Lakota/ Dakota Philippi (Philippians)

PALOS PHILIPPI OYATE WOWAPI WICAKICAGE CIN

WICOWOYAKE 1.

1 Palos qa Timotheus, Jesus Messiya taokiyewicaye cin, tona Philippi ekta Jesus Messiya en owotanna un kin hena, qa waawanhdake cin hunka wicayapi ko, wowapi unnicagapi:

2 Wakantanka Ateunyanpi, qa Jesus Messiya Itancan unkiyapi kin etanhan, wowaonšida, wookiye ko niyepi kin en nicipi un nunwe.

3 Ciksuyapi eca, Wakantanka mitawa wopida ewakiya ece.

4 Ohinniyan mitawocekiye otoiyohi en, niyepi owasin on iyuškinyan cewakiya ece:

5 Anpetu tokaheya kin ehantanhan, qa dehanyan, wotanin wašte kin en kodayeciyapi kin heon.

6 Unkan he sdonwaya; tuwe tokaheya ohan wašte nicicagapi kin he niciyuštanpi kta, Jesus Messiya anpetu tawa kin hehanyan.

7 Hecen niyepi owasin wacin en ciyuzapi kte cin he hecetu, cante en mayaduzapi kin heon; makaškapi kin, qa wotanin wašte omdake ca mdasuta kin he en, qa nakun wowašte mitawa kin en niyepi owasin oyapapi ece.

8 Wakantanka sdonmayan, Jesus Messiya cante kin on owasin cantocikpanipi.

9 Qa he de icewakiya, wašteyadakapi kin he wosdonye wiyukcanpi ko owasin en, sanpa qa sanpa tankaya aye kta:

10 Kinhan, taku wašte kin hena idukcanpi kta, hecen okonwanjidan hicahe šni yaunpi kta, Messiya anpetu tawa kin en;

11 Qa wicoowotanna waskuyeca kin on ojudan yaunpi nunwe, hena Jesus Messiya on Wakantanka woyatan qa wowitan tawa kin ee.

12 Mihunkawanji, taku token ecamiconpi kin he on wotanin wašte kin sanpa otanin aye cin he sdonyayapi kta wacin.

13 Hecen wicaštayatapi tahocoka kin ekta, qa owancaya Messiya on makaškapi kin he otanin.

14 Qa Itancan kin en, hunkawanjin kiciyapi kin ota, miye makaškapi kin on, sanpa nina waditakapi, qa kokipešniyan wicoie kin taninyan oyakapi ece.

15 Hunh waakinicapi qa winawizipi kin on, qa hunh iš waštedakapi kin on Messiya oyakapi ece.

16 Hena e waakinicapi kin on, wowicake eciyatanhan šni Messiya kin oyakapi, qa makaškapi kin en wokakije kokijuya aupi kta kecinpi;

17 Qa unmapi kin iš waštekidapi kin on etanhan, wotanin wašte mdusuta kta e on emahdepi kin sdonyapi.

18 Ecin to; toketu kašta, wohnaye on etanhan, kaeš awicakehan, unma tukte kakeš, oyakapi kin he on imduškin, qa eeš nakun imduškin kta.

19 Nitawocekiyepi, qa Jesus Messiya Taniya wawokiye cin on, he wiconi emicicetu kta sdonwaya.

20 Qa nina awacanmi qa ape manka, hecen takudan on imaštece kte šni, tuka ohinniyan waditagya waun kin he iyecen nakaha mitancan kin on Messiya yuonihanpi kte, wani qa mate kte cin unma tukte kašta on etanhan.

21 Wani kin he Messiya ee, qa mate cinhan sanpa tanyan waun kta.

22 Wicacehpi kin en opeya wani kinhan, miohan waskuyeca kin hee, tuka unma tukte wacin nun tannin šni.

23 Taku nom aotins mayanpi; ekta mde ca Messiya kici waun kte hinca, he iyotan wašte.

24 Tuka wicacehpi kin en opeya waun kin he niyepi on wawokiyapi kin hee.

25 Hecen wahdukcan, qa heon wani, qa niyepi owasin om waun kta sdonwakiya, sanpa inicagapi qa wacinyan iduškinpi kte cin heon.

26 Qa hecen akeš ekta ciupi kinhan miye on, Jesus Messiya en sanpa nina iduškinpi kta.

27 Tuka Messiya tawotanin wašte kin eciyatanhan yanipi nunwe; hecen wanciyakapi wau kinhan, kaeš wau šni, unma tukte kašta, niohanpi kin nawahon kta, wicotawacin wanjidan en sutaya yaunpi, qa wicanagi wanjidan yuha wotanin wašte kin wacinyan oyecipapi kin.

28 Qa tona toka niyanpi kin hena on, ihnuhan taku ininihanpi kin: hee hena en wicotakuni šni au kta yuotanin, tuka heon niyepi kin en wiconi Wakantanka etanhan au kta otanin.

29 Messiya he ayuco nicupi, iye wacinyayapi kte ca, nakun iye on kakišniyanpi kte cin.

30 Qa makakije cin wanmayadakapi qon, qa nakaha en mau nayahonpi kin, he iyecen wokakije duhapi kta.

PHILIPPI WICOWOYAKE 2.

1 Heon Messiya on iwicakiyapi yuke cinhan, qa wowaštedake en imagagaiciyapi, qa Woniya kin en kodakiciyapi yuke cinhan, qa wacantkiyapi wowaonšida ko yuke cinhan,

2 Mitowiyuškin kin miciyuštan po, akiyecen awacannipi, qa wowašte okonwanjidan duhapi, qa wicotawacin wanjidan yaunpi kta.

3 Waakinicapi qa ihdatanpi kin on takudan ecanonpi kte šni, tuka wahbayedan yaunpi, qa otoiyohi niye isanpa tokan wašte yecidakapi kta.

4 Otoiyohi wicitawa kin ecedan ekta etonwanpi šni po, tuka nakun otoiyohi tokan tawa kin ekta.

5 Jesus Messiya token tawacin qon he iyecen wacin duzapi kta.

6 He Wakantanka ouncage kin en un, qa Wakantanka kici akidecen yanka keiciye cin he wawicakipi šni kecin.

7 Tuka ihdušdoke ca wowidake un kin ouncage kin icu, qa wicašta kin iyecen ihdus icaga;

8 Qa wicašta ouncage kin en un qehan, ihduhukuya qa wiconte ekta aiyahdeya wanahon yanka, cansusbeca en te cin he ehan.

9 Heon etanhan Wakantanka he tehan wankantuya hduwankan icu, qa caje wan wicacaje owasin isanpa wašte kin he qu;

10 Hecen Jesus caje kin on, hupahu kin owasin canpeška makehde enajin kta, mahpiya ekta un, qa maka akan un, qa maka kin ihukuya un kin henakiya.

11 Qa Wakantanka Ateyapi kin yatanpi kte cin on, Jesus Messiya he Itancan kin ee ce; wicaceji owasin eya oyakapi kta.

12 Heon waštecicidapi kin, ohinniyan nayahonpi kin he iyecen, en cicipi waun kin hecedan šni, tuka nakaha en wann šni ešta, sanpa wokokipeya cancaniciya yanipi kte cin hduštan po.

13 Tuwe cinniciyapi, qa econniciyapi kin he Wakantanka ee, iye toiyokipi kin eciyatanhan niyepi kin en ohanyan.

14 Wihnupi qa waakinicapi wanin taku owasin econ po.

15 Hecen iyaonpepica šni, qa owotanna, wicoicage wan pemni, qa yukšankšanyan un kin ehna Wakantanka cinca ecedan yaunpi kta; hena en maka petijanjan iyecen iyoyanpa yaunpi;

16 Qa wiconi wicoie kin pazo yaunpi: Hecen Messiya anpetu tawa kin en taku on imawinkta kin he dee, taku šni on waimnanke šni, qa taku šni on htawani šni kin hee.

17 Unkan wacinyayapi wošnapi wawokiyapi kin en, amihdapson ešta nakun imduškin, qa niyepi owasin om imduškin kta.

18 Heon niš niyepi nakun iduškinpi qa miyeci iniwinktapi ece.

19 Tuka niyepi kin ekta Timotheus kohanna yewaši kta wacanmi, Jesus Messiya Itancan kin on, hecen tohan token yaunpi kin sdonwaye cinhan, hehan miš nakun iyokipi waun kta. 

20 Tuwe iyecen wacin yuze ca iye cinka taku nitawapi kin ihakta kte cin mduhe šni.

21 Owasin wicitawa kin akitapi, qa taku Jesus Messiya tawa kin akitapi šni.

22 Tuka he iyutapi kin sdonyayapi, hokšidan wan atkuku kici un kin he iyecen wotanin wašte kin en micica.

23 Iye kohanna ye waši kta, tohan token waun kte cin sdonwakiya.

24 Qa miš eya ecadan wau kta e Itancan kin wacinwaya.

25 Tuka Epaphroditus misunka qa mitawaši, qa kici akicita waun, tuwe u yašipi, qa tuwe taku imakakije cin omakiye cin, he niyepi ekta hde waši kta iyececa epca.

26 He niyepi owasin cantonikpanipi, qa iyokišica un, wayazanke cin nayakihonpi kin heon.

27 He qeš wayazanke ca wanna te kta ikiyedan, tuka Wakantanka onšikida, qa he išnana šni, tuka miye nakun, hecen woiyokišice icitakihna mduhe kte šni e heon.

28 Qa heon itonpeyahan hde waši, ake wandakapi kinhan iduškinpi kta, qa miš aopten iyokišica amaye kta.

29 He Itancan kin on etanhan wopida owasin yuha tin u ši po, qa tona hececapi kin wicayuonihan po.

30 He Messiya wicohtani tawa kin on wanna aškadan te kta tuka, wiconi tawa kin itonkipe šni, miye en wawokiyapi aokpaniyan ecanonpi kin he niciyuštanpi kte cin heon etanhan.

PHILIPPI WICOWOYAKE 3.

1 Ehake mihunkawanji, Itancan kin en iyuškin po. Taku kin dena on wowapi cicagapi kin he miye tehike wadake šni, qa niyepi kin on wašte.

2 Sunka kin on waktaya un po; tona šicaya econpi kin on wakta po; wayušpapi kin on waktaya un po.

3 Tona bakihdayapi, qa wicocante on Wakantanka ohodapi, qa Jesus Messiya en iwinktapi, qa wicacehpi wacinyanpi šni kin heuncapi.

4 Miš nakun, taku on wicacehpi kin wacinwaye kte cin mduha tuka. Tuwe wicacehpi wacinyan okihi kecin kinhan he isanpa owakihi.

5 Anpetu išahdogan hehan bamakihdayapi, Israel oyate qa Benjamin tawicoun kin hematanhan, Hebrew etanhan Hebrew kin, qa woope kin eciyatanhan Pharisee kin hemaca.

6 Ohodapi kin eciyatanhan okodakiciye kin šicaya wakuwa, qa woope woowotanna kin he eciyatanhan takudan iyaonpepica šni waun.

7 Tuka taku tona mihdamna qon hena Messiya on takušni wadake:

8 Han, awicakehan taku owasin taku šni wadake, Jesus Messiya Itancan mitawa kin wosdonye oiyokipi kin on, iye on taku owasin toki ehpewaya, qa hena tacesdi ece mdawa, Messiya iyowahi kte cin heon;

9 Qa he en waun kta, mitoowotanna wicoope kin eciyatanhan un kin he wahduhe šni, tuka taku Messiya wacinyanpi eciyatanhan un kin, Wakantanka toowotanna wacinyanpi kin on icage cin hee wacin.

10 Hecen he iye sdonwaye kta, qa piya ikicage cin wowašake kin, qa iye kakije cin okicipapi kin hena ko, iye te cin ouneage kin en imacage kta:

11 Hecinhan, wiconte etanhan woekicetu kin en iyowahi kte hinca.

12 Wanna dehan iyowahi, qa wanna mayuštanpi kin ee šni; tuka kuwa amde, okinni taku on Jesus Messiya mayuze cin hee mduze kta.

13 Mihunkawanji, nahanhin mduze mihdawa šni;

14 Tuka taku wanji ecamon, taku hekta un kin hena akiktonš waun, qa taku tokata un kin hena ekta nape yewakiya ece; hecen oinajinta awaimnanka, Jesus Messiya on Wakantanka wankantuya wicakico kin en oqipe kin yewakiye kte cin heon etanhan.

15 Heon tona unyuštanpi kin hecen awauncinpi kta, qa taku on togye wacin duzapi hecinhan, he nakun Wakantanka oniciyakapi kta.

16 Tuka tohan iyounhipi kin he en woope wanjidan eciyatanhan maunnipi, qa okonwanjidan awauncinpi kte.

17 Hunkawanjin ciyapi kin, omicipa po, qa tona hecen manipi kin hena iwanwicayaka po, waonspekiya unyaduhapi kin he iyececa.

18 Wanna ota ociciyakapi, qa nakaha ake ceya omdake, wicašta ota Messiya cansusbeca tawa kin tokaye cin iyecen manipi ece.

19 Hena owihanke kin he wicotakunišni; iye tezipi kin Wakantanka yapi, wowištece kin en iwinktapi, qa taku makata un kin awacinpi ece.

20 Tuka okodakiciye unkitawapi kin he mahpiya kin ekta un, qa hetanhan Wanikiya Jesus Messiya Itancan kin hi kta unkapepi.

21 Iye untancanpi hanye cin he yutokeca kta; qa iye tancan wakan kin ouncage kin en icahye kta, towašake on taku owasin ohiye kta okihi kin heon etanhan.

PHILIPPI WICOWOYAKE 4.

1 Heon etanhan mihunkawanji waštecicidapi, qa cantocikpanipi kin, wowiyuškin mitawa qa watešdake mitawa kin, Itancan kin en sutaya najin po, waštecicidapi.

2 Euodias cewakiye ca, Syntyche cewakiya, Itancan kin en okonwanjidan awacinpi kta.

3 Qa mitawaši wicake cin ceciciya ce, winohinca tona wotanin wašte kin en mici ohanye cin hena owicakiya wo, qa Clement, qa mitawaši unmapi, cajepi kin wiconi wowapi kin en un kin hena koya.

4 Ohinniyan Itancan kin en iyuškin po; qa ake, Iyuškin po, epe.

5 Niwahbapidan kin he wicašta owasin sdonyapi kta. Itancan kin kiyadan un.

6 Takudan iyokišinya awacinpi šni po, tuka taku yacinpi kin owasin on, wocekiye, wokidapi qa wopida eyapi ko on Wakantanka oyakidakapi kta.

7 Qa Wakantanka tawookiye okahnihpica šni kin he nicantepi qa nitawacinpi kin Jesus Messiya en niyuhapi kte.

8 Unkan ehake mihunkawanji, taku wicakapi kin, taku yuonihanpi kin, taku owotanna kin, taku wakan kin, taku wašte dapica kin, taku wašte eyapi kin, wowašte qa wowitan yuke cinhan, hena awacin po.

9 Taku tona onnispepi, qa iyacupi, qa nayahonpi, qa miye en wandakapi kin hena econ po, qa Wookiye Wakantanka kin niyepi kin en nicipi un nunwe.

10 Itancan kin en nina imduškin, nakaha uphanketa awamayacinpi kin he piya hca aya heon. He de en ihamayaktapi, tuka token on ecamiyeconpi nun tannin šni.

11 Taku imakakije cin he wake šni; taku en micihe cin hena on iyokipiya waun kta e onspemiciciya.

12 Token wahpaniya waun kte cin he sdonwakiya, qa token wijinya waun kte cin he nakun sdonwakiya; ohinniyan qa taku owasin on, wimapi, qa wotektewahda kta, wimajica qa mawahpanica kte cin onspemakiyapi.

13 Messiya wašagmaye cin he eciyatanhan taku owasin owakihi.

14 Tuka makakije cin en omayakiyapi kin he tanyan ecanonpi.

15 Philippi wicašta, he de sdonya po, wotanin wašte otokahe ekta, Macedonia etanhan imdamde cehan, waqupi qa icupi kin icahtagya okodakiciye kin niye nišnana omayakiyapi.

16 Thessalonica ekta waun qon he icunhan, taku imakakije cin on wancadan qa nonpa taku mayakaipi.

17 Taku maqupi kta wacin kin hee šni, tuka waskuyeca niyepi on sanpa niciyuotapi kte cin he wacin.

18 Tuka owasin mduhe ca wijica waun; niyepi etanhan taku Epaphroditus maqu kin hena iwacu, taku waštemna wosna wašte, qa Wakantanka iyokipi kin heca he iwamašeca.

19 Taku inicakijapi kin owasin Wakantanka mitawa nicupi kta, iye woyuha wowitan kin en un kin hetanhan, Jesus Messiya eciyatanhan.

20 Wakantanka Ate unyanpi kin wowitan owihanke wanin kicihan nunwe. Amen.

21 Tona Messiya en owotanna un kin hena nape wicayuza po. Hunkawanjin kiciyapi om waun kin hena nape niyuzapi.

22 Tona owotanna un kin hena owasin nape niyuzapi, Cæsar tiyohnaka kin hena iyotan.

23 Jesus Messiya Itancan unkiyapi towaonšida kin niyepi owasin en nicipi un nunwe. Amen.