II Timotheus (2 Timothy) Wowapi Wakan Kin

PALOS TIMOTHEUS WOWAPI KICAGA, INONPA KIN

WICOWOYAKE 1.

1 Palos, Wakantanka tawacin kin on, Jesus Messiya yeši qon, Jesus Messiya wiconi iwahounyanpi qon he eciyatanhan,

2 Timotheus, hokšincantkiyapi mitawa kin, wowapi cicaga. Wowaonšida , wowašte, wookiye ko, Wakantanka Ateyapi kin etanhan, qa Jesus Messiya Itancan unkiyapi kin etanhan.

3 Wakantanka, mihunkake kin etanhan nagi ska hduha ohowada kin, he wopida ewakiya, anpetu, hanyetu ko wocekiye epa eca, ayaštan šni ciksuya waun;

4 Wanciyaka nina wacin, ištamnihanpe ota aniu qon hena weksuya, hecen wowiyuškin omajudan kta;

5 Tohan wowacinye anahbepica šni niye en niun kin he weksuye cinhan, he tokaheya nikunši Lois en un, qa nakun nihun Eunice en un, qa he niye en niun kin sdonwaya.

6 Heon etanhan kiksuyeciye kta, Wakantanka taku nicu kin, nape aciputake cin eciyatanhan, he amniheniciye kta.

7 Wakantanka wokokipe woniya kin unqupi šni; tuka wowašake, wacantkiyapi, qa wacinksapapi woniya kin.

8 Hecen Itancan unkiyapi tawotanin kin on ištece šni wo, qa nakun miye makaškapi tawa waun kin; tuka Wakantanka towašake kin eciyatanhan wotanin wašte en wokakije kin en okicipa wo:

9 He iye ni unyanpi, qa wicakicopi wakan kin on unkicopi, unkohanpi kin eciyatanhan šni, tuka iye tawacin, qa towaonšida, maka icage cin itokam Jesus Messiya on unqupi qon he eciyatanhan:

10 Tuka wanna hdutanin, Jesus Messiya Wanikiya unkitawapi taniniciye cin on, he wiconte ihangye ca, wotanin wašte kin en, wiconi qa tepica šni unpi kin iyoyanpa en au.

11 Heon eyanpaha qa yešipi kin heca makagapi, Ikcewicašta wowicawakiyake kte cin heon.

12 Qa he etanhan hena taku on iyotanhan iyewakiya; tuka imaštece šni. Tuwe wacinwakiye cin he sdonwakiye ca, taku ehnake waši kin hena anpetu wan u kte cin hehanyan miciyuha okihi sdonwaya.

13 Wicoie on zaniyan unpi nahonciye ciqon, wowacinye, wowašte ko, Jesus Messiya en un kin he tinsa yuza wo.

14 Woniya Wakan unkicipi un kin eciyatanhan, wicohan wašte nicupi qon he tanyan yuha wo.

15 Tona Asia en un kin owasin amayuštanpi kin he sdonyaya; Phygellus qa Hermogenes he en opapi.

16 Onesiphorus tiyohnaka tawa kin Wakantanka onšikida nunwe; iye ota micanpte ca makaškapi kin on ištece šni.

17 Qa Roma ekta hi qehan, nina omade qa iyemayan.

18 He anpetu kin he en Itancan kin etanhan wowaonšida  iyeye kta e Itancan okihikiya nunwe; Ephesus ekta taku tona on omakiye ciqon he tanyan sdonyaya.

2 TIMOTHEUS WICOWOYAKE 2.

1 He etanhan, micinkši, Jesus Messiya towaonšida kin he en wakišaka wo.

2 Qa miye etanhan taku nayahon, wicota yaotaninpi qon, hena wicašta wacinyepica, tona tokan onspewicakiya okihipikin, hena wicaqu wo.

3 Qa niye nakun Jesus Messiya taakicita wašte kin iyecen taku tehika en waditaka wo.

4 Tuwe ozuye econ kinhan, he taku wiconi kin de wicohan kin en ihdupemni šni, tuwe taakicitaye cin he iyokipiye kte cin heon.

5 Qa tuwe ohiye wacin econ kinhan, qa wakiconzapi kin ecen econ šni kinhan, he watešdagkicatonpi šni ece.

6 Wicašta wakicanye cin he htani kinhan, iye tokaheya taku icage cin etanhan yute kta.

7 Taku epe cin he awacin wo. Qa Itancan kin taku owasin okahnihniyan nunwe.

8 Wotanin wašte mitawa kin eciyatanhan, Jesus Messiya, David wicowazi tawa kin etanhan, he wiconte etanhan ekicetuyapi kin he kiksuya wo.

9 Qa iye on wicašta wabotice cin iyecen kakišmayanpi, makaškapi kin he en; tuka Wakantanka oie kin he kaškapi šni.

10 He etanhan tona wicakahnigapi qon hena on taku owasin iyowinwaya, hena e wiconi Jesus Messiya en un kin he yuhapi kta, qa nakun owihanke wanin wowitan kin.

11 Wicoie kin de wicakapi; Iye kici untapi kinhan, nakun kici unnipi kta;

12 Iye on unkakijapikinhan, kici wicaštayatapi unyakonpi kta. Qa unkiye ehpeunyanpi kinhan, iš eya ehpeunyanpi kta.

13 Qa wacinunyanpi šni ešta, iye wacinyepica un, ihduecinšniyan kta okihi šni ce.

14 Hena taku kin kiksuyewicaye ca, Itancan kin itokam, wicoie wawokihi šni, tona nahonpi kin wicahnaye cin hena on akinicapi kte šni e iwahokonwicakiya wo.

15 Wakantanka iyokipiyaye kta, wicašta wakage cin ištece kta iyecece šni kin heca e nihdutanin kta, qa wowicake wicoie kin owotanna yapamni kta e aiciciya wo.

16 Tuka iapi šica ecinšniyan kin he nakicipa wo, he iyotan wicošice ekta icah aye kta.

17 Unkan wicoie tawapi kin šiyaka šica wan iyecen waihangye kta; Hymenæus qa Philetus hena hececapi;

18 Hena wowicake kin icunonpa iyayapi qa, Woekicetu kin wanna yuštanpi ce, eyapi, qa heon wanjikji wacinyanpi kin etanhan wicayahomnipi.

19 Hececa ešta, Wakantanka ahehde tawa kin sutaya he ca ipuspe kin de en un; Itancan kin tona tawa wicaye cin hena sdonwicakiya. Qa nakun, Tuwe Messiya caje kin hoyekiye cinhan, he woahtani ayuštan kta ce.

20 Tuka tipi tanka wanji ohna mazaskazi, qa mazaska wakšica hecedan šni, nakun can, qa maka wakšica ko yukan, hunh taku wašte, qa hunh taku šica on yuhapi.

21 Hecen on, tuwe hena taku kin etanhan itpakinte cinhan, he wakšica wašte kin heca kta, ecedan, qa Itancan kin wowinyunye kta e iyokipi, qa wicohan wašte owasin on yuštanpi.

22 Koška cantiheyapi šice cin hena nakicipa wo; tuka wicoowotanna, wowacinye, wacantkiyapi, wookiye ko, henakiya tona cante ecedan on Itancan cekiyapi kin hena om en opa wo.

23 Tuka wiwangapi okahnihpica  šni ecinšniyan kin hena en yeiciye šni wo, hena wicokicize kaga e sdonyaya.

24 Unkan Itancan taokiye kin he wicakis un kte šni; tuka owasin en wahbayedan un kta, waonspekiye ca, wawacinkta yuza tanka kta:

25 Qa tona tokaiciya unpi kin hena iwahnana wahokonwicakiye kta, okinni Wakantanka ihduecetupi wicaqu kta, hecen wowicake kin iyukcanpi kta.

26 Qa hecen, tona wakanšica tohan cin eca, wayaka awicahda ece kin hena mazahtakiyapi tawa kin etanhan ihdušpapi kta.

2 TIMOTHEUS WICOWOYAKE 3.

1 He de sdonya wo, anpetu ihankeya kin en taku tehika e u kta.

2 Hehan wicašta kin wašteicidapi kta, mazaska waštedakapi, wanmaicidapi, wahanicidapi, hunkakeyapi kin anawicakigoptanpi šni, wapidapi šni, owotanpidan šni;

3 Cinca cantekiyapi šni, woope kicaksapi, waaiapi sa, iyatahdeiciyapi sa, ohitiicidapi, qa taku wašte šicedapi;

4 Wicahnayanpi sa, wacinkopi, watankaicidapi, magagaiciyapi kin he iyotandapi, qa Wakantanka iyotandapi šni.

5 Wakantanka awacinpi kin wiyacinpi kin yuhapi, tuka wowašake kin he wicadapi šni ; tona hececapi kin hena etanhan ihdamna wo.

6 Hena hececapi kin tipi nahmana tin ipi, qa winohinca wacintonpi šni, woahtani hdušakapi, qa šicaya wacin yuzapi on icunonpa ayapi;

7 Ohinniyan waonspeiciciyapi keš wowicake sdonyapi kin ehan ipi okihipi šni kin wayaka awicayapi ece.

8 Unkan, Jannes qa Jambres hena Moses kici akinicapi qon he iyecen, dena iš eya wowicake kin en ibotopi, wicašta tawacin šicapi, qa wacinyanpi kin ayuštanpi.

9 Tuka dena e sanpa iyoopta aye kte šni, witkotkopike cin owasin en tanin kta, hena e qe econpi qon iyececa.

10 Tuka niye wowaonspekiye mitawa kin tanyan sdonyaya, miohan kin, token miciconze cin, wacinwaye cin, wawacinkta mduza tanka kin, wacanwakiye cin, wahbayedan awape kin,

11 Tehiya makuwapi kin, makakije cin, tona mahiyahde kin, Antioch ekta, Iconium ekta, Lystra ekta, hena šicaya makuwapi kin mahiyahde; unkan owasin etanhan Itancan kin emahdaku.

12 Qa tona Jesus Messiya en owotanna ohanyan cinpi kin hena owasin šicaya wacakuwapi kta.

13 Tuka wicašta šica, wicahnayanpi sa ko, hena sanpa šicapi kta, wicahnayanpi qa nakun hnayanpi kta.

14 Hececa tuka niye qe taku onnispe, qa wicayada kin hena en un wo, tokiya tanhan onnispe kin he sdonyaya.

15 Qa honikšiyoqopa kin ehantanhan Wowapi Wakan sdonyaya, he niniyan on ksamniye kta okihi, Jesus Messiya wacinyanpi kin eciyatanhan.

16 Wowapi Wakan ocowasin Wakantanka Taniya kin eciyatanhan, qa waonspekiyapi, wiyopeyapi, owotanna kagapi, qa wicohan wašte en onspewicakiye cin he okihi.

17 Hecen Wakantanka wicašta tawa kin ecedan un kta, qa wicohan wašte owasin on hduštanpi kta.

2 TIMOTHEUS WICOWOYAKE 4.

1 Heon, Wakantanka ltokam, qa Jesus Messiya Itancan kin, tona nipi tapi ko wicayaco kta, tohan wokiconze hduha hi kinhan, he nakun itokam wahokonciciya;

2 Wicoie kin oyaka wo, tohan oiyokipi, qa nakun oiyokipi šni ešta, handitaiciya, wo. Owotanna wicakage wacin, iyopewicaya, wahokonwicakiya wo, woonspe qa wawacinkta yuzapi tanka kin on.

3 Anpetu wan u kte cin he tohan hi kinhan, woonspe wašte kin aktapi kte šni, tuka iye wicotawacin šice cin eciyatanhan waonspekiyapi kin awicakitapi kta, noge yašpuyapi se iyececa heon etanhan.

4 Qa nogepi kin wowicake kin etanhan hduhomnipi, qa hitunkakanpi kin ekta ihdoyapi kta.

5 Tuka niye qe taku owasin en wakta yaun kta, wicokakije en waditaka wo; wotanin wašte oyakapi wicohan kin ecen econ wo; wicohan duhe cin he hduštan wo.

6 Wanna wamihdušna kta iyemicihantu, qa wahde kte cin he wanna kiyadan ihan.

7 Okicize wašte kin ecamon, woinyanke kin ihuniwakiya, wacinyanpi kin he hduha waun;

8 Qa tokata, woowotanna watešdake wan mihnakapi, he Itancan wayaco owotanna kin maqu kta, anpetu kin he en; qa miye mišnana šni, tuka tona iye taniniciye kte cin waštedakapi kin hena owasin koya.

9 Kohanna en mayahi kta nina aciciya wo.

10 Demas he amayuštan, wiconi kin de waštedake ca Thessalonica ekta kihda; Crescens Galatia ekta, qa Titus Dalmatia ekta.

11 Lukas kicišnana waun; Markus icu qa kici u wo, he iye wicohan kin de en omakiya ece.

12 Tychicus Ephesus ekta ye waši.

13 Yau kinhan, Troas ekta Carpos šina emicihnake waši qon he au wo, qa nakun wowapi kin hena, tahasaka owapi kin hena iyotan.

14 Alexander mazazi kage cin he taku šica ota iyamaonpa; iye ohan kin on Itancan kin kicicajuju nunwe.

15 He on waktaya un wo; wicoie unyaotaninpi qon he nina kipajin.

16 Tokaheya wowahdake ciqon he ehan tuwedan micica šni, qa owasin inamatanpi, he wicakiciyawapi šni nunwe.

17 Tuka hececa ešta, Itancan kin mici inajin, qa wašagmaye, ca hecen miye on woyakapi kin tanyan sdonyapi kta, qa Ikcewicasta kin owasin nahonpi kta; qa mnaja i kin etanhan emahdakupi.

18 Nakun Itancan kin wicohan šica owasin etanhan emahdaku kta, qa wokiconze mahpiya ekta un kin he en nimaye kta. He iye wowitan owihanke wanin kiciun nunwe.

19 Priscilla qa Aquila napewicayuza wo, qa nakun Onesiphorus tiyohnaka tawa kin.

20 Erastus Corinth ekta yanka. Miletus ekta Trophimus wayazanka ehpeya wahdicu.

21 Nahahin waniyetu šni u kte hinca wo. Eubulus nape niyuza, qa nakun Pudens, qa Linus, qa Claudia, qa hunkawanjin kiciyapi kin owasin.

22 Jesus Messiya Itancan kin ninagi kici un nunwe. Wowaonšida nicipi un nunwe. Amen.