JUDAS
TAWOWAPI KIN.
1 Judas, Jesus
Messiya tawowidake kin, qa Jakob sunkaku kin, tona Wakantanka Ateyapi kin en
wicayuecepidan, qa Jesus Messiya en wicakpatanpi, qa wicakicopi kin hena wowapi wicakicaga.
2 Wowaonšida,
qa wookiye, wacantkiyapi ko niyepi en niciyuotapi nunwe.
3 Waštecicidapi
kin, wiconi ptaya unhapi kin on aiciciya wowapi cicagapi eca, wowacinye ehanna wicašta
wakan wicaqupi qon he nina yakitanpi kta e on wowapi cicagapi, qa wahokonciciyapi
kta iyececa.
4 Wicašta
wanjikši nahmana en opapi, wanakajatanhan woyaco kin de on owicawapi ; hena
Taku Wakan iyececapi šni, qa Wakantanka unkitawapi towaonšida kin he wicowicaštašni
kagapi, qa Wakantanka ecedan Itancan kin he anahmanpi, qa nakun Jesus Messiya
Itancan unyanpi kin.
5 Heon etanhan,
taku, ehanna sdonyayapi ešta, he ake kiksuyeciciyapi kta wacin, Itancan kin
oyate kin Egypta etanhan ehdaku, qa iyohakam tona wicadapi šni kin hena
ihangwicaye cin.
6 Qa nakun
mahpiya ohnihde otokahe unpi kin kpatanpi šni, tuka iye tipi ehpekiyapi qon, hena
otpaza ihukuya, owihanke wanin mazaicicahiha kin on, anpetu tanka woyaco kin he
en awicayuha.
7 Sodom qa
Gomorrha iyececa, qa otonwe hena ihdukšan wanke cin, hena iš eya iyecen wiinahmanpi
kin en icicupi, qa wicacehpi toktokeca akitapi ece qon hena e woonspe on
ehdepi, qa peta owihanke wanica on wošitkihda en unpi.
8 He iyececa,
wihamnanpi sa kin dena wicacehpi kin ašamyapi, qa wokiconze wahtedapi šni, qa
taku tanka yašicapi ece.
9 Hececa, tuka
Michael mahpiya ohnihde itancan kin he wakanšica kin kici econ, qa Moses tancan
kin on akinicapi qehan, wooštehda woiyaonpe wan en aya tawatenye šni, tuka,
Itancan kin iyopeniyan nunwe, eciya.
10 Tuka dena e
qe taku sdonyapi šni kin hena yašicapi ece: tuka iye icagapi kin eciyatanhan
taku sdonyapi kin hena on ihdšicapi, woteca ia okitpanipi kin iyececa.
11 Wotehi
wicakiciun nunwe; Cain tancanku kin ohna yapi, qa wokajuju on, Balaam tawohnaye
kin nina ainyankapi, qa Core wicakipajin qon en ihangiciyapi.
12 Hena woašape
kin heca, wacantkiya wayatapi kin en opeya wotapi, qa wikopešniyan cemiciyapi:
mahpiya sapa mini wanica tate on ayapi ece kin; can kin ptanyetu eca šeca aya,
waskuyeca codan, inonpa šeca, qa hute eciyatanhan yujunpi kin hena hececapi.
13 Miniwanca
taja ohitika, iye wowištece tawapi kin minitaga iyecen hiyuyapi ece; wicanhpi onuniyata
unpi, on otpaza sape hinca owihanke wanin wicakicihnakapi.
14 Enoch Adam
etanhan wicašta išakowin qon he itokam hena owicayake ca heya; Wanyaka po,
Itancan kin wicašta wašte wicayuhe cin woyawa tanka om u ce;
15 Owasin
wicayaco kta, qa tona Taku Wakan ohodašni kin hena wicohan šikšica owasin ohodašniyan
econpi qon hena sdonkiyewicaye kta, qa wicoie canksiksi owasin wahtanipi sa
Taku Wakan ohodapi šni oie kicatonpi ece qon hena nakun.
16 Hena e wihnupi
sa, wawiyaonpapi sa, iye cantiheyapi kin eciyatanhan manipi ece; qa i
eciyatanhan wahanhanicidaya iapi, qa taku on etanhan wicašta itohnake kin waštedakapi
ece.
17 Tuka waštecicidapi
kin, niyepi, Jesus Messiya Itancan unyanpi yewicaši qon hena oiepi ehanna
oyakapi qon hena kiksuya po;
18 Anpetu
ihankeya kin en wicašta wawihahapi kin yuke kta, iye cantiheyapi šice cin
eciyatanhan manipi kin, he oniciyakapi qon.
19 Ihdutokanpi
kin dena eepi, witantanpi, qa Woniya kin yuhapi šni.
20 Tuka waštecicidapi
kin, niš niyepi wowacinye iyotan wakan nitawapi kin he ohna icahiciyapi, qa
Woniya Wakan kin eciyatanhan wocekiye eya po;
21 Wakantanka waštedakapi
kin en ihduha po; qa Jesus Messiya Itancan unyanpi towaonšida wiconi owihanke
wanica iyahde kte cin he ape yukan po.
22 Unkan hunh
wicayukcanyan onšiwicada po;
23 Qa hunh iš
wokokipe on niwicaya po, peta etanhan iwicacupi kin iyececa; qa wokoyake
wicacehpi on ašapapi kin hena ee kaeš šicedaka po.
24 Unkan tuwe
woahtani econ šni niyuhapi kta okihi, qa wowiyuškin yuha iye towitan kin en
iyaonpepica šni enihdepi kte cin,
25 Wakantanka
ecedan ksapa, Wanikiya unkitawapi kin hee, Jesus Messiya Itancan unyanpi kin
eciyatanhan, wowitan, woyaonihan, wookihi qa wokiconze, dehantu qa wicoicage
owasin hehanyan, tawa nunwe. Amen.
No comments:
Post a Comment