PALOS
EPHESUS OYATE KIN
WICOWOYAKE 1.
1 Palos,
Wakantanka tawacin kin eciyatanhan, Jesus Messiya yeši qon hee, Ephesus ekta
tona owotanna un, qa Jesus Messiya wacinyanpi kin hena wowapi cicagapi:
2 Wowaonšida,
wookiye ko, Wakantanka Ateunyanpi kin etanhan, qa Jesus Messiya Itancan
unkiyapi kin etanhan niyepi en nicipi un nunwe.
3 Jesus Messiya
Ilancan unkiyapi Wakantanka tawa, qa Atkuku kin yawaštepi nunwe; he iye Messiya
en taku mahpiya tanhan un kin wowašte wakan ocaje owasin on unyuwaštepi:
4 He en maka
kagapi kin itokam unkahnigapi qon iyececa, unwakanpi kta qa iye itokam wowašte
en iyaonpepica šni unyakonpi kte cin heon:
5 Qa iye en,
Jesus Messiya eciyatanhan cinca unyanpi, iye tawacin oiyokipi kin eciyatanhan:
6 Iye towaonšida
wowitan yatanpi kte cin on, he iye Waštekidake cin en wašteundakapi:
7 He on
wopekitonpi kin unhapi, iye we kin on, woahtani kajujupi kin hee, iye towaonšida
tanka kin eciyatanhan:
8 He iye
unkiciyuotapi, wicoksape owasin qa wookahnige ko on:
9 Qa iye
toiyokipi kin eciyatanhan, iye tawacin wowiyukcan kin sdonyeunkiyapi, he iye en
iciconze ciqon he iyecen:
10 Hecen tohan
iyehantu kinhan, wokonze kin eciyatanhan taku owasin Messiya en witaya mnaye
kta, taku mahpiya ekta un, qa taku maka akan un kin hena, iye en.
11 Qa tuwe iye
tawacin wokonze kin eciyatanhan, taku owasin kage cin he otokaheya tanhan
unkahnigapi kin, he iye en woaihpeye kin unhapi.
12 Hecen unkiye
tokaheya Messiya wacinunyanpi qon, iye towitan kin yatan unyakonpi kte cin
heon.
13 He niš
niyepi nakun, wowicake oie kin nayahonpi qehan, wotanin wašte on ni niyanpi kte
cin hee, he iye wacinyayapi, unkan Woniya Wakan wahoyapi kin he on
wapetognitonpi:
14 He taku
unhapi kte cin tokaheya wicaqu ece kin hee, taku opetonpi hdamnanpi kin u kte cin hehanyan, iye towitan yatanpi
kte cin heon.
15 Hecen miš
eya, Jesus Messiya wacinyayapi kin he, qa tona owotanna un kin owasin wašte
wicayadakapi kin nawahon kin,
16 Ehantanhan
niyepi on wopida eya amdaštan šni, qa wocekiye epa eca, ciksuyapi ece:
17 Jesus
Messiya Itancan unkiyapi Wakantanka tawa, qa wowitan Ateyapi kin hee woksape
wowiyukcan ko oniya kin nicupi kta, he iye sdonyayapi kta e heon:
18 Nitawacinpi
išta kin iyoyam niyanpi kta, hecen nicopi wowacinye kin he taku kin e sdonyayapi
kta, qa tona owotanna un kin taku tawapi kte cin wowitan wijica kin he taku;
19 Qa tona
wicaundapi kin en iye towašake tanka hinca woptecašni kin he taku kin nakun,
iye towašake wašagya ohanye cin eciyatanhan.
20 He Messiya
okicihan, wiconte etanhan najin kiye cehan, qa mahpiya ekta iye etapa kin en
ekihde:
21 Wokiconze
owasin, qa wowašake, qa wookihi, qa itancankiyapi, qa wicacaje caje yatapi kin
owasin, wiconi kin de en hecedan šni, wiconi u kte cin he nakun, hena iwankam
tehan wankantuya ekihde:
22 Qa iye siha
kin ihukuya taku owasin ekihnaka, qa taku hiyeye cin owasin iwankam okodakiciye
kin en he pa kin kaga;
23 He iye
tancan kin hee, tuwe taku owasin on owasin ojuye cin woojudan kin hee.
EPHESUS WICOWOYAKE
2
1 Unkan niš
niyepi kin woahtani wicohan šica ko en nitapi:
2 Hena ehna
ehanna mayanipi, wicoicage kin de wiconi kin eciyatanhan, qa okotonyan wowašake
kin itancan kin eciyatanhan, he taku wakan woakta šni cinca kin en ohanye cin
hee.
3 Hena om,
unkiyepi owasin ehanna unnipi, uncehpipi wacin yuze cin en, wicacehpi wicotawacin
ko wacinpi kin ecetu unyanpi, qa unmanpi kin iyecen wocantiyahde cinca kin heuncapi.
4 Tuka
Wakantanka wowaonšida kin on wijica kin he towaštedake tanka kin on wašte
undakapi kin heon;
5 Unkiye
wicohan šica ehna untapi qehan, Messiya kici niunkiyapi; wowaonšida on wiconi duhapi ece:
6 Qa Jesus
Messiya en witaya najin unkiyapi, qa mahpiya kin ekta kici kiyotang unkiyapi;
7 Hecen wiconi
u kte cin en, Jesus Messiya on cantounhnakapi kin on, towaonšida woyuha wopteca
šni kin hduotanin kta.
8 Wowaonšida kin on yanipi, wacinyanpi kin eciyatanhan, qa
he niyepi kin etanhan šni, Wakantanka taku nicupi kin hee.
9 Wicohan kin
eciyatanhan šni, okinni tuwe ihdatan kta tuka.
10 lye taku
kage cin he unkiyepi, Jesus Messiya en wicohan wašte aicah unyanpi, hena ohna
maunnipi kte cin heon otokaheya tanhan Wakantanka wiyeya ehnaka.
11 Hecen ehanna
wicacehpi ekta Ikcewicašta henicapi kin he kiksuya po, qa wicacehpi bahdayapi
eyapi, nape on econpi kin he bakihdayapi šni eniciyapi qon:
12 He ehan
Messiya yuhe šni yaunpi; Israel wokiconze kin iyenicihantupi šni, qa wahoyapi
wicotakuye kin sdonyayapi šni, wowacinye ninicapi, qa wicoicage kin en
Wakantanka codan yaunpi.
13 Tuka nakaha
Jesus Messiya en, niš niyepi ehanna itehanyan yaunpi qon, wanna Messiya we kin
on kiyadan anihipi.
14 Unkan iye
wookiye unkitawapi kin hee, iye qe napin yuwanjidan, qa cokahnagya ehnakapi qon
he yujuju;
15 Qa iye cehpi
kin en, tokakiciyapi kin woahope woope kin econ wicašipi qon he yutakuni šni;
iš iye en nonpa etanhan wicašta wanjidan teca icahye kta, hecen wookiye kage
kte cin heon etanhan.
16 Qa tancan
wanjidan on, cansusbeca kin eciyatanhan, hena napin Wakantanka kici okiciciye
wicakiye ca, heon tokakiciyapi kin kte.
17 Qa tona
tehan dukanpi qon kiyadan un kin hena ko wookiye oniciyakapi hi.
18 He
eciyatanhan Woniya wanjidan on, napin Ateunyanpi kin ekta kiyedan ipi kin he unhapi.
19 Heon
etanhan, detanhan togkicihdapi, qa oyate tokeca kin henicapi šni; tuka tona owotanna
unpi kin hena om yatipi, qa Wakantanka tiyohnaka tawa kin he niyepi:
20 Qa yewicašipi
wicašta wokcanpi ko taku ahehde tawapi kin akan tinicagapi, Jesus Messiya he
oise en otancanke kin hee.
21 Iye ohna
tipi kin ocowasin ayucoco ehnakapi, qa Itancan kin en tipi wakan icaga.
22 He ohna
niyepi nakun ptaya tinicagapi, Woniya kin eciyatanhan, Wakantanka tipi ye kte
cin heon.
EPHESUS WICOWOYAKE
3.
1 Heon Ikcewicašta
kin niyepi on etanhan, Palos, Jesus Messiya on kaška hnakapi kin he miye.
2 Niyepi on
Wakantanka towaonšida wicohtani maqupi kin he nayahonpi hecinhan;
3 Token
woyakapi kin on wowiyukcan kin he sdonye makiya; he wanna wicoie tonana on
wakaga:
4 He dawapi kin
ehantanhan Messiya tawowiyukcan kin token imdukcan kin sdonyayapi kta.
5 He wicoicage
tokeca kin en wicašta cinca kin owicakiyakapi šni, tuka nakaha Woniya kin
eciyatanhan, yewicašipi owotanna qa wicašta wokcanpi tawawicaye cin hena
owicakiyakapi kin iyecen:
6 Hecen Ikcewicašta
kin nakun kici tawayapi kte ca, kici tancan wanjipidan kta, qa Messiya
tawotanin wašte kin eciyatanhan wahoyapi qon he en opapi kta.
7 He on ookiye
makagapi, Wakantanka towaonšida maqupi kin he eciyatanhan, iye towašake ohanye
cin on.
8 Miye tona
owotanna un kin owasin en iyotan macistinna,
tuka wowaonšida kin de maqupi, Ikcewicašta
kin ekta Messiya tawoyuha okahnihpica šni kin he omdake kte cin hee.
9 Qa wowiyukcan
kin otokahe wanin ehantanhan Wakantanka, taku owasin Jesus Messiya on kage cin,
he en nahmanpi qon hee takodakiciyapi kin he owasin sdonye wicawakiye kta.
10 Hecen nakaha
okodakiciye kin eciyatanhan, wokiconze wowašake ko, mahpiya ekta un kin en,
Wakantanka toksape wopteca šni kin atanin kta.
11 Wokonze
otokahe wanin ehantanhan kage ciqon he eciyatanhan, Jesus Messiya Itancan
unkiyapi kin en;
12 Iye wacinunyanpi
kin eciyatanhan, kokipešniyan ekta unkipi, qa waditagya unkiapi ece.
13 Heon etanhan
niyepi kin on kakiš mayanpi kin heon canwannikapi kte šni wacin.
14 Qa heon
Jesus Messiya Itancan unkiyapi he Atkuku kin en, anpetu iyohi canpeška makehde
inawajin.
15 He
eciyatanhan wicowazi mahpiya ekta un, qa maka akan un kin, ocowasin caštonpi.
16 Hecen iye
towitan woyuha kin eciyatanhan taku nicupi kta, iye Taniya kin eciyatanhan,
wowašake on wicašta mahen tanhan wašagniyanpi kta.
17 Hecen wacinyanpi
on nicantepi kin mahen Messiya ounye kta;
18 Hecen wowaštedake
on hutkan niyusutapi, qa sutaya hu nihdepi kta; qa tona owotanna un kin owasin
om, ohdakinyan qa ohanske cin, omahentuya qa obosdatu kin he taku kin iyukcan
oyakihipi kta;
19 Qa Messiya
towašte okahnihpica šni kin he sdonyayapi kte, hecen Wakantanka toojudan kin
ocowasin ojuniyanpi kte.
20 Tuwe nina
wašagya econ okihi, unkiš unkidapi qa awauncinpi kin isanpa, wowašake kin on
onicihanyanpi kin he eciyatanhan;
21 He iye okodakiciye
kin en, Jesus Messiya on, ohinniyan owihanke wanin wowitan kicihan nunwe.
EPHESUS WICOWOYAKE
4.
1 Heon etanhan
miš miye Itancan caje on makaškapi,
ceciciyapi ce, Wicakicopi on nicopi kin he iyacinyan mayanipi kte.
2 Wicotawacin wašte
ocowasin qa wicowahbadan, wacin tankapi ko yuha, wowaštedake en otoiyohi
iyowinyeciciyapi kta:
3 Qa wookiye
icaške kin on Woniya okonwanjidan kin he yahduhapi kta e aiciciya po.
4 Wicatancan
wanjidan qa Woniya nakun wanjidan, nicopi kin en wowacinye wanjidan inicopi kin
he iyececa;
5 Itancan
wanjidan, wowacinye wanjidan, baptem wanjidan,
6 Taku Wakan
wanjidan, he owasin Ateyapi kin, owasin iwankam un, qa owasin opta un, qa
niyepi owasin en niunpi kin.
7 Tuka Messiya
iyunwin codan wicaqu iyutapi kin eciyatanhan unkiyepi otoiyohi wowaonšida
unqupi.
8 Heon kaken
eya; Wakantkiya kihde cehan, wayaka ahdapi qon he ocowasin ahde ca wicašta kin
taku wicaqu ce.
9 (Wankan kihde
cin he taku he; tokaheya maka mahentuya kin iyaye cin hee?
10 Tuwe kun hi
qon he taku owasin ojuye kte cin heon, he mahpiya kin ako sanpa tehan
wankantuya kihde cin.)
11 Unkan apa yewicašipi
kin heca wicaqu, qa wicašta wokcanpi wanjikji, qa wotanin wašte oyakapi kte cin
wanjikji, qa waawanhdakapi waonspekiya ko wanjikji;
12 Tona
owotanna un kin hena wicayuecedan kta, wawokiyapi wicohan kin on, qa Messiya
tancan icahyapi kte cin heon.
13 Tohan owasin
okonwanjidan wacinyanpi, qa Wakantanka Cinhintku sdonyapi kin ekta, qa wicašta
tanka Messiya toojudan kin iyehankeca iyutapi kin ekta iyounhipi kte cin hehanyan.
14 Hecen
detanhan hokšiyoqopa aptanptan iyeyapi, qa woonspe tate owasin on kaha iyeyapi
kin heuncecapi kte šni, wicašta oškiškeya ohanyanpi, qa wohnaye on wicahnayanpi
wicohan kin eciyatanhan;
15 Tuka wowaštedake
en iewicaunkapi kta, hecen tuwe wicapa kin ee, Messiya hee en taku owasin on
unkicagapi kta.
16 lye
eciyatanhan tancan kin ocowasin wayupiya iciyakaškapi, qa okihe kin owasin wawokiyapi
on icicazontapi, huha kin otoiyohi iyacinyan icage cin he iyecen tancan kin
icahyapi, wowaštedake en icage kte cin heon.
17 Heon kaken
epe ca Itancan kin on mdaotanin; Ikcewicašta tokeca wicotawacin witkotkopi kin
en manipi kin he iyecen mayanipi kte šni.
18 Hena
wicotawacin aotpasyapi, qa Wakantanka wiconi tawa kin itehanyan unpi, wosdonye šni
iye tanmahen un kin eciyatanhan, wicocante tehika yuhapi kin heon;
19 Hena iyasaka
icali ayapi, qa wicaštapi šni kin en iyohpeiciyapi, taku ašapapi kin owasin
wohitiya econpi kte cin heon.
20 Tuka niyepi
e qe hecen Messiya kin onspeniciciyapi šni:
21 He
nayahonpi, qa he onspeniciyapi hecinhan, Jesus en wowicake kin iyececa.
22 Wicohan
tokaheya kin en, wicašta tannike cin, wohnaye wocantiheye kin on hwin kin hee
yahdušdokapi kta;
23 Qa
nitawacinpi woksape kin en niyutecapi kta;
24 Qa wicašta
teca woowotanna, qa wowicake wakan kin en, Wakantanka eciyatanhan icahyapi kin
he kodakapi kta.
25 Heon
etanhan, itonpi šni kin ayaštanpi, qa otoiyohi wicašta tokeca kici wowicake ece
ohdaka po; otoiyohi huha yeciciyapi kin heon.
26 Šinyahdapi
ešta, wahtanipi šni po. Canniniyanpi ecen wi iyaye šni nunwe.
27 Qa wakanšica
kiyukanpi šni po.
28 Tuwe wamanon
kin he ake manon kte šni, tuka htani kta, nape on taku wašte econ kta, hecen
wahpanica kin he taku wicaqu kte cin yuhe kta.
29 Wicoie šice
cin owasin takudan niipi kin etanhan hinanpe šni nunwe, tuka taku wašte, on
icah yapi kta, tona nahonpi kinhan wowaonšida wicaqu kte cin he ecedan.
30 Qa Wakantanka
Taniya Wakan kin iyokišinyapi šni po; he on wopekitonpi anpetu kin aiyahdeya
askam niyanpi.
31 Wicokige
owasin, qa wocantiyahde, qa wošihda, qa iwašicunpi, qa waaiapi canniyekiciyapi
ko owasin ehpeyayapi nunwe.
32 Qa otoiyohi
okiciciyapi, qa cantekiciyapi, qa otoiyohi kicicajuju po, Wakantanka Messiya on
nicicajujupi kin he iyecen.
EPHESUS WICOWOYAKE
5.
1 Heon hokšiyopa
cantekiyapi kin iyecen Wakantanka opa po.
2 Qa
wacantkiyapi kin en mani po; Messiya canteunkiyapi, qa unkiyepi on Wakantanka
en icicu, qa waihdušna, woomna iyokipi kin he iyececa.
3 Tuka
wiinahmanpi, qa waašapapi, qa waicucupikte cin, niyepi ekta caje yatapi šni
nunwe, tuka tona owotanna un taku iyokipi wicaye cin hena.
4 Qa wawištenyapi,
qa wicoie ecinšniyan kin, qa iapi šica hena hecetu šni; tuka wopida eyapi kin
he wašte.
5 He de
sdonyayapi, tuwe wawichahapi econ, qa tuwe waašape cin, qa tuwe waicucukte cin,
he wakagapi cekiya ece, hena wanjidan ešta Messiya qa Wakantanka kici tokiconze
kin en takudan tawapi kte šni.
6 Iapi ecinšniyan
on ihnuhan tuwe nihnayanpi kin; wicohan kin hena on Wakantanka tocanniye kin
woakta šni cincapi kin en awicau kta.
7 Heon etanhan
hena en opeya unpi šni po.
8 Ehanna otpaze
cin henicapi, tuka wanna Itancan kin en iyoyanpa kin henicapi; iyoyanpa cinca kin iyecen mani po:
9 Woniya
tawaskuyeca kin he wowašte owasin, qa wicoowotanna, qa wowicake kin en un:
10 Qa Itancan
kin taku iyokipiye kte cin he akita po.
11 Qa otpaza
wicohan, on taku wašte icage šni kin hena en okicipapi šni po, tuka hena iyopeyapo.
12 Hena taku
nahtnana econpi kin caje yatapi kin he wowištece.
13 Tuka taku
tona iyopeyapi kin hena owasin iyoyanpa kin yuotanin; qa taku owasin yuotanin
kin he iyoyanpa kin ee.
14 Heon etanhan
kaken eya; Tuwe ištinbe cin kikta, qa wiconte etanhan najin wo, Messiya
iyoyamniye kta ce.
15 Hecen on
wakta po, itonpeya mayanipi kta, witkotkoke cin iyecece šni, tuka wicašta wacin
ksape cin iyececa.
16 Qa omaka kin
tanyan hduha po, anpetu kin šice cin heon etanhan.
17 Heon etanhan
wacin ksapa po, qa Itancan token tawacin kin sdonya po.
18 Qa miniša on
witkopi šni po, he on iyatahdepi ece; tuka Woniya kin on ojudan un po.
19 Qa Psalm, qa
odowan, qa wakan dowanpi kin on wahokonkiciciya po; ahiyayapi qa nicantepi kin ekta
Itancan kin idowan po.
20 Qa
ohinniyan, taku owasin on, Wakantanka Ateyapi kin wopida eciya po, Jesus
Messiya Itancan unkiyapi caje kin on:
21 Qa
Wakantanka kokipeyahan otoiyohi tokan ihukun iyeiciya po.
22 Winohinca,
nihihnapi kin wicihukun iyeiciya po; Itancan kin en iyececa.
23 Wicašta kin
he iye tawicu pa kin hee, Messiya okodakiciye pa kin hee he iyececa; qa he iye
wicatancan kin wanikiye cin hee.
24 Heon
okodakiciye kin Messiya ihukuya yanke cin he iyecen winohinca kin iye hihnakupi
kin taku owasin on ihukun unpi kta.
25 Wicašta,
winohinca nitawapi kin cantewicakiya po, Messiya okodakiciye kin waštekidake
ca, on iye icicu kin he iyecen;
26 Heoen iye
oie kin eciyatanhan, mini on hduecedan, qa hduska kta;
27 Qa hecen iye
ekta ehdaku kta, wowitan okodakiciye kin heca, woašape qa yuškipi, qa taku
hececa wanica; hecen wakan, qa waašape šni un kta.
28 He iyecen, wicašta
kin iye tancanpi kin iyecen tawicupi kin waštewicakidakapi kta; tuwe tawicu kin
waštekidake cinhan he wašte icidaka.
29 Qa tohinni
tuwedan iye cehpi kin šice kidake šni, tuka icahkiye ca, tanyan hduha, Messiya
okodakiciye hduhe cin iyececa.
30 He tancan,
qa cehpi, qa huhu kin en, huha kin he unkiyepi.
31 Heon etanhan
wicašta kin, atkuku, hunku ko ehpewicakiye ca, tawicu kin en iyaihdaške kta, qa
heniyos wicacehpi wanjidan kta.
32 He
wowiyukcan wan tanka, tuka Messiya qa okodakiciye kin hena wicawaka.
33 Heon niš niyepi
otoiyohi niye inihdatin nitawin wašteyakidake kta, qa winohinca kin iš iye
hihnaku kin kinihan kte.
EPHESUS WICOWOYAKE
6.
1 Hokšiyoqopa,
nihunkakepi kin anawicakigoptan po, Itancan kin en, he owotanna.
2 Niyate nihun
kici wicahduonihan wo; woahope on taku wahoyapi tokaheya kin hee;
3 Hecen tanyan
yaun, qa maka akan tehan yani kta.
4 Qa ateniyanpi
kin, nicincapi kin wacinko wicakiyapi šni po, tuka Itancan waicahye ca woonspe
tawa kin en icahwicakiya po.
5 Qa wowidake
yaunpi kin, tona wicacehpi ekta niyuhapi kin wokokipeya cancaniciya
anawicakigoptan po, Messiya kin iyececa, nicantepi okonwanjidan on .
6 Wanniyakapi
ecedan šni, wicašta iyokipiwicayapi kin iyececa; tuka Messiya taokiye kin
iyececa, nagi kin eciyatanhan, Wakantanka tawacin kin ecen ecanonpi kta.
7 Iyokipiya
wawokiya po, Itancan kin ekta hecetu, qa wicašta kin en iyecece šni.
8 Qa tuwe taku wašte
econ kinhan, he on Itancan kin eciyatanhan wayuhe kta, wowidake un, qa iš tawaiciya
un kin, unma tukte kašta, he sdonyayapi.
9 Qa tona
itancan yaunpi kin, niš eya he iyecen ecawicayeconpi kta, qa wakokipe wicayecagapi
kte šni. Mahpiya kin ekta iš iyepi qa niš niyepi nakun Itancan yakiyapi kin
yanke ca, he ekta wicašta itohnake yuonihanpi wanica, he sdonyayapi.
10 Unkan ehake
mihunkawanji, Itancan kin en wašagya un po, iye towašake wicookihi kin on.
11 Wakantanka
tawipe kin ocowasin un po, hecen wakanšica wohnaye ohanye cin itkokim inajin
oyakihipi kta.
12 Wicawe, qa
wicacehpi kin kici unkicizapi šni, tuka wokiconze, qa wicowašake, qa wiconi kin
de en otpaza itancanpi kin, qa taku wakan šicapi wankantuya yukanpi kin hena
om.
13 Heon etanhan
Wakantanka tawipe kin ocowasin icu po, hecen anpetu šice cin en najin oyakihipi
kta, qa taku owasin hduštan nayajinpi kta.
14 Heon
wowicake ipiyag kitonpi ecen najin po, qa wicoowotanna maza maku akahpe kin
koyaka po.
15 Qa nisihapi
kin en wookiye wotanin wašte ohduštan kin okihan po.
16 Qa owasin
akapa tanhan wowacinye wahacanka kin icu po, he on wicašta šica tunwanhinkpe
ide kin owasin yusni oyakihipi kta.
17 Qa wiconi
maza wapaha kin he icu po, qa nakun Woniya tamazasagye kin, Wakantanka oie kin
hee:
18 Wocekiye qa
wokidapi owasin on Woniya kin en, ohinniyan tona owotanna un kin on cekiya po,
qa heon woape owasin wokidapi ko yuha kiktahan un po:
19 Qa nakun
miye on, iapi owakihi kte cin heon, hecen waditagya i wahdukawa, qa wotanin wašte
wowiyukcan kin omdake kta.
20 Heon wahošiya
un wan kaška hnakapi kin hemaca, hecen on token iwae kte cin he iyecen
waditagya iwae kta.
21 Tuka taku
mitawa kin, token waun kin he nakun, sdonyayapi kta e heon Tychicus hunkawanjin
kiciyapi wan waštedakapi, qa Itancan kin en ookiye owotanna kin he taku kin
owasin oniciyakapi kta:
22 Heon etanhan
niyepi ekta ye waši, unkiyepi ekta taku kin sdonyayapi kta, qa he nicantepi kin
wacintonhnag niyanpi kte cin heon.
23 Hunkawanjin
kiciyapi kin en wookiye un nunwe, qa wowašte, wowacinye ko, Wakantanka Ateyapi,
qa Jesus Messiya Itancan kin eciyatanhan.
24 Tona
awicakehan Jesus Messiya Itancan unkiyapi waštedakapi kin hena owasin en, wowaonšida
wicakici un nunwe. Amen.
No comments:
Post a Comment