PALOS
TIMOTHEUS WOWAPI KICAGA; TOKAHEYA KIN
WICOWOYAKE 1.
1 Palos Jesus
Messiya yeši qon, Wakantanka Wanikiya unkitawapi, qa Jesus Messiya Itancan
wacinunyanpi kin he toope kin eciyatanhan,
2 Timotheus,
wacinyanpi kin eciyatanhan micinkši kin hee, wowašte, wowaonšida , wookiye ko,
Wakantanka Ateunyanpi, qa Jesus Messiya Itancan unkiyapi kin hena etanhan
kiciun nunwe.
3 Macedonia
ekta mde cehan, Ephesus en owanji yanke ciši, wanjikji woonspe tokeca oyakapi kte
šni e iwahokonwicayakiye kte cin heon;
4 Qa
hitunkakanpi, wicoicage owihanke šni oyakapi ko awacinpi kte šni; hena taku kin
wiwangapi eceedan okihi, qa on Wakantanka wacinyanpi kin en icahyapi šni.
5 Wicacante
ecedan, wicanagi wašte, qa wacinyanpi wicakapi kin etanhan wanantkiyapi kin he
woahope ecetuyapi kin nee.
6 Tona he
icunonpa yapi kin hena takušnišni akinicapi kin en yeiciyapi.
7 Woope kin tokan
onspewicakiyapi kta cinpi; tuka taku eyapi, qa taku waditagya oyakapi kin he
iyukcanpi šni.
8 Woope kin he wašte
sdonunyanpi, tuwe woope kin iyecen yuhe cinhan.
9 Qa he de
sdonunyanpi, woope kin he wicašta owotanna kicagapi šni, tuka tona woope opapi šni,
qa anagoptanpi šni kin hena wicakicagapi, tona Taku Wakan ohodapi šni, qa
wahtanipi sa, waonšidapi šni qa wayašicapi, atkuku hunku kici wicakiktepi kin,
qa wicašta wicakatapi kin hena,
10 Wawicihahapi
econpi, waihuhupi sa, wicašta wiyopewicaye cin hena, itonpišni qa woope
kicaksapi kin hena on woope kagapi ece; qa taku tokeca woonspe zani kin kašeye
cinhan he nakun:
11 Wakantanka
wacantkiya wotanin wašte wowitan yuhe maši kin he eciyatanhan.
12 Unkan Jesus
Messiya Itancan unkiyapi he okihimaye ca, wacinyepica madake ca, wicohtani kin
de en opemaye ciqon he wopida ewakiya ece.
13 He itokam
waoštewahda, qa šicaya wicawakuwa, qa wahanmicida; tuka wicawada šni icunhan
hena iyukcan šni ecanion kin heon onšimadapi.
14 Qa Itancan
unkiyapi towaonšida kin he wacinyanpi qa wacantkiyapi Jesus Messiya en nina
yuotapi.
15 Wicoie kin
de wacinyepica, qa owancaya icupi kta iyececa, Jesus Messiya wahtanipi sa
niwicaye kta e on makata hi; hena en miye imayotan.
16 Tuka heon
etanhan onšimadapi, hecen miye en tokaheya Jesus Messiya wawacinkta yuza lanka
owasin hdutanin kta, wicani kta e on wicadapi kte cin hena waonspewicawakiye
kta e heon.
17 Hecen Wicaštayatapi
owihanke wanica, tepica šni, qa wanyakepica šni un kin, Taku Wakan ecedan ksape
cin hee, woyuonihan, wowitan ko, owihanke wanin kicihan nunwe.
18 Timotheus
micinkši, woope kin de cicu, niye on wokcanpi tokaheya ekta un qon hena eciyatanhan,
hecen hena on ozuye wašte en akicita oyape kta;
19 Wowacinye qa
wicanagi wašte sutaya yahduhe kte cin heon. Wanjikši hena ehpeyapi qa on
wacinyanpi ekta kamden iyeiciyapi.
20 Hymenæus qa
Alexander kici, hena hececapi, hena Satan waqu, waoštehdapi kte šni onspeiciciyapi
kte cin heon.
1 TIMOTHEUS WICOWOYAKE
2.
1 Heon, taku
owasin itokam, wicašta kin owasin on, wokidapi, wocekiye, waiciyapi wicoie,
wopida ko eyapi kta wacin.
2 Wicaštayatapi
kin hena on, qa tona itancan unpi kin
owasin on, hecen woohodapi owasin qa wicohan owotanna kin en, owanjidan unkanpi
qa wikope šni unnipi kta.
3 He wašte, qa
Wakantanka Wanikiya unkitawapi kin itokam woiyokipi kin hee.
4 He iye wicašta
owasin nipi, qa wowicake sdonyapi kin en hipi kte cin he cin.
5 Taku Wakan
wanjidan, qa Taku Wakan qa wicašta kici wiciyotahedan un kin wanjidan, Jesus
Messiya wicašta kin hee.
6 He iye
atayedan owasin opewicakiton kta e icicu, anpetu tawa kin waayatanin kte cin
heon.
7 He en
eyanpaha qa yešipi kin heca makagapi; Messiya en wowicake epa, itonšni
mawanica; wowacinye wowicake ko Ikcewicašta onspe wicawakiye kte cin heon.
8 Heon, wicašta
kin owancaya, wocanniye, waakinicapi ko wanin nape ašape šni kiyugan cekiyapi
kta wacin.
9 Qa winohinca
kin iš eya iyecen wokoyake oiyokipi kin kicunpi kta, qa tawacin wašte, wacin
tankapi koya; qa paha sonpi mazaskazi, inyan okitanin kin, qa wokoyake taku ota
iyopeyapi kin hena ko unpi kte šni;
10 Tuka wicohan
wašte kin hena, taku winohinca tona Wakantanka awacinpi kin iyokipipi kin hee.
11 Qa winohinca
kin inina un, qa taku owasin en wanahon yanke ca on onspeiciciye kta.
12 Tuka
winohinca kin iš waonspekiye ca wicašta kin iwankam un kta e iyowinwakiye šni,
he inina yanke kta.
13 Adam he tokaheya
kagapi, qa hehan Eve.
14 Qa Adam
hnayanpi šni, tuka winohinca kin iye hnayanpi, qa hecen woahtani hiyahdeya.
15 Tuka iš eya
cinca tonpi kin en niyanpi kta, wacinyanpi, wacantkiyapi, wicohan wašte qa
wacintankapi kin hduha yukanpi kinhan.
1 TIMOTHEUS WICOWOYAKE
3.
1 Iapi kin he
wowicake; tuwe waawanhdake unpi cin kinhan he wicohan wašte wan cin.
2 Tuka
waawanhdake cin he iyaonpepica šni un kta, winohinca wanjidan yuze kta, waktaya
un kta, wacinksapa, wahbayedan, ohanpi, wowicakiyaka;
3 Miniša en
iyeiciye šni, waawicape šni, mazaska nina akite šni; tuka wacintanka, wacinko šni,
waicucu wacin šni;
4 Iye tiyohnaka kin tanyan hduhe kta, qa
wicowahbadan owasin on cinca kin anagoptanwicakiye kta.
5 (Tuwe
tiyohnaka tawa kin tanyan hduha okihi šni kinhan, ecin token Wakantanka taokodakiciye
kin tanyan yuhe kta he?)
6 Aškatudan en
opapi kin hecece kte šni, he heca kinhan, okinni wahanicida kin on wakanšica
tawoyaco kin ekta iyaye kta.
7 Qa tona
itankan yakonpi kin hena tanyan oyakapi un kta, he hecetu šni kinhan,
wowihahaya un kta, qa wakanšica wihmunke tawa kin en iyohpaye kta.
8 Iš eya
hunkayapi un kin hena nakun wacinksapapi kta, ceji jatapi šni, miniša en
iyeiciyapi šni, qa mazaska nina akitapi kte šni:
9 Wicanagi
ecedan ohna wowacinye wowiyukcan kin yuhapi kta.
10 Hena e tokaheya
wicayukcanpi kta, qa hehan takudan iyaonpepica šni kinhan, hunkayapi un kin en
iyeyapi kta.
11 Nakun iš
tawicupi kin wahbapidan kta, waaie šni unpi kta, waktaya unpi kta, taku owasin
on owotanpidan.
12 Hunkayapi un
kin iš tawicu wanjidan kta, cinca wicayapi qa tiyohnaka tawapi kin tanyan hduhapi
kta.
13 Tona
hunkayapi un wicohan kin tanyan yuhapi kin hena wowitan wašte hdamnanpi, qa Jesus
Messiya wacinyanpi kin en waditaka icicagapi.
14 Dena hecen
wowapi cicaga, kohanna niye en ciu kta wacin.
15 Tuka tehan
wai šni kinhan, deciya tanhan on token Wakantanka tipi kin ohna opiniciye kta
sdonyaye kta, he okodakiciye Wakantanka ni un tawa kin ee, wowicake ihupa qa
taku ahe cin hee.
16 Unkan he
taku aiepica šni, Wakantanka awacinpi kin he wowiyukcan tanka; Wakantanka
wicacehpi en ihdutanin qon, Woniya kin on yaowotanna kagapi, mahpiya ohnihde
kin wanyakapi, Ikcewicašta kin ekta oyakapi, wicoicage kin en wicadapi, qa
wowitan kin ekta wankan ehdakupi.
1 TIMOTHEUS WICOWOYAKE
4.
1 Woniya kin
atayedan heya, Anpetu ihankeya kin en, wanjikši wacinyanpi kin ayuštanpi kta,
qa woniya šapa wahnaye sa, qa taku wakanšica tawoonspe ko anagoptanpi kta.
2 Wicahnayanpi
on itonšni iapi kta, nagipi kin maza kata on guguyapi kin heon.
3 Winohinca
wicayuzapi kin he tehindapi, qa woyute, tona wowicake wicadapi, qa sdonyapi kin
hena wopida eya icupi kta e Wakantanka kaga, hee yute šni wicašipi kta.
4 Taku Wakantanka
kage cin he owasin wašte, qa wopida yuha icupi kinhan, takudan ohinyanpi kte
šni.
5 He Wakantanka
oie, wocekiye ko on yuwakanpi.
6 Hena taku kin
hunkawanjinkiciyapi kin kiksuyewicayaye cinhan, Jesus Messiya taokiye wašte
yaun kta, wacinyanpi, wicoie, qa woonspe wašte ekta iyohiyaye cin hena en
tanyan icahniyanpi kta.
7 Tuka iapi šice
cin, wakanka hitunkakanpi yuhapi ko nakicipe ca, Wakantanka awacinpi kin he
amniheiciya wo.
8 Wicatancan
yeiciyapi kin he taku cistinna okihi; tuka Wakantanka awacinpi kin he taku
owasin okihi, wiconi kin de, qa wanji u kte cin iwahoyapi kin en un.
9 Wicoie kin he
wowicake, qa owancaya anagoptanpi kta iyececa;
10 Wakantanka
ni un wicašta owasin Wanikiya tawapi, qa iyotan tona wicadapi kin hena, he
wacinunyanpi kin heon htaunnipi, qa oštehdapi unyakonpi.
11 Hena taku
kin iwahokonwicakiye ca onspewicakiya wo.
12 Koniška yaun
kin heon tuwedan iwahtenida kte šni; tuka tona wicadapi kin hena waonspewicakiya
wo, wicoie kin en, wicohan kin en, wacantkiyapi kin en, woksape kin en,
wacinyanpi kin en, woyuecedan kin en.
13 Wowapi
yawapi, qa wahokonwicakiyapi, waonspewicakiyapi ko, hena econ wo, en wai šni
kin hehanyan.
14 Taku
wawokihi en niun kin, wokcanpi, qa waawanhdake unpi, nape aniputakapi kin on nicupi
qon he akiktonje šni wo.
15 Hena taku
kin awacin, qa ocowasin en yeiciya wo, hecen onspeniciciye cin owasin sdonyapi
kta.
16 Atayedan
awaicicin, qa woonspe nitawa kin awakicin wo, he hduha wo. Hecanon kinhan
niniciye ca, tona nanihonpi kin hena nakun niwicayaye kta.
1 TIMOTHEUS WICOWOYAKE
5.
1 Hunkayapi wan
iyopeyešni wo, tuka ateyapi un kin iyecen wahokonkiya wo, qa tona hakaktapi kin
hena nihunkawanji iyececapi kta;
2 Winohinca
tankapi kin hena iš inawicayaye ciniyecen, qa tona aškatudan unpi kin hena
tawinohtinwicayaye cin iyececapi kta, woyuecedan owasin en.
3 Wiwazicapi
kin, tona awicakehan wiwazicapi un kin hena wicayuonihan wo.
4 Tuka wiwazica
wan cinca wicaye cin, qa takojakpaku yuke cinhan, hena tokaheya wicowazi tawapi
kin en wowašte econ onspeiciciyapi kta, qa hunkake wicayapi kin iyunwin wicakicupi
kta; taku wašte qa Wakantanka itokam oiyokipi kin hee.
5 Tuwe
awicakehan wiwazica un kin he išnana ehpeyapi un, Wakantanka wacinye ca
ohinniyan, hanyetu anpetu ko, wocekiye eyapi, qa hoyekiyapi kin en un.
6 Tuka tuwe
iyokipi iciya un kinhan, he ni un icunhan wanna ta.
7 Hena hecen
iwahokonwicakiya wo, hecen iyaonpepica šni unpi kta.
8 Qa tuwe tona wicayuhe cin, qa iyotan
tiyohnaka tawa kin, taku wicakicamna šni kinhan, he wacinyanpi kin wanna ayuštan,
qa waawacin šni kin sam iyeya wicašta šica.
9 Wiwazica
waniyetu wikcemna šakpe ihukuya un kin he kahnigapi kte šni. He wicašta
wanjidan hihnaye ciqon,
10 Wicohan wašte
on tanyan oyakapi, cinca icahwicakiya, oicimani kin wonwicaya, tona owotanna un
siha wicakiyujaja, tona kakijapi kin owicakiya, qa wicohan wašte owasin amniheiciya
en opa hecinhan.
11 Tuka
wiwazica tona aškatudan wotapi kin hena wicakahnige šni wo; tohan Messiya en škehanhan
aye cinhan ake hihna tonpi kta;
12 Qa tokaheya
wacinyanpi qon he ayuštanpi kin heon woyaco aihduhapi kta.
13 Qa nakun
kujapi, qa ti iyaza yakonpi; qa kujapi hecedan šni, nakun taku oyakapi sa, qa
waaiapi sa, taku eyapi kte šni kin hena eyapi ece.
14 Heon, tona
nahahin wikoškapi kin hena hihna tonpi kta, cinca tonpi kta, qa tiyohnaka
hduhapi kta wacin, hecen toka kin taku iyawicaonpe kta okihi šni kagapi kta.
15 Wanna
wanjikji icunonpa Satan ihakam iyayapi.
16 Wicašta
wanji, kaeš winohinca wanji wacinyan un kin, he wiwazica hduhe cinhan okiye
kta; hecen okodakiciye kin tkeya qinpi kte šni, qa tona awicakehan wiwazica
unpi kin hena ece owicakiyapi kta.
17 Waawanhdake
un kin, tona tanyan awanhdakapi kinhan, hena wowitan icitakihna wicakiciyawapi
kta, tona wicoie, waonspekiyapi ko, en htanipi kin hena iyotan.
18 Wowapi Wakan
kin hecen eya, Tatanka wosdohan aguyapi napan kin he iohmus sutaya iyacu kte
šni. Qa ake, Tuwe htani kin he taku on opetonpi qon iyohi ece.
19 Waayatanin
nonpa, qa yamni duhe šni kinhan, hunka yapi un kin wanji en wiyaonpapi aupi kin
anagoptan šni wo.
20 Tona
wahtanipi kinhan hena owasin wicitokam taninyan iyopewicaya wo, hecen unmapi
kin kokipapi kta.
21 Wakantanka
itokam, qa Jesus Messiya Itancan kin, mahpiya ohnihde wicakahnigapi kin hena ko
wicitokam wahokonciciya, dena taku kin ecinšniyan wiyukcanpi wanin ecanon kta,
qa wicašta iwanyakapi kte cin on etanhan takudan ecanon kte šni.
22 Ohankoya
tuwedan nape aputake šni wo; qa wicašta tokeca wahtanipi kin en ope šni wo.
Ecedan ihduha wo.
23 Tokata mini
ecedan yatke šni wo, nitezi kin on, qa waniyazan sa kin heon, miniša waniqadan
yatkan wo.
24 Wicašta
wanjikji wahtanipi kin taninyan han, qa itokam woyaco ekta awicaya; qa hunh
wicihakam tanin ece.
25 Qa he iyecen
wicohan wasie wanjikši taninyan un, qa tona hecece šni ešta anahbepica šni.
1 TIMOTHEUS WICOWOYAKE
6.
1 Wowidake un
kin tona can napinpi kin ihukuya yukanpi kin hena itancan wicayawapi kin
wicakinihanpi owasin okihi wicahdawapi kta, hecen Wakantanka caje qa tawoonspe
kin oštehdapi kte šni.
2 Qa tona
itancan wacinyan unpi kin heca ihukuya unpi kinhan, hena šicewicakidapi kte šni,
om hunkawanjinkiciyapi kin heon; tuka hena wacinyan unpi, qa waštewicadakapi,
qa taku wašte kin en owicakicipapi kin heon sanpa owicakiyapi kta. Hena hecen
onspewicakiye ca wahokonwicakiya wo.
3 Tuwe wicoie wašte,
Jesus Messiya Itancan unkiyapi oie kin, wicohan ecedan kin eciyatanhan un kin
hena wicada šni kinhan, qa togye waonspewicakiye cinhan,
4 He
wahanicida, qa takudan sdonye šni un, tuka wakinicapi wiwangapi wicoie kin en
cante kin ocowasin iyeiciya; hena etanhan winawizipi, wakinicapi, waoštehdapi,
woawacin šica ko icaga.
5 Qa wicašta
tawacin šicapi kin oškiškeya hdokinicapi, wowicake yuhapi šni, qa taku kamnanpi
kinhan, he Wakantanka ohodapi kin ee kecinpi. Tona hececapi kin hena awicayuštan
wo.
6 Wakantanka
ohodapi kin woiyokipi kici he woyuha tanka.
7 Maka kin de
en takudan unkahipi šni, qa awicakehan hetanhan takudan unkahdapi kte šni.
8 Hecen woyute,
wokoyake ko unhapi kinhan, hena iyounkipipi kte.
9 Tona
watonpika cinpi kinhan, hena taku wawiyutanyan un, qa mazahtakiyapi en iyohpayapi,
qa witkotkoya cantiheyapi šica ota on kiuniyanpi ece kin hena en, hena e
waihangyapi, wicotakuni šni ko mahen wicašta kin ocowasin iyohpewicayapi ece.
10 Taku šica
owasin hutkan kin he mazaska waštedakapi kin hee; he wanjikji inahnipi, qa on
wacinyanpi kin etanhan iyaye yapi, qa wicokakije ota on caicipapi.
11 Tuka
Wakantanka wicašta tawa kin he niye, hena taku kin nakicipa wo; wicoowotanna,
Wakantanka ohodapi, wacinyanpi, wacantkiyapi, wacintankapi qa wowahbadan, hena akita
wo.
12 Wowacinye
okicize wašte kin he en econ wo, owihanke wanin wiconi kin he icu wo, he en
nicopi qa waayataninpi ota itokam wohdakapi wašte ecen oyahdake ciqon.
13 Wakantanka
taku owasin nikiye cin he itokam, qa Jesus Messiya Pontius Pilate itokam
owotanna wohdake ciqon he on ceciciya ce;
14 Ašape šni qa
iyaonpepica šni, woahope kin de duhe kta, Jesus Messiya Itancan unkiyapi
taninyan u kte cin hehanyan.
15 He tohan
iyehantu kinhan, tuwe yawaštepi, qa ecedan Wawokihi kin he taninyan hiyuye kta,
wicaštayatapi kin en Wicaštayatapi, qa itancanpi kin en Itancan kin hee.
16 He išnana
wiconi hduhe ca, iyoyanpa en hiyohipica šni kin he en ounyan, wicašta kin tuwedan
he wanyake šni, qa nakun wanyaka okihi kte šni; he wowitan, qa wowašake
owihanke wanin kiciun nunwe.
17 Tona maka kin
den watonpike cin wahokonwicakiya wo, watankaicidapi kte šni, qa woyuha atakuni
šni aya ece kin wacinyanpi kte šni, tuka Wakantanka ni un taku iyounkipipi kta
e iyakicuya unqupi kin hee;
18 Taku wašte
ece econpi kta, wicohan wašte ijicapi kta, wapamnipi, qa wawicaqupi tawatenyapi
kta;
19 Taku tokata
ihe cin he ekta ahehde wašte wan icihnakapi kta, hecen wiconi owihanke wanica
yuhapi kta.
20 Timotheus,
taku yuheciciye cin hena tanyan yuha wo, qa ikcekceya ecinšniyan wakinicapi kin
he nakicipa wo, wosdonye woitonšni akinicapi kin he nakun.
21 Wanjikji he
en opapi, qa wacinyanpi kin icunonpa iyayapi. Wowaonšida niciun nunwe. Amen.
No comments:
Post a Comment