II Thessalonica (2 Thessalonians)

PALOS THESSALONICA OYATE WOWAPI WICAKICAGE CIN, INONPA KIN

WICOWOYAKE 1.

1 Palos, qa Silvanos, qa Timotheos, Thessalonica ekta okodakiciye Wakantanka Ateunyanpi, qa Jesus Messiya Itancan kin en un kin hena, wowapi wicakicagapi;

2 Wowaonšida, wookiye ko Wakantanka Ateunyanpi kin, qa Jesus Messiya Itancan kin etanhan nicipi un nunwe.

3 Mihunkawanji, wacinyayapi kin he nina icage ca, wacanyakiyapi kin otoiyohi en nina niciyuotapi kin, heon ohinniyan niyepi on, Wakantanka wopida unkekiciyapi kte cin he hecetu.

4 Hecen niyepi on, unkiye Wakantanka okodakiciye tawa kin en unkiwinktapi ece; šicaya nicuwapi kin owasin, qa wokakije duhapi kin en, wacinyan wakišagya yaunpi kin heon.

5 Wakantanka tawoyaco owotanna wowapetokeca kin he dee, nicakijapi kin heon Wakantanka tokiconze kin iyehantu niyawapi kta.

6 Tona kakišniyanpi kin hena itkom Wakantanka wokakije wicaqu kte cin he owotanna.

7 Qa tona kakišya yaunpi kin, niš niyepi kin oziiciya unkici yaunpi kta; tohan Jesus Itancan kin towašake ohnihde wicaye cin om mahpiya kin eciyatanhan ihdutaninyan u kinhan,

8 Peta ide kin en, tona Wakantanka sdonyapi šni, qa Jesus Messiya Itancan unkiyapi tawotanin wašte anagoptanpi šni kin hena wošitkihda wicaqu kta;

9 Hena e Itancan itohnake kin etanhan, wicotakuni šni owihanke wanica on kakišwicayapi kta.

10 Tohan oyate owotanna tawa kin en ihduwitan kta, qa tona iye wacinyanpi kin hena owasin on yatanpi kta e on hi kinhan; anpetu kin he en taku unniciyaotaninpi qon he wicayadapi kin heon.

11 Qa heon etanhan ohinniyan niyepi on ceunkiyapi, Wakantanka wicakico kin de iyehantu niyawapi kta, qa niyepi en iye towašte oiyokipi kin ocowasin, qa wowašake on wacinyanpi wicohan kin he nakun hduštan kta.

12 Hecen Jesus Messiya Itancan unkiyapi caje kin niyepi on yuonihanpi kta, qa iye on, niš eya niyuonihanpi kta, Wakantanka unkitawapi, qa Jesus Messiya Itancan towaonšida kin eciyatanhan.

2 THESSALONICA WICOWOYAKE 2.

1 Mihunkawanji, Jesus Messiya Itancan unkiyapi u kte cin he, qa en mniunkiciyapi kte cin hena on ceunniciyapi ce;

2 Ihnuhati wicanagi qa wicoie qa wowapi unnicagapi kin on ihnuhanna nitawacinpi ekta nihuhuzapi qa ininihanpi kin, Messiya taanpetu kin kiyadan u kin hececa.

3 Ihnuhan tuwe taku on nihnayanpi kin; woayuštan wan tokaheya u kta, qa woahtani wicašta kin wicotakunišni cinhintku kin hee e yutaninpi kta.

4 He iye taku Wakan eyapi kin, taku ohodapi ko owasin iwankam yeiciye ca kici kiciza, hecen iye tipi wakan Wakantanka tawa kin en, Wakantanka iyecen iyotanke ca Wakantanka keiciya oihdaka.

5 Cicipi waun qehan hena ociciyakapi qon he yeksuyapi šni he?

6 Unkan nakaha taku iyowicaki šni ece kin he sdonyayapi; hecen tohantu kinhan taninyan hiyu kta.

7 Woope aktašni wowiyukcan kin he wanna ohanyan ece, tuka tuwe he iyoki šni kin he, tohanyan tokan iyeyapi šni kin, hehanyan iyowicaki kte šni.

8 Unkan hehan woope aktašni kin he tanin kta, Jesus Itancan kin Taniya, iye i kin etanhan hiyu kin on, qa ihdutanin wiyatpa kin on, he ihangye kta.

9 Tuwe Satan ohan kin eciyatanhan wicookihi owasin, qa wowapetokeca, qa wowinihan wicohan itonšni kin yuha u,

10 Qa tona awihnuni kin hena en woahtani wohnaye owasin koya; hena wowicake waštedakapi kin on nipi kte cin he aktapi šni, heon etanhan.

11 Qa heon etanhan hena en Wakantanka wohnaye wawokihi kin awicau kta, hecen woitonšni kin wicadapi kta.

12 Qa hecen tona wowicake wicadapi šni, qa woahtani en iyuškinpi kin hena owasin wicayacopi kta.

13 Tuka mihunkawanji, Itancan waštenidakapi kin, niyepi on unkiye ohinniyan Wakantanka wopida unkekiciyapi kta, otokaheya tanhan Woniya wicayuecedan, qa wowicake wicadapi kin on, Wakantanka yanipi kta e on nicahnigapi kin heon etanhan.

14 Qa he en nicopi, wotanin wašte unkitawapi kin on, hecen Jesus Messiya Itancan unkiyapi towitan kin iyacupi kta.

15 Heon etanhan, hunkawanjinciyapi kin, sutaya najin po, qa woope oyakapi wicoie, qa wowapi unkitawapi kin eciyatanhan onspeniciyapi kin hena tinsaya yuha po.

16 Qa Jesus Messiya Itancan unkiyapi kin hee, qa Wakantanka Ateunyanpi kin iye wašteundakapi, qa wicimdeza owihanke wanice cin wowaonšida eciyatanhan woape wašte ko unqupi kin,

17 He nicantepi kin mdesniyanpi, qa wicoie, wicohan ko wašte kin owasin en niyusutapi nunwe.

2 THESSALONICA WICOWOYAKE 3.

1 Unkan ehake mihunkawanji, unkiyepi on cekiya po, Itancan oie kin inyanke ca, wowitan kta, niyepi kin ehna iyececa.

2 Qa wicašta šice ca wicaštapi šni kin etanhan eunhdakupi kta; owasin wowacinye yuhapi šni kin heon.

3 Tuka Itancan kin he wacinyepica, he niyusutapi, qa taku šica etanhan enihdakupi kta.

4 Itancan kin en niyepi on kaken awauncinpi, token econ unnisipi qon ecen ecanonpi, qa eeš nakun ecanonpi kta.

5 Qa Itancan kin nicantepi kin Wakantanka waštedakapi, qa Messiya wacintanka kin he en ope niyanpi nunwe.

6 Unkan mihunkawanji, Jesus Messiya Itancan unkiyapi caje kin on ceunniciyapi ce, hunkawanjin kiciyapi wan ecinšniyan mani, qa wicoope unnicupi qon eciyatanhan šni kinhan, he nakicipa po.

7 Token unkoyecipapi kte cin niye sdonyayapi; niyepi en oškiškeya maunnipi šni.

8 Qa tuwedan aguyapi tawa iyunwin codan untapi šni, tuka wicohtani, wicokakije ko ehna, hanyetu, anpetu ko htaunnipi, tuwedan takudan unkinicazopi kte šni heon.

9 Unkokihipi šni kin heon etanhan šni; tuka unkiye waonspekiya yuheunniciyapi, qa unkoyapapi kte cin heon.

10 Nicipi unyakonpi qehan, he de unkoniciyakapi, Tuwe htanipi tawatenye šni kinhan, he takudan yute kte šni ce.

11 Enitanhanpi wanjikji ecinšniyan manipi, qa ecaca htanipi ni, tuka waaie sa hecapi kin he nahonpi.

12 Tona hececapi kin hena Jesus Messiya Itancan unkiyapi kin etanhan wahokonwicunkiyapi, qa econ wicunšipi, ainina htanipi, qa aguyapi tawapi kin ecedan hdutapi kta.

13 Unkan mihunkawanji, niš niyepi kin taku wašte econpi kin econ kapinpi šni po.

14 Qa tuwe wowapi kin de en, unkoiepi kin anaungoptanpi šni kinhan, he iwanyakapi, qa kici okiciciyapi šni po, hecen ištece kta.

15 Tokayapi šni po, tuka hunkawanjinkiciyapi kin iyecen wahokonkiya po.

16 Qa ohinniyan, taku owasin on etanhan wookiye Itancan kin wookiye nicupi nunwe. Itancan kin niyepi owasin en nicipi un nunwe.

17 Palos he miye, napekiciyuzapi kin de minape on owawa, he wowapi otoiyohi en wowapetokeca kin hee, hecen wakaga ece.

18 Jesus Messiya Itancan unkiyapi kin towaonšida kin niyepi owasin en nicipi un nunwe.