en owicapa okihi šni, tuka oyate kin wicakinihanpi.

14 Qa tona wicadapi kin sanpa ota Itancan kin en opapi, wica winyan ko wicota.

15 Hecen tona wicayazan kin hena tankan awicaupi, qa canku otoiyohi ohna, ohehdepi qa owinja ko akan ahiwicahnakapi, Inyan hen hiyaye cinhan hunh ohanzi wicaye kte cin heon.

16 Unkan, otonwe itan ihdukšan kin hena etanhan wicota Jerusalem en hipi, qa tona wayazanpi, tona taku wakanšica wicayuhnaškinyanpi ko en awicahipi; unkan owasin asnipi.

17 Hehan wošnapi kagapi itancan kin najin hiyaye ca, tonaom un kin, Sadducee wicowazi kin etanhanpi, hena winawizipi on ojupidan;

18 Qa nape on yewicašipi kin iyawicahpayapi, qa wicakaška tipi ikceka kin ohna ewicahnakapi.

19 Tuka Itancan taohnihde ye cin he hanyen wicakaška tipi tiyopa kin yuzamni, qa tankan awicau qa heya;

20 Hunktiya po, tipi wakan kin ohna inajinpi qa wiconi kin de wicoie kin owasin oyate kin owicakiyaka po.

21 He nahonpi, unkan hanhanna hin tipi wakan kin timahen yapi, qa wowicakiyakapi. Hehan wošna kagapi itancan, qa tona om un kin hena witaya iheyapi, qa omniciye tanka kin mniciye wicaši, Israel cinca hunkawicayapi kin owasin koya; unkan wicakaška tipi kin ekta wicahuweye wicašipi.

22 Tuka akicita kin wicakaška tipi kin en hipi, qa iyewicayapi šni, hehan hoši hdapi;

23 Qa heyapi; Awicakehan wicakaška tipi kin sutaya onatakapi ecen iyeunyanpi, qa tiawanyag wicakiyapi kin tiyopa kin itokam najinpi; tuka unyuhdokapi qehan, tuwedan en wanunyakapi šni.

24 Unkan wošna kagapi itancan, qa tipi wakan en itancan kin, wošnapi kagapi itancapi kin hena koya, hena wicoie kin nahonpi qehan, he toketu kta hecinhan iyukcanpi šni.

25 Hehan wanji en hi qa; Iho, wicašta wicakaška tipi kin en ewicayahnakapi qon hena tipi wakan kin ohna inajinpi qa oyate kin waonspewicakiyapi ce, eya owicakiyaka.

26 Hehan akicita tancan kin akicita ko ekta yapi qa iwaštedan awicaupi, oyate kin inyan on wicakininpi kta e kokipapi heon etanhan.

27 En awicahipi qa omniciye kin wicacokaya najin wicakiyapi; unkan wošna kagapi itancan kin wiwicawanga,

28 Qa heya; Wicacaje kin de on wowicayakidakapi kte šni, nina unkeniciyapi šni he;? unkan iho, woonspe nitawapi kin on Jerusalem ojudan yayapi, qa wicašta kin de we kin en unkayaupi kta wacannipi.

29 Hehan Inyan, yewicašipi kin om, awicayupte ca heya; Wicašta akantu hee šni, tuka Wakantanka hee e anaungoptanpi kta iyececa.

30 Jesus yaktepi qa can akan otkeyayapi qoii he atewicunyanpi ta Wakantanka kin hduecetu:

31 Hee kin Wakantanka wankan ehdaku, iye nape etapa kin ekta Itancan qa Wanikiya un kta, Israel ihduecetupi qa woahtani kajujupi kin wicaqu kta e heon.

32 Unkan unkiye, iye on, wicoie kin hena unkoyakapi ece, qa Woniya Wakan tona Wakantanka anagoptanpi wicaqu kin, he iš eya hena yuotanin ece.

33 He nahonpi qehan canteptanyanpi, qa tewicayapi kta e akiiapi.

34 Hehan Pharisee wan Gamaliel eciyapi, woope waonspekiya, qa oyate kin en okinihan, he omniciye kin en najin,qa yewicašipi kin cistiyedan tankan aye wicaši:

35 Qa hehan hewicakiya; Israel wicašta, wicašta kin dena taku ecawicakicon wacannipi kin he itonpa po.

36 Anpetu kin dena itokam Theudas icaga, he taku wicašta keiciya; unkan wicašta opawinge topa ecetu ihakam yapi; tuka he iye ktepi, qa tona wicadapi qon owasin enanakiya iyewicayapi qa takuni šni aya.

37 Qa he iyohakam Judas Galilee etanhan, owicawapi anpetu kin he ehan inajin, qa oyate ota ihakam awicaya; he nakun ihangyapi, qa tona wicadapi qon owasin enanakiya eyaya.

38 Heon nakaha heciciyapi; Wicašta kin dena wiciheyata najinpi, qa awicayuštan po; wokonze qa wicohan kin de wicašta akantu kin etanhan hecinhan atakuni kte šni;

39 Tuka Wakantanka eciyatanhan un kinahan, yujuju oyakihipi šni; okinni Wakantanka kici yeciza dukanpi kta naceca, eya.

40 Unkan he anagoptanpi, qa yewicašipi kin wicakipanpi, qa wicakapsinpsintapi qehan, Jesus caje kin on woyake šni wicašipi, qa wicakiyuškapi.

41 Unkan iye omniciye kin etanhan hdapi, qa Jesus caje kin on wowištece en awicaupi iyececa wicayawapi kin heon wiyuškinpi.

42 Qa anpetu otoiyohi tipi wakan kin ohna, qa tipi iyaza wahokonwicakiyapi, qa Jesus Messiya oyakapi ayaštanpi šni.