PALOS
COLOSSE OYATE WOWAPI WICAKICAGE CIN
WICOWOYAKE 1.
1 Palos,
Wakantanka tawacin kin eciyatanhan, Jesus Messiya yeši qon he, qa Timotheus hunkawanjin
unyanpi kin kici,
2 Colosse ekta
tona owotanna un, qa hunkawanjin kiciyapi Messiya wacinyanpi kin hena, wowapi cicagapi. Wowaonšida wookiye ko, Wakantanka Ate unyanpi, qa Jesus
Messiya Itancan kin etanhan, niyepi kin en nicipi un nunwe.
3 Ohinniyan
wocekiye unkeniciyapi, qa on Wakantanka Jesus Messiya Itancan unkiyapi Atkuku
kin wopida unkekiciyapi.
4 Jesus Messiya
wacinyayapi, qa tona owotanna un kin owasin waštewicayadakapi kin he nahonpi;
5 Woape mahpiya
kin ekta enicihnakapi kin on, he ehanna wotanin wašte wicoie wicakapi kin en
nayahonpi kin;
6 He en nihipi,
maka kin owancaya iyaye cin he iyececa, qa waskuyeca aicaga, niyepi kin en
nakun, anpetu kin en nayahonpi, qa awicakehan Wakantanka towaonšida iyacupi qon
ehantanhan.
7 Epaphras
unkitawašipi wašte, qa niyepi on Messiya taokiye wicake cin he hena hecen
onspeniciyapi;
8 Qa Woniya kin
en wacanyakiyapi kin he nakun unkokiyakapi.
9 Heon anpetu
kin he nahonpi kin ehantanhan niyepi on cekiya unkayaštanpi šni, qa woksape
owasin, wookahnige ko en, iye tawacin sdonyapi kin on, onijupidan kte cin he
unkidapi ece.
10 Hecen taku
iyokipi kin owasin on, Itancan kin en tanyan mayanipi kta, wicohan wašte owasin
en, waskuyeca icahyayapi, qa Wakantanka sdonyapi kin en sanpa inicagapi kta.
11 Iye towitan wowašake
kin eciyatanhan, wicookihi kin owasin on wašagniyanpi kta, wadiwicatake cin
owasin on etanhan, qa wacin tankapi, wiyuškinpi kici:
12 Qa Ateyapi
kin wopida eyakiyapi kta, he iyoyanpa ekta tona owotanna un kin woaihpeye
tawapi kte cin en ounpapi kta e iyehantu unyanpi:
13 He otpaza wowašake
kin etanhan unkiyušpapi, qa iye Cinhintku waštekidake cin tokiconze kin en
ounye unkiyapi:
14 He en, iye
we kin eciyatanhan, wopekitonpi unhapi, woahtani kajujupi kin hee:
15 Wakantanka
wanyagpica šni un kin ouncage kin hee, qa taku kagapi kin owasin en tokapa kin
hee:
16 Iye
eciyatanhan taku owasin kagapi, mahpiya ekta un qa maka akan un kin hena, taku
wanyakapi qa taku wanyagpica šni, oiyotanke kin, wokiconze kin, wicoškanškan
kin, qa wicowašake kin; taku owasin iye on icahyapi kin hena iye icicaga:
17 Qa taku
owasin itokatam un kin he iye, qa he on taku owasin ecen han:
18 Qa iye
tancan kin okodakiciye kin hee, qa pa kin he iye, qa otokahe kin, wiconte
etanhan tokaheya tonpi kin hee, hecen iye taku owasin en tokapa un kta.
19 Iye ohna
taku ocowasin ounye kte cin he Atkuku
kin iyokipi.
20 Qa iye cansusbeca
we kin eciyatanhan wookiye kage ca, heon etanhan taku owasin iye kici okiciciye
wicaye kta, taku maka akan un, qa taku mahpiya ekta un kin hena, iye on.
21 Qa niš
niyepi, ehanna oyate nitokecapi, qa nitawacinpi kin en toka kin henicapi, wicohan
šice cin on, tuka nakaha he kici wokiyeniyan nicagapi;
22 Iye cehpi
tancan kin en te cin eciyatanhan, hecen iye itokam owotanna, qa waašapapi šni
qa takudan iyaonpepica šni, inajin niyanpi kta:
23 Wacinyayapi
kin en nayajinpi kinhan, sutaya yaunpi, qa tinsa nayajinpi, qa wotanin wašte
woape nayahonpi kin etanhan nihinhpayapi šni kinhan; he mahpiya kin ihukuya
wicašta hiyeye cin owasin owicakiyakapi, qa he en Palos he miye ookiye
makagapi:
24 Nakaha
niyepi kin on etanhan makakije cin heon imduškin, qa Messiya wokakije tawa,
taku micehpi kin en yuštanpi šni kin hena iye tancan kin, okodakiciye kin hee,
on weciyuštan kta.
25 He en ookiye
makagapi, Wakantanka wokonze kin eciyatanhan, he niyepi on maqupi, Wakantanka
oie kin mduecetu kte cin heon.
26 Taku oyakapi
šni kin, wicoicage qa wicoun ota kin ehantanhan anahmanpi kin, he nakaha tona
owotanna iye tawa wicaye cin hena owicakiyaka.
27 Ikcewicašta
kin ekta taku otanin šni kin de wowitan woyuha kin tinskokeca kin, he
Wakantanka hena sdonye wicakiye kta, he niyepi kin en Messiya wowitan woape kin
hee.
28 He unkiye
unyaotaninpi, wicašta kin owasin wahokonwicunkiyapi qa wicašta owasin onspewicunkiyapi
ece, woksape owasin on; hecen Jesus Messiya en wicašta otoiyohi owotanna inajin
wicunkiyapi kta.
29 Heon miš eya
htawani, iye ohan kin miye en wašagya ohanye cin he eciyatanhan inawahni.
COLOSSE WICOWOYAKE
2.
1 Niyepi kin
on, qa Laodicea ekta un kin hena, qa tona wicacehpi on miite kin wanmayakapi šni
kin on token htawani kin he sdonyayapi kta wacin:
2 Hecen iye
cantepi kin kicanptapi kta, qa wacantkiyapi kin on kicicazontapi, qa wosdonye
tanyan okahnigapi kta wowijice kin owasin on, qa Wakantanka towiyukcan sdonyapi
kte cin on, Ateyapi qa Messiya tawa kin hee.
3 Iye en
woksape, qa wookahnige woyuha kin owasin nahmanpi.
4 Tuwedan
wicoie skuya kin on nihnayanpi kte šni heon hena hepa.
5 Wicacehpi on,
ekta waun šni ešta, woksape kin on cicipi waun, imduškin, niohanpi owotanna
kin, qa Messiya sutaya wacinyayapi kin he wanyag waun.
6 Token Jesus
Messiya Itancan kin iyacupi qon he iyecen ohna mani po.
7 Iye en sutaya
hu nihdepi, qa en tinicagapi, qa wowacinye kin tinsa ayahanpi kta, onspeniciyapi
qon he iyececa, qa en wopida eyapi kin sanpa ota ecanonpi kta.
8 Ihnuhan
wicoksape eyapi kin on, qa ikce wohnaye kin on tuwe nihnayanpi kinhan, wicašta
hitunkakanpi oyakapi kin on, qa wicoicage en woonspe tokaheya eciyatanhan, qa
Messiya eciyatanhan šni:
9 Iye kin ohna
tancanyan Taku Wakan kin ocowasin ounyan.
10 Qa iye en niš
niyepi kin yuecetu yaunpi, qa he wokiconze wowašake ko owasin Itancan kin hee.
11 Qa he en
banicihdayapi, bakihdayapi nape codan econpi kin he on, Messiya bakihdayapi tawa
kin eciyatanhan, wicacehpi woahtani tancan kin ehpekiyapi kte cin heon.
12 Baptem on
iye kici nihnakapi, qa nakun kici ekicetu niyanpi, Wakantanka wicate cin
etanhan najin kiye cin he wowašake kin wicayadapi kin heon etanhan.
13 Qa niyepi
ehanna wayahtanipi, qa nicehpi banicihdayapi šni kin en nitapi qon, wanna
wayahtanipi kin owasin nicicajujupi qa niniyanpi.
14 Qa wicoope
kin taku nape on owapi qon, unkiyušepi qa kašeunyanpi kin he pajuju, qa cansusbeca
tawa kin en okatan, qa hecen yutokan iyeya.
15 Qa
wokiconze, wicowašake ko yutakuni šni iyeye cehan, taninyan wicakipazo, qa iye
hinca on iwakte hdi.
16 Heon
etanhan, woyute, qa woyatke, qa omniciye wakan, qa wi teca, qa anpetu okihpapi
kin hena on ihnuhan tuwe niyacopi kin:
17 Hena e taku
u kte ciqon ohanzi kin hee, tuka tancan kin he Messiya etanhan.
18 Tuwe
wahpaniiciye ca, mahpiya ohnihde kin ohowicada kin ihnuhan he nihnayanpi kin;
he taku wanyake šni kin en yeiciye ca, iye cehpi tawacin kin on ecinšniyan
ihdatan;
19 Qa Pa kin he
yuze šni; he on tancan kin ocowasin okihe en iyakaškapi kin on woyute oiyahdeyapi,
qa iciyakaškapi, qa hecen Wakantanka oicage kin on icaga ece.
20 Heon
etanhan, wicoicage kin en woonspe tokaheya kin ekta Messiya kici nitapi hecinhan,
tokeca e wicoicage kin en yanipi kin iyecen wicoope kin oyapapi he:
21 Oyutanpi šni,
utapi šni, qa nape on yuzapi šni po, eyapi
ece:
22 Hena owasin
unpi kin on yasotapi ece; wicašta akantu wicoope qa woonspe kin eciyatanhan?
23 Wicohan kin
he wicotawacin ohodapi kin en taku woksape iyecen yuhe ca, wicowahbadan, qa
wicatancan itonkipapi šni kin hena en; tuka wicacehpi iyokipiyapi kin he
woyuonihan šni ece.
COLOSSE WICOWOYAKE
3.
1 Heon etanhan,
Messiya kici piya inicagapi hecinhan, taku wankantuya Wakantanka etapa kin
eciyatanhan, Messiya kiyotanke cin hen, un kin hena akita po.
2 Taku wankan
un kin hena awacin po, qa taku makata un kin hena awacinpi šni po.
3 Nitapi, qa
nitowiconi kin he Messiya kici, Wakantanka en nahmanpi.
4 Tohan Messiya
wiconi unkitawapi kin taninyan hiyu kinhan, hehan wowitan en, kici niyuotaninpi
kta.
5 Heon etanhan,
nihuhapi makata un kin hena kikte po: wiinahmanpi, waašapapi, wawihnupi,
tawacin šicapi, waicucupikte cin, he wakagapi ohodapi kin hee.
6 Hena on
etanhan Wakantanka tocanniye kin woakta šni cincapi kin en awicau ece.
7 Ehanna hena
ehna yanipi qehan, opeya mayanipi.
8 Tuka nakaha
hena owasin ayuštan po; wocanniye, wošihda, wocantiyahdepi, waakagapi, qa iapi šice
cin niipi kin etanhan.
9 Ihnuhan
oiyecitonpi šni kin; wicašta tannike cin iye wicohan ko yahdušdokapi;
10 Qa wicašta
teca kin he wosdonye kin on yutecapi, waicahya ouncage kin eciyatanhan, he
kodakapi.
11 He en,
Helenes, qa Juda wicašta wanica; bakihdayapi qa bakihdayapi šni kin wanica;
Ikcewicašta qa Scythia wicašta kin wanica; wowidake un kin heca qa tawaiciyapi
kin wanica, tuka Messiya he ocowasin, qa owasin en un.
12 Heon
etanhan, owotanna yaunpi qa waštenidakapi kin, Wakantanka wicakahnige cin
iyecen, wocantekiye koyaka po, qa wowaonšida, wahanicidapi šni, wicowahbadan,
qa wacintankapi kin hena ko.
13 Otoiyohi
iyowinyeciciyapi, qa otoiyohi yecicajujupi kta, tuwe wicašta tokeca on taku šihda
kinhan, Messiya kin nicicajujupi kin he iyecen niš econ po.
14 Qa taku
owasin akantanhan wocantekiye kicun po, he wicoowotanna iyakaške cin ee.
15 Qa
Wakantanka tawookiye kin nicantepi kin en waniconzapi nunwe, he en wicatancan
wanjidan en nicopi kin pida un po.
16 Messiya oie
kin wijinya en niunpi nunwe; woksape owasin on, Psalm, qa odowan, qa wakan
dowanpi kin en, otoiyohi wahokonyeciciyapi, qa onspeyeciciyapi kta, qa
nicantepi kin en wowaonšida yuha Itancan
kin iyadowanpi kta.
17 Qa taku ecanonpi kinhan,
wicoie qa
wicohan kin unma tukte kašta, Jesus Itancan kin caje on owasin econ po, qa on
Wakantanka Ateyapi kin wopida eciya po.
18 Qa winohinca
kin, nihihnapi kin wicihukuya un po, Itancan kin en hecetu kin he iyececa.
19 Wicašta kin,
nitawinpi kin waštewicakida po, qa wicakigepi šni po.
20 Cincapi kin,
nihunkakepi kin taku owasin anawicakigoptan po, he Itancan kin iyokipi.
21 Qa ateyapi
kin, nicincapi kin šihdawicayapi šni po, okinni wacin ibošakapi kte.
22 Wowidake
yaunpi kin, tona wicacehpi eciyatanhan niyuhapi kin anawicakigoptan po; wicašta
iyokipiwicayapi kin iyecen, ištapi kin itokam wawokiyapi kin hee šni, tuka
nicantepi ocowasin on Wakantanka kokipa po.
23 Qa taku
ecanonpi kin owasin nicantepi kin eciyatanhan econ po, Itancan kin on etanhan,
qa wicašta kin on etanhan šni.
24 Itancan kin
etanhan woaihpeye iyunwin kin iyacupi kta he sdonyayapi; Messiya Itancan kin
wowidake niyanpi nakaeš.
25 Tuka tuwe šicaya
econ kinhan, he eciyatanhan icu kta, qa wicašta itohnake iwanyakapi kin wanica.
COLOSSE WICOWOYAKE
4.
1 Unkan,
itancan yaunpi kin, tona wowidake wicaduhapi kin hena, taku owotanna qa iyecetu
kin wicaqu po; mahpiya ekta wanji Itancan yayapi yanke cin he sdonyayapi.
2 Ohinniyan
cekiya un po, qa he en wopida eya wakta po.
3 Qa unkiye on
wocekiye unkeyeciyapi kta, Wakantanka iapi tiyopa wan unkiciyuhdokapi kta,
Messiya tawowiyukcan kin unkoyakapi kta, on makaškapi kin hee:
4 Hecen on,
taku token epe kte cin ecen mdaotanin kta.
5 Tona tankan
unpi kin hena on ksamyahan mani po, qa wihiyaya kin opekiton po.
6 Ohinniyan
iyaapi kin wowaonšida en un, qa miniskuya on skuyeyapi kta, hecen wicašta
otoiyohi token awicaduptapi kte ein sdonyayapi kta.
7 Tychicus
hunkawanjin kiciyapi waštedakapi, qa waawanhdake owotanna, mici Itancan taokiye
kin hee token waun kin owasin oniciyakapi kta.
8 Heon etanhan
niyepi kin ekta ye waši, token yaunpi kin he sdonye ca, nicantepi kin iyuškin
niyanpi kta;
9 Qa he kici
Onesimus ye waši, he hunkawanjin kiciyapi owotanna, qa wašte enitanhanpi kin.
Heniyoza taku owasin den un kin oniciyakapi kta.
10 Aristarchus
kici makašapi kin he nape niyuzapi, qa Markus Barnabas tonškaku nakun. He
iwahoniyanpi, niyepi ekta niipi kinhan ti mahen u ši po:
11 Qa Jesus, he
nakun Justus eciyapi kin; hena e bakihdayapi kin etanhanpi. Henana Wakantanka
tokiconze kin en tawaši wicawaye ca, hena iyuškin mayanpi.
12 Epaphras
enitanhanpi kin, Messiya taokiye kin hee nape niyuzapi; he ohinniyan wocekiye
en, niyepi on nina cekiya, Wakantanka tawacin kin owasin en, owotanna, qa
ecedan nayajinpi kte cin heon.
13 Qa he
omdaka, niyepi on, tona Laodicea ekta un, qa tona Hierapolis ekta un kin, hena
koya on nina htaniiciya.
14 Lukas,
pejihuta wicašta wašte kin, Demas kici, nape niyuzapi.
15 Hunkanwanjin
kiciyapi Laodicea ekta unpi kin hena nape wicayuza po qa Nymphas, qa iye ti kin
ohna okodakiciye kin he nakun.
16 Wowapi kin
de niyepi ekta yawapi kinhan, okodakiciye Laodicea ekta un kin hena nakun yawa
wicakiya po, qa niš niyepi kin wowapi Laodicea etanhan kin he nakun yawa po.
17 Qa Archippus
kaken eciya po, Nitohtani Itancan kin etanhan iyacu qon he awakicin wo, yahduštan
kta ce.
18 Palos he
miye, nape kiciyuzapi kin de minape kin on wakaga. Makaškapi kin kiksuya po. Wowaonšida
niyepi en nicipi un nunwe. Amen.
No comments:
Post a Comment