Titus Lakota / Dakota New Testament

PALOS TITUS WOWAPI KICAGE CIN

WICOWOYAKE 1.

1 Palos Wakantanka taokiye, qa Jesus Messiya yeši qon, tona Wakantanka wicakahniga, wacinyanpi kte cin heon, qa wowicake wicohan wašte en un kin sdonyapi kte cin heon;

2 Qa owihanke wanin wiconi opapi kte cin, Wakantanka itonšni okitpani, maka kagapi kin itokam iwahounyanpi qon he on;

3 Tuka wanna iyehantu qehan, eyanpahapi kin on oie kin hdaotanin, he miye maqupi, Wakantanka Wanikiya unkitawapi kin he eciyatanhan;

4 Titus, witaya wacinyanpi kin he eciyatanhan cinkšiwaye cin; Wowašte, wowaonšida , wookiye ko, Wakantanka Ateyapi kin etanhan, qa Jesus Messiya Itancan Wanikiya unhapi kin eciyatanhan kiciun nunwe.

5 He etanhan Crete en yanke ciši, taku tona yuštanpi šni kin hena wiyeya eyahnake kta, qa otonwe otoiyohi en hunkayapi wicayakage kta e on; token econ ciši qon iyececa.

6 Tuwe iyaonpepicašni kinhan, wicašta tawicu wanjidan, qa cinca wacinyanpi wicahduhe cin, wicakis unpi ewicakiyapi qa wanahonpi šni kin hececapi šni:

7 Waawanhdake cin he takudan iyaonpepica šni un kta, he Wakantanka taokiye kin ee; išnana wacin en ihduze šni, wacinko šni, miniša en iyeiciye šni, ohitiicida šni, qa mazaska nina akite kte šni;

8 Tuka oicimani kin onšiwicada kta, qa taku wašte kin waštedake kta, wacin ksapa un kta, qa owotanna, wacantkiya, qa iyatahdeiciye šni un kta;

9 Qa token onspekiyapi qon he iyecen wicoie oyakapi kin sutaya hduhe kta, hecen woonspe ecedan kin on wahokonwicakiya okihi kta, qa tona kipajiniciyapi kin hena iyopewicaye kta.

10 Wicašta wicaštapi šni, qa witkoya iapi, qa wicahnayanpi kin heca ota, tona bakihdayapi etanhanpi kin hena iyotanpi.

11 Hena iohmus wicayapi kta iyececa; hena e qe tiyohnaka ocowasin yaptanyan iyewicayapi, qa mazaska wahtešni kin on taku iyecetu šni kin onspewicakiyapi ece.

12 Iyepi kin etanhan waayate wan heye ciqon; Crete oyate kin ohinniyan itonpišni, wamanica ocinšice cin, qa wicatezi kuja kin hecapi ce.

13 Wayaotanin kin he wowicake. He etanhan nina iyopewicaya wo, hecen wacinyanpi kin en ecedan unpi kta:

14 Qa hecen Juda oyate hitunkakanpi yuhapi kin, qa wicašta akantu woope kagapi kin wowicake kašeye cin hena awacinpi kte šni.

15 Tona ecedan unpi kin hena taku owasin ecedan yuhapi, qa tona ašapapi qa wicadapi šni kin hena taku ecedan kin takudan yuhapi šni, tuka tawacinpi nagipi ko hena ee kaeš ašapapi.

16 Hena iš Wakantanka sdonyapi keyapi, tuka wicohan on aktapi šni, wahtepi šni, wanahonpi šni, qa wicohan wašte owasin en wacintonpi šni.

TITUS WICOWOYAKE 2.

1 Tuka niye qe taku woonspe ecedan en iyokipi kin hena ecen oie ya wo.

2 Wicašta tankapi kin hena waktaya unpi kta, mdesahan wacin ksamya unpi kta, wacinyanpi, wacantkiyapi, wacintankapi ko en ecedan unpi kta.

3 Qa winohinca tankapi kin iš eya winohinca wašte iyecen ohanyanpi kta, waaiapi kte šni, miniša ota en iyeiciyapi kte šni, qa taku wašte onspe wicakiyapi kta:

4 Hecen wikoška kin ksamwicayapi kta, wicašta yuhapi cinca ko waštewicakidapi kta;

5 Wacin ksapapi kta, ecepidan, tipi awanhdakapi kta, wašteya unpi kta, hihnakupi kin anawicakigoptanpi kta; hecen Wakantanka oie kin yašicapi kte šni.

6 Koška kin iš nakun wacin ksapapi kte cin iwahokonwicakiya wo.

7 Qa taku owasin on wicohan wašte kin en waonspekiya nihdutanin kta; woonspe kin en wayušice šni, wacinksapa, owotanna;

8 Qa iapi ecedan qa iyaonpepica šni kin he nun kta; hecen tuwe itkopatanhan un kinhan, he ištece kta, taku šica takudan aniie kta okihi šni kin heon.

9 Tona wowidake un kin hena itancan wicayuhapi kin anawicakigoptanpi kta, qa taku owasin wakinicapi wanin iyokipi wicayapi kta;

10 Takudan nahmana icupi gni, qa wacinyanpi wašte ocowasin en ihdutaninpi kta. Hecen taku owasin on, Wakantanka Wanikiya unhapi kin tawoonspe kin  he tanyan yuhapi kta.

11 Wakantanka towaonšida wicašta owasin wiconi wicakahi kin he wanna tanin;

12 Wakantanka aktapi šni, qa wicoicage cantiheyapi kin hena ehpeunyanpi kta, qa nakaha wiconi kin en, wacinksamya, owotanna, wakanyan unnipi kta e onspeunkiyapi.

13 Qa wacinyanpi wašte ape unyakonpi kta, Wakantanka iyotan tanka, qa Jesus Messiya Wanikiya unhapi kin he wowitan hduha taniniciye kte cin hee.

14 He unkiyepi on icicu, woahtani owasin etanhan opeunkitonpi kta, qa oyate tawawicaye kte cin wicohan wašte nina hin akitapi kte cin hena wicahduska kta e heon.

15 Hena wicoie kin hecen oie ye ca, wahokonwicakiye ca iyopewicaya wo. Ihnuhan tuwe šicenidake cinhan.

TITUS WICOWOYAKE 3.

1 He kiksuyewicaya wo, taku itancanpi qa wicowašake kin hena ihukun iyeiciyapi kta, wicaštayatapi kin anawicagoptanpi kta, qa wicohan wašte owasin econpi kta, on wiyeya yukanpi kta.

2 Tuwedan yašicapi kte šni, qa wicakizapi kte šni, tuka wahbayedan unpi, qa wicašta owasin on wacin tankapi kta.

3 Ehanna unkiš eya wacin untonpi šni, qa waanaungoptanpi šni, unhnayanpi, qa cantiheyapi šica ota, qa iyokipiiciyapi kin en wowidake unyakonpi, wocanniye, icekinpi ko en unnipi, wahte šni unyakonpi, qa otoiyohi šiceunkicidakapi.

4 Tuka hehan Wakantanka Wanikiya unkitawapi kin he towašte, qa wacantkiye cin wicašta kin en yutaninpi qehan;

5 Wicohan owotanna econkupi kin eciyatanhan šni, tuka iye towaonšida kin eciyatanhan niunyanpi; teca wicatonpi woyujaja kin on, qa Woniya Wakan wicayuteca kin heon etanhan;

6 He Jesus Messiya Wanikiya unkitawapi kin eciyatanhan iyakicuya unkakaštanpi kin.

7 Hecen iye towaonšida kin on etanhan unyaowotanpidan kinhan, wiconi owihanke wanica unkapepi kin eciyatanhan, taku iye tawa kin he tawaunyanpi kta.

8 Iapi kin he wowicake; qa heon hena taku kin ohinniyan yasutaya iyae kta wacin; tona Wakantanka wicadapi kin hena wicohan wašte wacin ksamya opapi kta. Hena taku wašte, qa wicašta kin en wawokihi.

9 Tuka witkoya wiwangapi, qa wicoicage oyakapi, qa wawakipajinpi, qa woope akinicapi kin hena okamnayan ya wo; hcnatakudan okihi šni qa ecinšniyan un.

10 Wicašta waakinica un kin he wancadan, qa inonpa iyopeyapi kin, ihakamya heyata iyeya wo.

11 Tuwe hecece cinhan, he wanna yuptanyanpi, qa woahtani econ, qa iye atayedan ihdaco kin he sdonyaya.

12 Tohan niye ekta Artemas, kaeš Tychicus ye waši kinhan, kohanna Nicopolis ekta en mahi kte hinca wo; hen waniyetu waun kta miciconza.

13 Zenas woope aie kiyapi kin he, qa Apollos icimani ipi kinhan, takudan icakije šni tanyan iyoopteya yewicakiya wo.

14 Qa tona unkicicapi kin hena wicohan wašte aiciciya econpi kta, wicakijapi kin owicakiyapi kta, qa hecen waskuyeca icahye šni yukanpi kte šni.

15 Tona micicapi kin hena owasin nape niyuzapi. Tona wacinyanpi kin eciyatanhan wašteundakapi kin hena nape wicayuza wo. Wowaonšida niyepi owasin en nicipi un nunwe. Amen.